މަގުމަތީގައި އުޅޭ ބުޅަލުގެ އާބާދީ އިންސާނީ އުސޫލުތަކުގެ ތެރެއިން ކޮންޓްރޯލްކޮށް، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމާއެކު ބުޅަލާ މެދު މުޖުތަމައުގައި އޯގާތެރިކަން އަށަގަންނުވުމުގެ މަގުސަދުގައި "ޕްރޮޖެކްޓް ބައުކާލޯ" ގެ ނަމުގައި ގައުމީ ފެންވަރުގެ ހާއްސަ މަޝްރޫއެއް މިއަދު އިފްތިތާހުކޮށްފިއެވެ.
އެއް އަހަރު ދުވަހުގެ މުއްދަތަށް ކުރިއަށްގެންދިއުމަށް ހަމަޖެހިފައިވާ މި މަޝްރޫއު ހުޅުމާލޭގައި ބޭއްވި ހާއްސަ ރަސްމިޔާތެއްގައި އިފްތިތާހުކޮށްދެއްވީ ފިޝަރީޒް މިނިސްޓަރު އަހުމަދު ޝިޔާމް އެވެ. މި މަޝްރޫއަކީ ފިޝަރީޒް މިނިސްޓްރީއާއި، އެޗްޑީސީ، ބުޅަލުގެ ހިމާޔަތުގައި ހަރަކާތްތެރިވާ ޖަމިއްޔާތައް އަދި ވެޓެރިނަރީ ކްލިނިކްތައް ގުޅިގެން ކުރިއަށްގެންދާ ހަރަކާތެކެވެ.
މި ރަސްމިޔާތުގައި ވާހަކަފުޅު ދައްކަވަމުން މިނިސްޓަރު ޝިޔާމް ވިދާޅުވީ، މި މަޝްރޫއުގެ ސަބަބުން ބުޅަލާމެދު މުޖުތަމައު ދެކޭގޮތަށް ބޮޑު ބަދަލެއް އަންނާނެ ކަމަށް އުންމީދު ކުރައްވާ ކަމަށެވެ. އަދި ސަރުކާރުން ގާއިމުކޮށްފައިވާ ބުޅާ ފެސިލިޓީ "އޮޅުހިޔާ" ގެ މަސައްކަތްތައް އިތުރަށް ހަރުދަނާކޮށް ރަނގަޅުކުރުމަށްޓަކައި ވެސް މިއީ އެޅިގެންދިޔަ މުހިންމު ފިޔަވަޅެއްކަން މިނިސްޓަރު ފާހަގަކުރެއްވިއެވެ.
މި މަޝްރޫއުގެ ދަށުން "ޓްރެޕް-ނިއުޓާ-ރިޓާން" (ޓީއެންއާރު) އުސޫލުން ބުޅާ ދަރިމައިވުން ހުއްޓުވުމުގެ މަސައްކަތްތައް ކުރިއަށްދާނެއެވެ. އޭގެ އިތުރުން ބުޅަލަށް ބޭނުންވާ ބޭސްފަރުވާގެ ހިދުމަތް ދިނުމާއި، ޒިންމާދާރުކަމާއެކު ކާނާ ދިނުމަށް ބާރުއެޅުމުގެ އިތުރުން ބުޅާ އެޑޮޕްޓްކުރުމާއި އާންމުން ހޭލުންތެރިކުރުވުމުގެ އެކި ހަރަކާތްތައް ކުރިއަށްގެންދިއުމަށް ވަނީ ރޭވިފައެވެ.
މާލެ ސަރަހައްދުގެ މަގުތަކުގައި ބުޅާ ގިނަވެ، ސާފުތާހިރުކަމުގެ މައްސަލަތައް ބޮޑުވުމުގެ ކަންބޮޑުވުން އާންމުންގެ ތެރޭގައި އޮތްއިރު، މީގެ ކުރިން ހުޅުމާލޭގައި ގާއިމުކުރި ފެސިލިޓީގެ މަސައްކަތްތައް އެކަށީގެންވާ ގޮތެއްގައި ނުހިންގެުމުގެ ސަބަބުން މައްސަލައަށް އެދެވޭ ހައްލެއް ލިބިފައެއް ނުވެއެވެ. ސަރުކާރުން މިހާރު ދަނީ މި މައްސަލައަށް ދާއިމީ ހައްލެއް ހޯދުމުގެ ގޮތުން "ބުޅާ ރަށެއް" ތަރައްގީކުރުމުގެ މަޝްވަރާތައްވެސް ކުރަމުންނެވެ.
ކޮމެންޓް (0)
ލޯޑް ކުރަމުން...