ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރުކަމުގެ މަގާމަށް ހ. މީނާޒް، ޝަމްއޫން ހަމީދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އައްޔަންކުރައްވައިފިއެވެ.
ރައީސް އޮފީހުގައި މިއަދު ހެނދުނު ބޭއްވި ހާއްސަ ރަސްމިއްޔާތެއްގައި ޝަމްއޫން ހަމީދަށް މަގާމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ. އަދި އެ މަނިކުފާނު ވަނީ މަގާމަށް އައްޔަން ކުރެއްވި ކަމުގެ ލިޔުން ޝަމްއޫން ހަމީދާ ހަވާލުކުރައްވައިފައެވެ.
މި މަގާމާ ހަވާލުވެވަޑައިގަތުމުގެ ކުރިން ޝަމްއޫން ހަމީދު ހުންނެވީ މިނިސްޓްރީ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖްގެ ޕާމެނެންޓް ސެކްރެޓަރީގެ މަގާމުގައެވެ. އޭގެ ކުރިން 2010 އިން 2012 އަށް އެޗްއާރްސީއެމްގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުކަމާއި، 2012 އިން 2016 އަށް އެ ކޮމިޝަނުގެ ސެކްރެޓަރީ ޖެނެރަލްގެ މަގާމު ވެސް އެމަނިކުފާނު ފުރުއްވާފައިވެއެވެ.
އަދި ކޮމިޝަނުގެ ފަރާތުން ޔުނިވާސަލް ޕީރިއަޑިކް ރިވިއު (ޔޫޕީއާރް) ރިޕޯޓު ކުރުމުގައި ފޯކަލް ޕޮއިންޓެއްގެ ގޮތުން މަސައްކަތް ކުރެއްވުމުގެ އިތުރުން، ނުކުޅެދުންތެރިކަން ހުންނަ ކުދިންނަށް ތައުލީމު ހާސިލުކުރުމަށް ހުރި ފުރުސަތުތަކާއި ކުޑަކުދިންގެ ހައްގުތައް ރައްކާތެރިކުރުމާ ގުޅޭގޮތުން ހިންގުނު ގައުމީ ފެންވަރުގެ ދިރާސާތަކުގައި ވެސް އެމަނިކުފާނު ވަނީ މުހިންމު ދައުރެއް އަދާކުރައްވާފައެވެ.
ކޮމެންޓް (0)
ލޯޑް ކުރަމުން...