އޮޅުވާލައިގެން ވެހިކަލް ރަޖިސްޓްރީކުރި މައްސަލަ ބަލައި ފިޔަވަޅު އަޅާނަން: މިނިސްޓަރު ސަޢީދު

މާލެ ސަރަހައްދުގައި ގަވާއިދާ ހިލާފަށް އަދި އޮޅުވާލައިގެން ރަޖިސްޓްރީކޮށްފައިވާ އުޅަނދުތަކުގެ މައްސަލަ ސީރިއަސް މައްސަލައެއްގެ ގޮތުގައި ބަލައި ފިޔަވަޅު އަޅާނެ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެ އެވެ.

ރައީސް އޮފީހާއި ޕީއެސްއެމް ގުޅިގެން ބޭއްވި "އަހާ" ފޯރަމުގައި ވާހަކަދައްކަވަމުން ވަޒީރު ވިދާޅުވީ، ވުޒާރާގެ ސިސްޓަމްގެ ތެރެއިން އެއް ގަރާޖަކަށް އެތައް އުޅަނދެއް ނަހަމަ ގޮތުގައި ރަޖިސްޓްރީކޮށްފައިވާކަން ފާހަގަކުރެވިފައިވާ ކަމަށެވެ. އަދި މި މައްސަލަ ތަހުގީގުކުރުމަށް ހާއްސަ ޓީމެއް އެކުލަވާލައި، ފުލުހުންނާއި މިނިވަން މުއައްސަސާތަކާ ގުޅިގެން މިހާރު މަސައްކަތް ފަށާފައިވާ ކަމަށް އެމަނިކުފާނު ވިދާޅުވި އެވެ.

މާލެ ސަރަހައްދުގައި 14،911 ކާރާއި 115،895 ސައިކަލާއެކު ޖުމްލަ 130،806 އުޅަނދު ރަޖިސްޓްރީކޮށްފައިވާއިރު، މާލޭގެ ޖާގައިގެ ދަތިކަމަށް ހައްލެއް ހޯދުމަށް މާލެއަކީ ވެހިކަލް ރަޖިސްޓްރޭޝަން ކޮންޓްރޯލް ކުރެވިފައިވާ ޒޯނަކަށް ހަދަން ޖެހިފައިވާ ކަމަށް ސައީދު ފާހަގަކުރެއްވި އެވެ. އެގޮތުން މާލެ ސަރަހައްދުގެ ދަތުރުފަތުރު ހަރުދަނާ ކުރުމަށްޓަކައި ހާއްސަ މިނިވަން އޮފީހެއް އުފައްދައި އަމަލީ މަސައްކަތް މިހާރު ވަނީ ފަށާފަ އެވެ.

މަގުމަތީގެ ތޮއްޖެހުން ކުޑަކުރުމަށް އަޅާ ފިޔަވަޅުތަކުގެ ތެރޭގައި، ބާރުބޮޑުވާ ވަގުތުތަކަށް ހާއްސަކޮށްގެން ހުޅުމާލޭގެ ދެ ފިޔަވަހިން މާލެއަށް ދަތުރުކުރާނެ އިތުރު ބަސްތަކާއި ސްކޫލް ކުދިންނަށް ހާއްސަ ބަހުގެ ހިދުމަތް ތައާރަފްކުރުން ހިމެނެ އެވެ. މީގެއިތުރުން، މާލޭގެ ވަށައިގެންވާ ރިންގް ރޯޑުގެ މަސައްކަތްތައް ނިމުމަކާ ގާތްވެފައިވާކަން ވެސް ވަޒީރު ހާމަކުރެއްވި އެވެ.

މި ހުރިހާ މަސައްކަތްތަކާއެކު އަމިއްލަ އުޅަނދުތަކުގެ ބަދަލުގައި އާންމު ދަތުރުފަތުރަށް ބަރޯސާވާ މިންވަރު އިތުރުކުރެވި، ކުރިއަށް އޮތް ތިން އަހަރުގެ ތެރޭގައި މާލޭގެ ޓްރެފިކް ތޮއްޖެހުމަށް ދާއިމީ އަދި އެދެވޭ ބޮޑު ހައްލެއް ލިބިގެންދާނެ ކަމަށް ވަޒީރު ސައީދު ވިދާޅުވި އެވެ.