ފްލައިދުބާއީ ހާދިސާގެ ފަހަތުގައި އެއްވެސް ފަރާތެއްވާނަމަ ބޮޑުއަގެއް ދައްކަންޖެހޭނެ: ނަތަންޔާހޫ

ދުބާއީން އިސްރާއީލުގެ ޓެލް އަވީވަށް ދަތުރުކުރި ފްލައިދުބާއީ ފްލައިޓް FZ1073 ގެ ކޮކްޕިޓް ތެރޭގައި ކޯ-ޕައިލަޓް، ކެޕްޓަނަށް ހަމަލާދީ ބޯޓު ވައްޓާލަން އުޅުނު ހާދިސާގެ ފަހަތުގައި އެއްވެސް ގައުމެއް ނުވަތަ ބާރެއް ވާނަމަ އެ ބަޔަކު ބޮޑު އަގެއް ދައްކަންޖެހޭނެ ކަމަށް ބުނެ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އިންޒާރުދީފިއެވެ. ނަތަންޔާހޫގެ މި އިންޒާރު އައިސްފައިވަނީ މި ހަމަލާގެ ފަހަތުގައި ވަކި ގައުމެއް ވާކަމުގެ ސަރީހަ ދަލީލެއް ދެއްކުމެއްނެތިއެވެ.

ނަތަންޔާހޫ ނެރުނު ބަޔާނެއްގައި ބުނެފައިވަނީ، ވަގުތު ފާއިތުވަމުންދާ ވަރަކަށް ކަންކަން ސާފުވަމުންދާ ކަމަށާއި، ހަމަލާދިން ކޯ-ޕައިލަޓަކީ ހައްދުފަހަނައަޅާފައިވާ އިސްލާމީ ފިކުރުގެ ނުފޫޒު ފޯރާފައިވާ މީހެއް ކަމަށެވެ. އަދި އޭނާ މަސައްކަތްކުރީ ބޯޓުގައި ތިބި އެންމެންނާއެކު ބޯޓު ވައްޓާލުމަށް ކަމަށްވެސް ނަތަންޔާހޫ ބުނެފައިވެއެވެ. އޭނާ ބުނި ގޮތުގައި މި ހަމަލާއަކީ އެހެން ފަރާތަކުން ކުރުވި ކަމެއްތޯ އިސްރާއީލުން ދަނީ ތަހުގީގު ކުރަމުންނެވެ.

މި ހާދިސާގެ ފަހަތުގައި ވަކި ގައުމެއް ވާކަމަށް ނަތަންޔާހޫ ސީދާ ނަންގަނެފައި ނުވިނަމަވެސް، ގިނަ އަހަރުތަކެއް ވަންދެން އިސްރާއީލުން ދަނީ އެފަދަ ކަންކަމުގެ އިނގިލި އީރާނަށް ދިއްކުރަމުންނެވެ. އިސްރާއީލާއި އެމެރިކާއިން މި އަހަރުގެ ފެބްރުއަރީ މަހުވެސް އީރާނަށް ހަމަލާތަކެއް ދީފައިވެއެވެ. އެމެރިކާގެ ރައީސް ޑޮނަލްޑް ޓްރަމްޕްވެސް ވަނީ މި ކަމުގައި އީރާނުގެ ބައިވެރިވުމެއް އޮތްކަމުގެ އަޑުތައް އިވޭ ކަމަށާއި، އެކަން ސާބިތުވެއްޖެނަމަ އީރާނަށް ވަރުގަދަ ހަމަލާތަކެއް އަމާޒުވާނެ ކަމަށް ވިދާޅުވެފައެވެ.

އިސްރާއީލާއި އެމެރިކާއިން 1979 ވަނަ އަހަރުގެ އިސްލާމީ އިންގިލާބަށްފަހު އީރާނާ ގުޅުވައިގެން ތަފާތު ހަމަލާތަކުގެ ތުހުމަތު ކުރިނަމަވެސް، ފްލައިޓް ފޭރުމާއި ބޯޓު ވައްޓާލުމުގެ ހާދިސާތަކަކީ ތާރީޚީ ގޮތުން އަލްގާއިދާ ނުވަތަ ޕީއެފްއެލްޕީ ފަދަ ޖަމާޢަތްތަކުން ހިންގާފައިވާ ބާވަތުގެ ކަންކަމެވެ.

ނަތަންޔާހޫ ކުރިން ބުނެފައިވާ ގޮތުގައި ހަމަލާދިން ކޯ-ޕައިލަޓަކީ އޮމާންގެ ރައްޔިތެކެވެ. އަދި އޭނާއަށް ނަފްސާނީ މައްސަލަތަކެއް ކުރިމަތިވެފައި ހުރެދާނެ ކަމުގެ ފުރުސަތުވެސް ކުރިން އޮތީ ހުޅުވާލެވިފައެވެ. ނަމަވެސް ފަހުން އޮމާނުން އެ މީހާއަކީ ހައްދުފަހަނައަޅާފައިވާ ފިކުރުގެ މީހެއްކަމަށް ބުނެ ފްލައިޓް ދުއްވުން މަނާކޮށްފައިވާކަން ވަނީ ހާމަވެފައެވެ.

މި ހާދިސާ ހިނގާފައިވަނީ ފްލައިދުބާއީގެ ބޯޓު 33,000 ފޫޓު މަތިން ދަތުރުކުރަނިކޮށެވެ. ކޯ-ޕައިލަޓް ވަނީ އިންޑިއާގެ ކެޕްޓަން ސްމިތު މައްޗާރަށް ތޫނުއެއްޗަކުން ހަމަލާދީ ޒަޚަމްކޮށްލުމަށްފަހު ބޯޓު ތިރިއަށް މިސްރާބުޖަހައި، ކުޑަ ވަގުތުކޮޅެއްގެ ތެރޭގައި 17,000 ފޫޓަށް ބޯޓު ވައްޓާލާފައެވެ. ނަމަވެސް، ޒަޚަމްވެފައި ހުރި ކެޕްޓަން ވަނީ ހިއްވަރުކޮށް ކޮކްޕިޓް ދޮރު ހުޅުވައި، ބޯޓުގައި ތިބި އޮފިޝަލުންނާއި ފަސިންޖަރުންނަށް އެތެރެއަށް ވަނުމުގެ ފުރުސަތު ދީފައެވެ.

ފަސިންޖަރުންނާއި ކްރޫއިން ކޮކްޕިޓަށް ވަދެ ހަމަލާދިން ކޯ-ޕައިލަޓް ކޮންޓްރޯލްކޮށް ބަންދުކުރިއެވެ. އަދި ބޯޓުގައި ތިބި އޮފް-ޑިއުޓީ އެހެން ޕައިލެޓުންގެ އެހީތެރިކަމާއެކު، ބޯޓު ވަނީ ސައުދީ އަރަބިއްޔާގެ ތަބޫކް އެއާޕޯޓަށް ކުއްލި ހާލަތުގައި ރައްކާތެރިކަމާއެކު ޖައްސާފައެވެ. މިއާއެކު ބޯޓުގައި ތިބި 180 ފަސިންޖަރުންގެ ފުރާނަ ވަނީ ސަލާމަތްވެފައެވެ.