ގޯލް މެޝިން: އާލިންގް ހާލަންޑްގެ ކާމިޔާބު ދަތުރު

ނޯވޭއަށް އުފަން އާލިންގް ހާލަންޑަކީ އޭނާގެ ވަރުގަދަ ހަށިގަނޑާއި ލަނޑު ޖެހުމުގެ އާދަޔާ ހިލާފު ހުނަރުގެ ސަބަބުން މިހާރު ދުނިޔޭގައި ހުރި އެންމެ މޮޅު އެއް ސްޓްރައިކަރެވެ. އޭނާގެ ބައްޕަ އަލްފް-އިންގް ހާލަންޑް އިނގިރޭސި ކުލަބުތަކަށް ކުޅުނު ދުވަސްވަރު، އިންގްލެންޑްގެ ލީޑްސްއަށް 21 ޖުލައި 2000 ގައި އުފަންވި ހާލަންޑްގެ އުމުރަކީ މިހާރު 25 އަހަރެވެ.

ބައިނަލްއަގުވާމީ މައިދާނުގައި ނޯވޭ ތަމްސީލުކުރާ މި ކުޅުންތެރިޔާގެ ހަށިގަނޑުގެ ވަރުގަދަކަމަށް ބަލާއިރު، އޭނާގެ އިސްކޮޅުގައި 1.95 މީޓަރު (6 ފޫޓު 5 އިންޗި) ހުންނައިރު ބަރުދަނަކީ 94 ކިލޯގްރާމް (205 ޕައުންޑް) އެވެ.

ހާލަންޑްގެ ތައުލީމީ ޙަޔާތަށް ބަލާއިރު، އޭނާ ޕްރީސްކޫލް ދައުރާއި ސާނަވީ ތައުލީމު ފުރިހަމަކުރީ އުމުރުން އެންމެ ތިން އަހަރުގައި އާއިލާއާއެކު ބަދަލުވި ނޯވޭގެ ކުޑަ ރަށެއް ކަމަށްވާ ބްރައިންގައެވެ. އޭނާ ސްކޫލް ދައުރުގައި ކިޔެވުމުގެ ކަންކަން ކުރިއަށް ގެންދިޔައީ ފުޓްބޯޅައަށް އޮތް ލޯތްބާއި ޝައުގުވެރިކަމާ އެކުގައެވެ. ނަމަވެސް، އުމުރުން އެންމެ 15 އަހަރުގައި ޕްރޮފެޝަނަލް ފުޓްބޯޅަ ކެރިއަރު ފެށި، ކުޅިވަރުގެ މައިދާނުގައި ބޮޑު ކުރިއެރުމެއް ހޯދަމުންދިއުމުގެ ސަބަބުން އޭނާ ޔުނިވަރސިޓީ ތައުލީމެއް ހާސިލެއް ނުކުރެއެވެ. ޒުވާން އުމުރުގައި ކިޔެވުމަށްވުރެ ބޮޑަށް އޭނާ އިސްކަންދިނީ ފުޓްބޯޅަ އެކަޑެމީތަކުން ކުރިއަށް ގޮސް ދުނިޔޭގެ ފެންވަރުގެ ކުޅުންތެރިއަކަށް ވުމަށެވެ.

މިހާރު އިނގިރޭސިވިލާތުގެ މަޝްހޫރު މެންޗެސްޓަރ ސިޓީއަށް 9 ނަންބަރު ޖަރސީގައި ކުޅެމުންދާ މި ސެންޓަރ-ފޯވާޑަކީ އޭނާގެ ވާތްފަޅި ފައިން ފޮނުވާލާ ބާރުގަދަ ހަމަލާތަކުން އިދިކޮޅު ޓީމުތަކުގެ ގޯލްތަކަށް ނުރައްކާކުރާ ކުޅުންތެރިއެކެވެ. މެންޗެސްޓަރ ސިޓީއާ ގުޅުމަށްފަހު އޭނާ ވަނީ ފުޓްބޯޅަ ދުނިޔެ ސިއްސުވާލާފަދަ ގިނަ ކާމިޔާބީތަކެއް ހޯދާފައެވެ. އެގޮތުން އެ ކުލަބާއެކު ހޭދަކުރި ފުރަތަމަ ސީޒަނުގައި ޕްރިމިއަރ ލީގާއި، އެފްއޭ ކަޕްގެ އިތުރުން ޗެމްޕިއަންސް ލީގު ކާމިޔާބުކޮށް ތާރީޚީ ‘ޓްރެބަލް’ އެއް އޭނާ ވަނީ ފުރިހަމަކޮށްފައެވެ.

ހާލަންޑްގެ އަމިއްލަ ދިރިއުޅުމާއި ޒަވާޖީ ހަޔާތަށް ބަލާއިރު، އޭނާ ރަސްމީކޮށް ކައިވެންޏެއް ނުކުރި ނަމަވެސް، އޭނާ އުޅެނީ އޭނާގެ ޒަމާންވީ ލޯބިވެރިޔާ އިސަބެލް ހައުގްސެންގް ޖޯހަންސަން އާއެކުގައެވެ. ބްރައިންގްގައި އުޅުނު ޓީންއޭޖް ދުވަސްވަރުން ފެށިގެން ދެމީހުން ދަންނަ އިރު، އިސަބެލްއަކީ ވެސް ކުރިން ފުޓްބޯޅަ ކުޅުނު ކުޅުންތެރިއެކެވެ. މި ދެލޯބިވެރިންނަށް ވަނީ ޑިސެމްބަރު 2024 ގައި ފިރިހެން ކުއްޖަކު ލިބިފައެވެ. ދަރިއަކު ލިބުމުން އޭނާގެ ދިރިއުޅުމަށް ބޮޑު ބަދަލެއް އައިސް، ފުޓްބޯޅައިގެ ޕްރެޝަރުން ދުރުވެ، އާއިލާއަށް ވަގުތުދީ ހަމަޖެހިލުމަށް އެހީތެރިވެދޭ ކަމަށް ހާލަންޑް ބުނެފައިވެއެވެ

ހާލަންޑްގެ ކެރިއަރު ފެނިގެންދަނީ ރެކޯޑުތަކުން ފުރިގެންވާ ދަތުރެއްގެ ގޮތުގައެވެ. އޭނާ ވަނީ އިނގިރޭސި ޕްރިމިއަރ ލީގުގެ އެއް ސީޒަނެއްގައި އެންމެ ގިނަ ލަނޑު ޖެހުމުގެ ޝަރަފްވެރި ރެކޯޑު މުގުރާލާފައެވެ. މީގެއިތުރުން ޔޫއެފްއޭ ޗެމްޕިއަންސް ލީގުގެ ތާރީޚުގައި އެންމެ އަވަހަށް އަދި އެންމެ ޒުވާން އުމުރެއްގައި 30 އަދި 40 ލަނޑު ހަމަކުރި ކުޅުންތެރިޔާގެ ޝަރަފްވެސް އޮތީ މި ޒުވާން ސްޓްރައިކަރުގެ އަތުގައެވެ.