މަރަޑޯނާ އާއި މެސީގެ ޖާދޫ: ބަންގްލަދޭޝްގައި އާޖެންޓީނާގެ ފުޓްބޯޅަ ފޯރި އިންތިހާއަށް!
އާޖެންޓީނާގެ ފުޓްބޯޅަ ލެޖެންޑް ޑިއޭގޯ މަރަޑޯނާ އާއި އެ ގައުމުގެ ތަރި ލިއޮނަލް މެސީގެ ސަބަބުން، އާޖެންޓީނާއާ 17,000 ކިލޯމީޓަރު ދުރުގައި އޮތް ބަންގްލަދޭޝްގައި އާޖެންޓީނާގެ ފުޓްބޯޅަ ޓީމަށް އޮތް ލޯތްބާއި ތާއީދު އާދަޔާޚިލާފަށް ބޮޑުވެ، މުޅި ގައުމުގައި ބޮޑު ފޯރިއެއް ހިފާފައިވާ ކަމަށް ބައިނަލްއަގުވާމީ މީޑިއާތަކުން ރިޕޯޓްކޮށްފިއެވެ. ބަންގްލަދޭޝްއަކީ މިހާތަނަށް ދުނިޔޭގެ ތަށީގެ ފުޓްބޯޅަ މުބާރާތަކަށް ކޮލިފައިވެފައިވާ ގައުމަކަށް ނުވި ނަމަވެސް، ކޮންމެ ހަތަރު އަހަރަކުން އެއްއަހަރު ބާއްވާ ވޯލްޑް ކަޕް މުބާރާތްތަކުގައި ބަންގްލަދޭޝްގެ މަގުތަކާއި ޔުނިވަރސިޓީތައް ފުރިގެންދަނީ އާޖެންޓީނާގެ ނޫކުލައާއި ހުދުކުލައިގެ ދިދަތަކުންނެވެ.
ބަންގްލަދޭޝްގެ ސަޕޯޓަރުން ބުނާ ގޮތުގައި މި ލޯބި ފެށިގެންދިއައީ 1986 ވަނަ އަހަރުގެ ވޯލްޑް ކަޕްގައި ޑިއޭގޯ މަރަޑޯނާ ދެއްކި މޮޅު ކުޅުމާއި، ފޯކްލޭންޑް ހަނގުރާމައަށްފަހު އިންގްލެންޑް އަތުން އާޖެންޓީނާ ހޯދި މޮޅާއެކުގައެވެ. އޭގެ ކުރިން ބަންގްލަދޭޝްގެ ގިނަ ބަޔަކު ބްރެޒިލްއަށް ތާއީދު ކުރި ނަމަވެސް، މަރަޑޯނާގެ ޖާދޫގައި ޖެހި މުޅިން އާ ޖީލެއް އާޖެންޓީނާގެ ސަޕޯޓަރުންގެ ގޮތުގައި އުފެދިގެންދިޔައެވެ. އަދި 1990 ވަނަ އަހަރުގެ ފައިނަލުން ބަލިވެ މަރަޑޯނާ ދަނޑުމަތީގައި ރޮއިލި ރޮއިލުން ވެގެންދިޔައީ ބަންގްލަދޭޝްގެ ރައްޔިތުންގެ ހިތްތަކުގައި އާޖެންޓީނާއަށް އޮތް ލޯބި އިތުރަށް ވަރުގަދަވި ސަބަބަކަށެވެ.
މި ފޯރީގެ ސަބަބުން ދެ ގައުމުގެ ސިޔާސީ ގުޅުމަށްވެސް ވަނީ ބޮޑު ބަދަލެއް އައިސްފައެވެ. ސަޕޯޓަރުންގެ މި ފޯރި ބައިނަލްއަގުވާމީ ސަމާލުކަމަށް އައުމާ ގުޅިގެން، އާޖެންޓީނާ ސަރުކާރުން ވަނީ 45 އަހަރަށްފަހު ބަންގްލަދޭޝްގެ ވެރިރަށް ޑާކާގައި ހުންނަ އެގައުމުގެ އެމްބަސީ 2023 ވަނަ އަހަރު އަލުން ހުޅުވާފައެވެ. މީގެ އިތުރުން މިހާރު ކުރިއަށްދާ 2026 ގެ ވޯލްޑް ކަޕް މެޗުތައް ބަންގްލަދޭޝްގެ ގަޑިން މެންދަމުން އަލިވެ ހަތަރެއް ޖަހާއިރު ކުޅުނު ނަމަވެސް، ސަޕޯޓަރުން ނިދިނަގާލާފައި ބޮޑުސްކްރީންތަކުގެ ދޮށަށް އެއްވަމުންދެއެވެ.
ނަމަވެސް މި ބޮޑު ފޯރިއާއެކު ބައެއް ކުޅިވަރު ނޫސްވެރިންނާއި ކުރީގެ ކޯޗުން ކަންބޮޑުވުން ފާޅުކުރެއެވެ. އެފަރާތްތަކުން ފާހަގަކުރާ ގޮތުގައި ބަންގްލަދޭޝްގައި ފުޓްބޯޅައަށް މިފަދަ ބޮޑު ޝައުގުވެރިކަމެއް އޮތްއިރުވެސް، އެގައުމުގެ ގައުމީ ޓީމު ފީފާ ރޭންކިންގްގެ 181 ވަނައިގައި އޮތުމަކީ ހިތާމަހުރި ކަމެކެވެ. ގައުމުގައި އެކަށީގެންވާ ފުޓްބޯޅަ ދަނޑުތަކާއި އެކަޑަމީތައް ނެތުމުގެ ސަބަބުން، ޒުވާނުންގެ ކިބައިގައި ހުރި ހުނަރު ކުރިއެރުވޭނެ ރަނގަޅު ނިޒާމެއް ނެތްކަން އެފަރާތްތަކުން ފާހަގަކުރެއެވެ.
ބަންގްލަދޭޝްގައި އާޖެންޓީނާގެ ފުޓްބޯޅައަށް އޮތް ލޯތްބަކީ ހަމައެކަނި ކުޅިވަރެއްގެ ގޮތުގައި ފެށުނު ކަމެއް ނޫނެވެ. ދެ ގައުމުގެ ދެމެދުގައި އޮތް މި ހާއްސަ ގުޅުން އެންމެ ފުރަތަމަ އުފެދިގެންައީ 1980 ގެ އަހަރުތަކުގެ ތެރޭގައެވެ. އޭގެ ކުރިން ބަންގްލަދޭޝްގެ ގިނަ ބަޔަކު ތާއީދުކުރަމުންދިއައީ ބްރެޒިލްއަށް ނަމަވެސް، 1986 ވަނަ އަހަރުގެ ވޯލްޑް ކަޕްގައި ޑިއޭގޯ މަރަޑޯނާ ދެއްކި ތަފާތު މޮޅު ކުޅުމާއެކު މުޅި ގައުމުގެ ސަމާލުކަން އާޖެންޓީނާއަށް ހުއްޓުނެވެ. ހާއްސަކޮށް ފޯކްލޭންޑް ހަނގުރާމައަށްފަހު އިންގްލެންޑް އަތުން އާޖެންޓީނާ ހޯދި ތާރީޚީ މޮޅަކީ، އިނގިރޭސި އިސްތިއުމާރުގެ ދަށުގައި ކުރިން އޮތް ބަންގްލަދޭޝްގެ ރައްޔިތުންގެ ހިތްތަކުގައި އާޖެންޓީނާއަށް ބޮޑު ލޯތްބެއް އުފެދިގެންދިޔަ މައިގަނޑު އެއް ސަބަބެވެ.
މި ފޯރި އާ ޖީލަކަށް ގެނެސްދީ، އިތުރަށް ވަރުގަދަކޮށްދިނީ ލިއޮނަލް މެސީގެ ޖާދޫގަރީ ކުޅުމެވެ. މަރަޑޯނާ ކުޅުނުތަން ނުދެކޭ ޒުވާނުންވެސް މެސީގެ ސަބަބުން އާޖެންޓީނާގެ ސަޕޯޓަރުންނަށް ވެގެންދިޔައެވެ. ކޮންމެ ބޮޑު މުބާރާތަކާ ދިމާކޮށް ބަންގްލަދޭޝްގެ މަގުތަކާއި ގޭގޭގައި އާޖެންޓީނާގެ ދިދަ ދަމައި، މުޅި ގައުމު ނޫާއި ހުދުކުލައިން ފުރާލައެވެ. އަދި 2022 ވަނަ އަހަރު ގަތަރުގައި ބޭއްވި ވޯލްޑް ކަޕް އާޖެންޓީނާއިން ކާމިޔާބު ކުރުމުން ބަންގްލަދޭޝްގައި ފާޅުކުރި ބޮޑު އުފާވެރިކަން ބައިނަލްއަގުވާމީ މީޑިއާތަކުގެ ސަމާލުކަމަށް އައިސް، ދުނިޔޭގެ ސަމާލުކަން މި ކަމަށް ވަރަށް ބޮޑަށް ހުއްޓުނެވެ.
މި ކުޅިވަރުގެ ފޯރީގެ ސަބަބުން ދެ ގައުމުގެ ސިޔާސީ އަދި ހާރިޖީ ގުޅުމަށްވެސް ވަނީ ބޮޑު ކުރިއެރުމެއް އައިސްފައެވެ. ބަންގްލަދޭޝްގެ ސަޕޯޓަރުންގެ ފަރާތުން ފެނުނު އާދަޔާޚިލާފު ލޯތްބަށް އިހުތިރާމް ކުރުމުގެ ގޮތުން، އާޖެންޓީނާ ސަރުކާރުން ވަނީ 45 އަހަރުގެ މެދުކެނޑުމަކަށްފަހު 2023 ވަނަ އަހަރު ބަންގްލަދޭޝްގެ ވެރިރަށް ޑާކާގައި އެގައުމުގެ އެމްބަސީ އަލުން ހުޅުވާފައެވެ. މިއީ ކުޅިވަރުގެ ޒަރީއާއިން ދެ ގައުމެއްގެ ރައްޔިތުންގެ މެދުގައި އޮންނަ ގުޅުން ބަދަހިވެ، ސިޔާސީ ފެންވަރުގައި ގާތްގުޅުމެއް އުފެދިގެންދިޔަ ނާދިރު އަދި ރީތި މިސާލެކެވެ.
