އަހަރެންގެ އުފާވެރި ޅަފުރާގެ ދުވަސްތައް އެކީގައިހެން ބަދަލުވެގެން ދިޔައީ ސްކޫލް ދައުރުގައި އެކުވެރިންނާއެކު ސިއްރުސިއްރުން ކުރެވުނު ކުޑަކުޑަ ކަމަކުންނެވެ. އޭރު ހިތަށްއެރީ އެއީ ހަމައެކަނި މަޖަލަކަށް، އެކުވެރިންގެ ތެރޭގައި "މޮޅު" މީހަކަށް ވެލުމުގެ ނިޔަތުގައި ކުރެވޭ ކަމެއް ކަމަށެވެ. އެގޮތުން ސްކޫލްގެ ފާޚާނާތަކުގައާއި ފަޅު ގޯޅިތަކުގައި ވަގަށް ސިނގިރޭޓް ބޯން ފެށި ފެށުމަކީ އަހަރެންގެ މުޅި ޙަޔާތް އެކީ އަނދައި އަޅިއަށް ވެގެންދާނެ ނުބައި ދަތުރެއްގެ ފެށުން ކަމެއް އޭރަކު އަހަރެންގެ ޚިޔާލަކަށްވެސް ނާދެއެވެ.
ސިނގިރޭޓުގެ ވަހާއެކު ކިޔެވުމަށް އޮތް ސަމާލުކަން ކުޑަވެ، ގްރޭޑް 10 އާ ހިސާބުން އަހަރެންގެ ކިޔެވުން ނިންމާލަން މަޖުބޫރުވިއެވެ. ނަތީޖާއެއްގެ ގޮތުން، ޢާއިލާއަށް އެހީތެރިވުމުގެ ނަމުގައި އަދި އަމިއްލަ ފައިމައްޗަށް ތެދުވުމުގެ އުންމީދުގައި އަހަރެން ވަޒީފާއަށް ދިޔައީ ރިސޯޓަކަށެވެ.
ރިސޯޓު ދިރިއުޅުމުގެ ތެރެއިން ދިމާވި ބައެއް އެކުވެރިންގެ ފަރާތުން އަހަރެންގެ މިޞްރާބު މުޅިން އެހެން ދިމާއަކަށް އެނބުރުނެވެ. ސިނގިރޭޓުން ފެށުނު އާދަ، މަސްތުވާތަކެތީގެ ނުރައްކާތެރި ވަބާއަށް ބަދަލުވާން ނެގީ މަދު ދުވަސްކޮޅެކެވެ. އެކުވެރިންނާއެކު ސިއްރު ކޯޅިތަކުގައި ބައިވެރިވެ، މަސްތުގެ ދުންތަކުގެ ތެރެއަށް އަހަރެންގެ މުޅި އީމާންކަމާއި ބުއްދި ޤުރްބާން ކުރަން ފެށީމެވެ.
މަސްތުވާތަކެއްޗަށް ދެވިހިފި ވަރަކަށް، މަހުން މަހަށް ލިބޭ މުސާރައިން އެކަމަކަށް ނުފުދޭން ފެށިއެވެ. މަސްތުގެ ވަބާއިން ސިކުނޑި ބަންދުވެ، ހެޔޮނުބައި ވަކިކުރަން ނޭނގޭ ހިސާބަށް ދިއުމުން، އަހަރެންގެ އަތުން ވައްކަން ކުރެވެން ފެށިއެވެ. އެކުގައި އުޅޭ އެކުވެރިންގެ އަތުންނާއި، ރިސޯޓުގެ ތަންތަނުން ތަކެތި ވަގަށް ނަގައިގެން ވިއްކައިގެންވެސް ބެލީ ހަމައެކަނި އެންމެ ބޭނުމެކެވެ؛ އެއީ މަސްތުވާނެ އެއްޗެއް ހޯދުމެވެ.
އެވަރުންވެސް ނުފުދިގެން، މާތްވެގެންވާ އުފަން މައިންބަފައިންނަށް އޮޅުވާލައި ދޮގާއި މަކަރު ހަދަން ފެށީމެވެ. ބޭސްފަރުވާއަށާއި، ބޭނުންތަކަށް ކަމަށް ބުނެ، އެމީހުންގެ އަތުގައި ހުރި މަދު ފައިސާކޮޅު އަތުލީ އެއްވެސް ރަޙުމެއް ނެތިއެވެ. އަހަރެންގެ ލޮލުގެ ނޫރުފަދަ މައިންބަފައިންގެ ކަރުނައާއި، އެމީހުން އަހަރެންނަށް ކުރި އިތުބާރު ކުދިކުދިކޮށްލީ އަހަރެންގެ އަމިއްލަ އަތުންނެވެ.
އޭގެ ފަހުން ޒަވާޖީ ހަޔާތެއް ފަށައި، ލޯބިލޯބި ދަރިފުޅަކު ލިބުނު ނަމަވެސް، އަހަރެންގެ ހިތުގައި ވަނީ އެ ދަރިފުޅަށްވުރެ ބޮޑަށް މަސްތުވާތަކެތީގެ ލޯތްބެވެ. ދަރިފުޅަށް ދޭންޖެހޭ އަޅާލުމާއި އޯގާތެރިކަން ނުދެވި، ދެވަނަ ކުއްޖަކު ލިބުނުއިރުވެސް އަހަރެން އުޅުނީ އެ މުޑުދާރު ދިރިއުޅުމުގެ ތެރޭގައެވެ. އިންސާނިއްޔަތުކަމުގެ ކަންފުޅެއްވެސް އަހަރެންގެ ކިބައިގާ ނެތުމުގެ ނަތީޖާއަކަށްވީ، އަހަރެންގެ ކެތްތެރި އަނބިމީހާ ވަރިކޮށް، އަމިއްލަ އާއިލާ ރޫޅާލައި، މުޅި ދިރިއުޅުން އަނދަވަޅަކަށް ވައްޓާލުމެވެ.
އެކަންކަމުގެ ނަތީޖާއެއްގެ ގޮތުން ރިސޯޓުގެ ވަޒީފާވެސް ގެއްލި، އަނބުރާ ރަށަށް ބަދަލުވާންޖެހުނެވެ. އިތުބާރު ގެއްލިފައިވާތީ، ރަށުން ވަޒީފާއެއް ދޭނެ ހެޔޮލަފާ އިންސާނަކުވެސް ނުވިއެވެ. ދުވާލުގެ އަލިކަމުގައި މަގުމަތީގައި ގިނަވެ، މީހުންގެ މަލާމާތާއި ފުރައްސާރައިގެ އަމާޒަކަށް އަހަރެން ވިއެވެ.
މިއަދު އަހަރެންގެ ދިރިއުޅުމަކީ މީހުންގެ ގޯތިގޭގައި ބުރަ މަސައްކަތްކޮށްދީގެން، ދުވާލަކު ލިބޭ މަދު ލާރިކޮޅު ހޯދުމެވެ. ނަމަވެސް އެ ފައިސާކޮޅުވެސް ބޭނުންކުރެވެނީ ބަނޑުހައިހޫނުކަން ފިލުވާކަށެއް ނޫނެވެ. އަމިއްލަ ނަފްސުގެ މައްޗަށް އެއްވެސް ބާރެއް ނެތި، އަނެއްކާވެސް އެ މަދު ފައިސާކޮޅުން މަސްތުވާތަކެތި ގަނެގެން ބޭނުންކުރަން އަހަރެންނަށް ވަނީ މަޖުބޫރުވެފައެވެ.
މަސްތުވުމުގެ ފުރުޞަތު ކުޑަހިނދުކޮޅަކަށްވެސް ނުލިބިއްޖެނަމަ، މުޅި ހަށިގަނޑުގައި އަޅާ ވޭނާއި، ސިކުނޑިއަށް ބާރުބޮޑުވެ އުނދަގޫވާ ވަރުން ދިރިހުރުންވެސް ނިމުމަކަށް އަންނަ ފަދަ އިޙްސާސެއް ކުރެވެއެވެ. ގަޔަށް ކެތްނުކުރެވިގެން ތޅެފޮޅެންޖެހޭ ކޮންމެ ދަނޑިވަޅަކީ އަހަރެންގެ ނަރަކައެކެވެ.
މިއަދު އަހަރެން ބޭނުންވަނީ މި ނުބައި، މުޑުދާރު އަނދަވަޅުން ސަލާމަތްވާށެވެ. އަލުން އެނބުރާ އިންސާނެއްގެ ގޮތުގައި މުޖުތަމަޢަށް ނުކުމެ، އަހަރެންގެ ދަރިންނަށް ބަފައެއްގެ ލޯބި ދޭން އަހަރެން އިންތިހާއަށް ބޭނުންވެއެވެ. މި އަނދިރި ދިރިއުޅުމުން އަލިކަމުގެ ތެރެއަށް ނުކުތުމަށް އަހަރެންގެ ހިތް އެދި ގޮވަނީއެވެ.
އަހަރެންގެ މި ހިތާމަވެރި ވާހަކައިން ތިޔައިން ކޮންމެ ކުއްޖަކަށާއި ޒުވާނަކަށް އަހަރެން ދޭން އޮތް އިލްތިމާސަކީ، މިއީ އެއްވެސް ހާލެއްގައި ގާތްވާން ހެޔޮވާވަރުގެ އެއްޗެއް ނޫންކަމެވެ. މަޖަލަކަށް ނުވަތަ ތަޖުރިބާއަކަށްވެސް މި މަގުން އެކަކުވެސް ނުހިންގާށެވެ. އެންމެ ސިނގިރޭޓަކުން ފެށޭ ކަމެއްގެ ނަތީޖާއަކީ ތިބާގެ މުޅި ދިރިއުޅުމާއި، ޢާއިލާއާއި، އުންމީދުތައް އަނދައި އަޅިއަށް ވެގެންދިއުމެވެ. އަހަރެންގެ ޙަޔާތުން ޢިބުރަތް ޙާޞިލްކުރާށެވެ!
ކޮމެންޓް (0)
ލޯޑް ކުރަމުން...