ދޮގު މަޢުލޫމާތާއި މުޖުތަމަޢުގައި ފިތުނަފަސާދަ އުފެދޭ ފަދަ ކަންކަމުން އެއްކިބާވެ، ޤައުމީ މަޞްލަޙަތު އިސްކޮށްގެން ޚަބަރު ފެތުރުމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) އިން ހުރިހާ މީޑިއާތަކަށް އިލްތިމާސްކޮށްފިއެވެ.
ރާއްޖޭގެ ބްރޯޑްކާސްޓިންގ ދުވަހުގެ މުނާސަބަތުގައި އެ ކޮމިޝަނުން ނެރުނު ބަޔާނުގައި ބުނީ، އިސްލާމީ ރިވެތި އަޚްލާޤާއި ދިވެހި ޤައުމިއްޔަތު ދަމަހައްޓައި، ރައްޔިތުންނަށް ޞައްޙަ މަޢުލޫމާތު ފޯރުކޮށްދިނުމަކީ ބްރޯޑްކާސްޓަރުންގެ ބޮޑު ޤައުމީ ޒިންމާއެއް ކަމަށެވެ. އަދި ޤައުމުގެ އިޖުތިމާޢީ އަދި ސިޔާސީ ހޭލުންތެރިކަން އިތުރުކުރުމުގައި މީޑިއާގެ ދައުރު ވަރަށް ބޮޑުކަން ފާހަގަކުރިއެވެ.
ރާއްޖޭގައި ބްރޯޑްކާސްޓިންގ ޚިދުމަތް 1962 ގައި "މާލެ ރޭޑިއޯ" އިން ފެށިގެން އައި ދިގު ތާރީޚަށް އަލިއަޅުވާލަމުން އެމްއެމްބީސީން ބުނީ، މިއަދު ރާއްޖޭގައި 37 ބްރޯޑްކާސްޓަރުންނާއި 29 ރީބްރޯޑްކާސްޓަރުން ޚިދުމަތް ދެމުން އަންނަ ކަމަށެވެ. އަދި އައު ޤާނޫނުތަކާއެކު މީޑިއާގެ ދާއިރާއަށް ބޮޑެތި ޒަމާނީ ކުރިއެރުންތަކެއް އައިސްފައިވާ ކަމަށް ބަޔާނުގައިވެއެވެ.
މީގެއިތުރުން، ފަންނީ ގޮތުން ނޫސްވެރިން ބާރުވެރިކުރުވުމަށާއި، ދާއިރާގެ މަސައްކަތްތެރިންގެ ޙައްޤުތައް ޙިމާޔަތްކުރުމަށް ކޮމިޝަނުން އަބަދުވެސް މަސައްކަތް ކުރާނެ ކަމުގެ ޔަޤީންކަން އެމްއެމްބީސީން ވަނީ ދީފައެވެ. އަދި ޤާނޫނީ އިމުގެ ތެރެއިން މިނިވަން، ޒިންމާދާރު ނޫސްވެރިކަމެއްގެ ވެށި ޤާއިމުކުރުމަކީ މައިގަނޑު އަމާޒު ކަމަށްވެސް އެ ކޮމިޝަނުން ހާމަކުރިއެވެ.
ކޮމެންޓް (0)
ލޯޑް ކުރަމުން...