ފްލައިދުބާއީގެ ބޯޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމަށް ބުނާ މައްސަލައެއްގެ ތުހުމަތުގައި، އެ އެއާލައިންގައި މަސައްކަތްކުރާ ދެ ދިވެއްސަކު ޔޫނައިޓެޑް އަރަބް އެމިރޭޓްސް (ޔޫއޭއީ) އިން ވަނީ ހައްޔަރުކޮށްފައެވެ.
ސަރުކާރުގެ ތަރުޖަމާނު މުޙައްމަދު ހުސައިން ޝަރީފް (މުންދު) ވަނީ އެ ދެ ދިވެހިން ދުބާއީން ހައްޔަރުކުރިކަން ކަށަވަރުކޮށްދެއްވާފައެވެ. އަދި އެއީ ފްލައިދުބާއީއާ ވަރަށް ފަހުން ގުޅުނު ދެ މުވައްޒަފުން ކަންވެސް އޭނާ ފާހަގަކުރެއްވިއެވެ.
ނަމަވެސް، އެ ދެ މީހުންނާއި ފްލައިޓް ވައްޓާލަން އުޅުނު މައްސަލައާ ސީދާ ގުޅުމެއް އޮތްކަން ނުވަތަ އެ މީހުން ހައްޔަރުކުރީ ކޮން ތުހުމަތެއްގައިކަން އަދި ސާފުވެފައި ނުވާ ކަމަށް ތަރުޖަމާނު ވިދާޅުވިއެވެ. ސަރުކާރުން އަންނަނީ ޔޫއޭއީގެ ކަމާބެހޭ ފަރާތްތަކާ ގުޅިގެން އެ ދިވެހިންނަށް ފޯރުކޮށްދޭންޖެހޭ އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ.
މި ހާދިސާ ހިނގާފައިވަނީ 174 ފަސިންޖަރުންނާއި 8 ކުރޫއިންނާއެކު ދުބާއީން އިސްރާއީލުގެ ތެލް އަވީވަށް ދަތުރުކުރި ފްލައިޓެއްގައެވެ. ފްލައިޓް ޓްރެކިން މައުލޫމާތުތަކުން ދައްކާ ގޮތުގައި، ބޯޓުން ފުރަތަމަ އިމަޖެންސީ ކޯޑު 7700 ފޮނުވުމަށްފަހު، ކުޑައިރުކޮޅެއްގެ ތެރޭގައި ވަނީ ހައިޖެކްކުރުން ނުވަތަ ގަވާއިދާ ޚިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވައި، ކުރު މުއްދަތެއްގެ ތެރޭގައި ބޯޓުގެ އުސްމިން ވަރަށް ބޮޑަށް ތިރިކޮށްފައެވެ.
މި މައްސަލައާ ގުޅިގެން ޔޫއޭއީގެ ކަމާބެހޭ ފަރާތްތަކުން ބުނެފައިވަނީ، މިއީ ބޯޓު ވައްޓާލަން ކޯޕައިލެޓް ދިން ހަމަލާއެއް ކަމަށާއި މިއީ ޓެރަރިޒަމްގެ އަމަލެއް ކަމަށެވެ. ނަމަވެސް އިސްރާއީލުން ބުނެފައިވަނީ ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ސަލާމަތީ ނުރައްކަލެއް އޮތް ހައިޖެކެއްގެ ސަބަބުން ނޫން ކަމަށެވެ.
ކޮމެންޓް (0)
ލޯޑް ކުރަމުން...