ދުންފަތް ކޮންޓްރޯލްކުރުމަށް ޤާނޫނަށް ގެންނަ އިޞްލާޙުތަކާއި، އިންޓަނެޓާއި ޑިޖިޓަލް ވެށީގައި ކުދިންގެ ރައްކާތެރިކަން ކަށަވަރުކުރުމަށް އަޅަމުންދާ ފިޔަވަޅުތަކަކީ، ކުޑަކުދިންގެ ދުޅަހެޔޮކަމަށް ކުރިމަތިވާ ޒަމާނީ ގޮންޖެހުންތަކުން އެކުދިން ސަލާމަތްކުރުމަށް ސަރުކާރުން ޚާއްޞަ އަހައްމިއްޔަތުކަމެއް ދޭކަމުގެ ހެއްކެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ބައިނަލްއަޤްވާމީ ކުޑަކުދިންގެ ދުވަހުގެ މުނާސަބަތުގައި ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ކުޑަކުދިންގެ ޙައްޤުތައް ޙިމާޔަތްކުރުމަށާއި އެކުދިންގެ ދިރިއުޅުމާ ގުޅޭ ނިންމުންތަކުގައި އެކުދިންގެ އަޑުއެހުމަށް އަބަދުވެސް އިސްކަންދެއްވާނެ ކަމަށެވެ. މީގެއިތުރުން އަނިޔާއިން ރައްކާތެރިކުރުމާއި، ޢާއިލީ ވެއްޓެއްގައި ބޮޑުވުމުގެ ފުރުޞަތު ފަހިކޮށްދިނުމާއި، ޞިއްޙީ، ތަޢުލީމީ، ތެރަޕީ އަދި ރިހެބިލިޓޭޝަންގެ ޚިދުމަތްތައް ހަރުދަނާކަމާއެކު ސަރުކާރުން ތަންފީޛުކުރަމުންދާކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާ އިތުރަށް ބަޔާންކުރެއްވި ގޮތުގައި، ކުޑަކުދިންނަށް ޙަޤީޤީ ކުރިއެރުން ލިބޭނީ ހަމައެކަނި އެކުދިންނަށް ޚާއްޞަކޮށް ސިޔާސަތުތައް އެކުލަވާލައިގެން ނޫނެވެ. އޭގެ ބަދަލުގައި، އެކުދިންގެ ތަޖުރިބާތަކާއި ޚިޔާލުތަކަށް އިޙްތިރާމްކޮށް، މުސްތަޤްބަލު ބިނާކުރުމުގައި އެކުދިން ބާރުވެރިކުރުވުމަކީ ކޮންމެހެން މުހިންމު ކަމެއް ކަމަށް ވިދާޅުވެ، ހުރިހާ ދިވެހި ރައްޔިތުންވެސް ކުޑަކުދިންނަށް އުޖާލާ މުސްތަޤްބަލެއް ހޯދައިދިނުމުގައި އެއްބާރުލުން ދެއްވުމަށް ރައީސް އެދިވަޑައިގެންނެވިއެވެ.
ފަސްމަންޒަރަށް ބަލާއިރު، ވޭޕްކުރުމާއި ދުންފަތުގެ އިސްތިޢުމާލުކުރުން ޒުވާނުންނާއި ސްކޫލް ކުދިންގެ މެދުގައި ފެތުރުން ހުއްޓުވުމަށް ސަރުކާރުން ވަނީ ހަރުކަށި ފިޔަވަޅުތަކެއް އަޅަން ފަށާފައެވެ. ހަމައެއާއެކު، އިންޓަނެޓުގެ ޒަރީޢާއިން ކުރިމަތިވާ ސައިބަރ ބުލީއިންގ އަދި ނޭދެވޭ ކަންކަމުން ކުޑަކުދިން ރައްކާތެރިކުރުމަށްޓަކައި ޤާނޫނީ އަދި އިޖުތިމާޢީ ގޮތުން ހަރުދަނާ ނިޒާމުތަކެއް އެކުލަވާލުމުގެ މަސައްކަތް ސަރުކާރުން އަންނަނީ އިސްކަންދީގެން ކުރަމުންނެވެ.
ކޮމެންޓް (0)
ލޯޑް ކުރަމުން...