ސައޫދީގެ ދިފާއުގައި ތުރުކީއާއި ޕާކިސްތާނު ސިފައިން ހަރަކާތްތެރިވާން ނިންމައިފި

ޔަމަނުގެ ހޫޘީން ސައޫދީ އަރަބިއްޔާއަށް ދެމުންދާ ހަމަލާތައް ވަރުގަދަވުމާ ގުޅިގެން، ސައޫދީގެ ދިފާއުގައި ތުރުކީއާއި ޕާކިސްތާނުގެ ސިފައިން އެ ގައުމަށް ފޮނުވައި، އިއްތިހާދުގެ ދިފާއީ ވަސީލަތްތައް ވަގުތުން ހަރަކާތްތެރިކުރުމަށް އެ ގައުމުތަކުން ނިންމައިފިއެވެ. މި ގޮތަށް ނިންމީ ރިޔާޟުގައި ބޭއްވި އެ ގައުމުތަކުގެ ދިފާއީ ވަޒީރުންނާއި ޚާރިޖީ ވަޒީރުންގެ ކުއްލި ބައްދަލުވުމެއްގައެވެ.

މިއީ މިއަހަރުގެ އޮގަސްޓް މަހުގެ 7 ވަނަ ދުވަހު ގާއިމުކުރި "މައްކާ އެލަޔަންސް ފޯ ޑިފެންސް" އެއްބަސްވުމުގެ ދަށުން އަމަލީ ފިޔަވަޅުތަކެއް އަޅަން ނިންމި ފުރަތަމަ ފަހަރެވެ. ނޭޓޯގެ އުސޫލުތަކާ އެއްގޮތަށް އެކުލަވާލާފައިވާ މި އެއްބަސްވުމުގައިވާ ގޮތުން އިއްތިހާދުގެ ކޮންމެ ގައުމަކަށް ދެވޭ ހަމަލާއަކީ މުޅި އިއްތިހާދަށް ދެވޭ ހަމަލާއެއްގެ ގޮތުގައި ބެލެވޭނެއެވެ.

ސައޫދީ އަރަބިއްޔާއާއި މުގައްދަސް ބިމަށް އަމާޒުކޮށް ދެމުންދާ ނުރައްކާތެރި ހަމަލާތަކާ ދެކޮޅަށް ތިން ގައުމުގެ އިއްތިހާދު ވަރުގަދަކޮށް، ރައްކާތެރިކަމުގެ ފިޔަވަޅުތައް ވަގުތުން ހަރަކާތްތެރިކުރުމަށް އެއްބަސްވެވިފައިވާ ކަމަށް ސައޫދީގެ ދިފާއީ ވަޒީރު ޚާލިދު ބިން ސަލްމާން ވަނީ ވިދާޅުވެފައެވެ.

ޕާކިސްތާނުގެ ޚާރިޖީ ވުޒާރާއިން ނެރުނު ގުޅިފައިވާ ބަޔާނެއްގައި ބުނެފައިވަނީ، އެއްބަސްވެވިފައިވާ އަސްކަރީ ބާރުތަކާއި ވަސީލަތްތައް ގައުމުތަކުގެ ގާނޫނުތަކާއި ކަނޑައެޅިފައިވާ އުސޫލުތަކުގެ ތެރެއިން އެންމެ އަވަސް މުއްދަތެއްގެ ތެރޭގައި ސައޫދީއަށް ފޮނުވައި ހަރަކާތްތެރިކުރާނެ ކަމަށެވެ.

މި ނިންމުން އައިސްފައިވަނީ ޔަމަނުގެ ސަރުކާރު ސިފައިން ހޫޘީންގެ ބާރުގެ ދަށުގައިވާ ސަރަހައްދުތައް އަތުލުމަށް ބޮޑު އަސްކަރީ ހަރަކާތެއް ފެށިތާ ކުޑަވަގުތުކޮޅެއްގެ ތެރޭގައެވެ. ސައޫދީ އިސްވެއޮތް ކޯލިޝަނުގެ 100 ޖެޓް ފައިޓަރުގެ އެހީތެރިކަމާއެކު ކުރިއަށްދިޔަ މި ހަރަކާތުގައި، ޔަމަނު ސަރުކާރުން ވަނީ ރަތްކަނޑުގެ ބަނދަރު ރަށެއް ކަމަށްވާ މުޚާއާއި ސްޓްރެޓީޖިކް ބާބު އަލްމަންދަބު ކަނޑުއޮޅީގެ ބާރު އަނބުރާ ހޯދާފައެވެ.

އޭގެ ރައްދުގައި ހޫޘީން ވަނީ ރިޔާޟުގައިވާ ކިންގް ޚާލިދު އިންޓަނޭޝަނަލް އެއާޕޯޓަށާއި ރާބިޣްގައިވާ އަރާމްކޯގެ ތެޔޮ ސާފުކުރާ ކާރުޚާނާގެ އިތުރުން އެހެން އެއާޕޯޓްތަކަށާއި އަސްކަރީ މަރުކަޒުތަކަށް ހަމަލާދީފައިވާ ކަމަށް ދައުވާކޮށްފައެވެ. ނަމަވެސް ސައޫދީ އަރަބިއްޔާއިން މިކަން ކަށަވަރުކޮށްދީފައެއް ނުވެއެވެ.

އެމެރިކާއާއި އިސްރާއީލްއިން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން ސަރަހައްދީ ހަމަނުޖެހުން ބޮޑުވުމާ ގުޅިގެން އުފެއްދި މައްކާ އިއްތިހާދަކީ ބޮޑު އަސްކަރީ ބާރެކެވެ. 2026 ވަނަ އަހަރުގެ ގްލޯބަލް ފަޔަރޕަވަރ އިންޑެކްސްއަށް ބަލާއިރު، މި އިއްތިހާދުގައި ހިމެނޭ ތިން ގައުމުގެ އެކުވެގެން 1.4 މިލިއަން އެކްޓިވް ސިފައިންނާއި، 3,400 އަސްކަރީ މަތިންދާބޯޓާއި، 6,000 ޓޭންކުގެ އިތުރުން 340 ކަނޑުގެ އަސްކަރީ އުޅަނދު ހިމެނެއެވެ.

ކުރިން ތުރުކީއާއި ޕާކިސްތާނުން ހަނގުރާމަ ހުއްޓުވުމުގެ މެދުވެރިއެއްގެ ދައުރު އަދާކުރަން މަސައްކަތް ކުރި ނަމަވެސް، ޕާކިސްތާނުގެ ދިފާއީ ވަޒީރު ޚަވާޖާ އާސިފް ވަނީ ސައޫދީ އަރަބިއްޔާއަށް ނުރައްކަލެއް އަތުވެއްޖެނަމަ މައްކާ އެއްބަސްވުމަށް އަމަލުކުރަން ފަށާނެ ކަމަށް ކުރިން ވިދާޅުވެފައެވެ.

ގަލްފް އިންޓަނޭޝަނަލް ފޯރަމްގެ ސީނިއާ ފެލޯ އަބްދުލްއަޒީޒް އަލްޣަޝިއާން ފާހަގަކުރެއްވި ގޮތުގައި، ހޫޘީންގެ ހަމަލާތަކުގެ ސަބަބުން މި އިއްތިހާދުގެ މަސައްކަތްތައް އަވަސްވެގެންދިޔައެވެ. އަދި މިއީ ސަރަހައްދީ ސަލާމަތީ އޮނިގަނޑަށް އައި ބޮޑު ބަދަލެއްގެ އިތުރުން، ސަރަހައްދީ ރައްކާތެރިކަމުގެ އާ ނިޒާމެއް ބައްޓަންވަމުންދާ ކަމުގެ ހެކިތަކެކެވެ.