ޕީއެސްޖީ އަތުން ބާސެލޯނާގެ ރެކޯޑު ނިމުމަކަށް؛ ލިވަޕޫލުން ފަހަތުން އަރައި ތަފާތު މޮޅެއް!

ޔޫއެފާ ޗެމްޕިއަންސް ލީގުގެ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން 4-2 އިން ބާސެލޯނާ ބަލިކުރިއިރު، ފޯރިގަދަ ކުޅުމަކަށްފަހު ފަހަތުން އަރައި 4-3 އިން ވިޔަރެއާލް އަތުން ލިވަޕޫލް މޮޅުވެއްޖެއެވެ.

މި ނަތީޖާއާއެކު، ބާސެލޯނާއިން މި ސީޒަނުގައި ބަލިނުވެ ދަމަހައްޓަމުން އައި 11 މެޗުގެ ސިލްސިލާއަށް ވަނީ ނިމުމެއް އައިސްފައެވެ.

ޕީއެސްޖީގެ ދަނޑުގައި ކުޅުނު މެޗުގައި އެ ޓީމަށް ލީޑު ނަގައިދިނީ ފުރަތަމަ ހާފުގައި ޑެޒީރޭ ޑޫއޭއެވެ. ދެވަނަ ހާފު ފެށިގެން ޒަވީ އެސްޕާޓް ބާސެލޯނާއަށް އެއްވަރުކޮށްދީފައި ވަނިކޮށް، ލޫކަސް ހެނާންޑޭޒް އަލުން ޕީއެސްޖީއަށް ކުރިހޯދައިދިނެވެ. އޭގެ ފަހުން ލަމީން ޔަމާލް ބާސެލޯނާއަށް ދެވަނަ ފަހަރަށް ނަތީޖާ ހަމަހަމަކޮށްދިން ނަމަވެސް، ވިޓީނިއާ އަދި ފަބިއަން ރުއީޒް ޖެހި ލަނޑުތަކާއެކު ޕީއެސްޖީން ވަނީ މޮޅު ކަށަވަރުކޮށްފައެވެ.

އަނެއްކޮޅުން، އަމިއްލަ ދަނޑުގައި ކުޅުނު ލިވަޕޫލް ސިއްސުވާލުމަށްފަހު ފުރަތަމަ ހާފުގެ 29 މިނެޓު ތެރޭ ޖިއޯޖެސް މިކައުޓަޓްޒޭ އާއި ސާޖިއޯ ކާޑޯނިއާގެ ލަނޑުތަކުން ވިޔަރެއާލުން ދެ ލަނޑުގެ ލީޑެއް ނެގިއެވެ. ނަމަވެސް، އަލެކްސިސް މެކް އަލިސްޓާ އަދި ރޮނާލްޑް އަރައުހޯގެ ލަނޑުތަކުން ލިވަޕޫލުން ފުރަތަމަ ހާފު ނިމުމުގެ ކުރިން އެއްވަރުކުރިއެވެ. ދެވަނަ ހާފުގައި މެކް އަލިސްޓާގެ ދެވަނަ ލަނޑާއި ފްލޯރިއަން ވާޓްޒް ޖެހި ލަނޑުން ލިވަޕޫލް ލީޑު ނެގިއިރު، ވިޔަރެއާލްގެ ފަހު ލަނޑު ޖެހީ ޓަނީ އޮލުވަސޭޔީއެވެ.

ރޭގެ މެޗުތަކުގެ ތެރެއިން މެންޗެސްޓާ ސިޓީން ވަނީ އަމިއްލަ ދަނޑުގައި 5-1 އިން އޭއީކޭ އެތަންސްގެ މައްޗަށް ފަސޭހަ ކާމިޔާބީއެއް ހޯދާފައެވެ. މި މެޗުގައި ސިޓީގެ ފިލް ފޯޑެން ހެޓްރިކެއް ހެދިއިރު، ދެން ލަނޑު ޖެހީ އެލިއަޓް އެންޑަސަން އާއި ރަޔާން ޗާކީއެވެ. އިދިކޮޅު ޓީމުގެ ހަމައެކަނި ލަނޑު ކާމިޔާބުކުރީ ސްޓަވްރޯސް ޕިލިއޯސްއެވެ.

މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، ރޯމާއިން ވަނީ 4-0 އިން ސްލޯވަން ބްރަޓިސްލާވާ ބަލިކޮށްފައެވެ. އަދި ނަޕޯލީން 4-3 އިން ބޯޑޯ/ގިލްމްގެ މައްޗަށް ކުރިހޯދިއިރު، ޕީއެސްވީ އައިންދޯވަން ވަނީ ޕޯޓޯ އަތުން 1-0 އިން މޮޅުވެފައެވެ. މީގެއިތުރުން ސްޓުޓްގާޓާއި އެތުލެޓިކޯ މެޑްރިޑް ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.