ސިވިލް ސާވިސްގެ މުވައްޒަފުންނަކީ ދައުލަތުގެ އެންމެ މުހިންމު އެއް ތަނބެވެ. ދައުލަތުގެ އިދާރާތަކުން ރައްޔިތުންނަށް ޚިދުމަތް ދިނުމުގައި އެންމެ އިސް ސަފުގައި ތިއްބަވާ މި މުވައްޒަފުންނަކީ އަޚުލާގީ ގޮތުންނާއި، ސިފަޔާއި، ހެދުން އެޅުމުގައިވެސް މުޅި މުޖުތަމައަށް ނަމޫނާއަކަށް ވާންޖެހޭނެ ބައެކެވެ. ދާދިފަހުން ސިވިލް ސާވިސް މުވައްޒަފުން ހެދުން އެޅުމުގެ ގަވާއިދަށް ގެނެވުނު އިސްލާހުތަކަކީ، ސައްތައިން ސައްތަ މުސްލިމު ގައުމެއްގެ ހައިސިއްޔަތުންނާއި، ދިވެހިރާއްޖޭގެ ގާނޫނުއަސާސީގެ ރޫހާ އެއްގޮތަށް ގެނެވުނު މުހިންމު އަދި އެހާމެ ބޭނުންތެރި ބަދަލުތަކެކެވެ. މި ބަދަލުތަކަކީ ވަޒީފާގެ މާހައުލުގައި ހުރުމަތްތެރިކަމާއި، ސީރިއަސްކަން އިތުރުކޮށްދޭނެ ކަންކަމެވެ.
އައު ގަވާއިދުގައި ފިރިހެން މުވައްޒަފުން ރަސްމީ ގަޑީގައި އަތްދިގު ނުވަތަ އަތްކުރު ގަމީސް ދަށަށް ޖަހައި، ޓައީ އެޅުމަށް ވަނީ ކަނޑައަޅާފައެވެ. އަދި ޓައީގައި ބޭނުންކުރާ ކުރެހުންތަކާއި ފޮޓޯތަކަކީ އަޚުލާގީ މިންގަނޑަށް ފެތޭ އެއްޗެއްކަން ކަށަވަރުކުރުމަކީ، ސަރުކާރުގެ އޮފީސްތަކުގެ ހައިބަތު ދެމެހެއްޓުމަށް އެޅުނު މުހިންމު ފިޔަވަޅެކެވެ. މީގެ އިތުރުން، ފިރިހެނުން މޭކަޕް ކުރުމާއި، އިނގިލީގައި އަޅާ އަނގޮޓި ފިޔަވައި އެހެން ގަހަނާ ބޭނުންކުރުން މަނާކުރުމަކީ، ފިރިހެންވަންތަކަމާއި އިސްލާމީ ތަރުބިއްޔަތާ އެއްގޮތަށް ތަރުތީބު ކުރެވިފައިވާ ކަންކަމެވެ. މިއީ ވަޒީފާގެ މާހައުލުގައި އޮންނަންޖެހޭ ރަސްމީ ސިފަ ގެނައުމަށް މަގުފަހިވާނެ ކަމެކެވެ.
އަންހެން މުވައްޒަފުންގެ ހެދުން އެޅުމަށް ގެނެވުނު ބަދަލުތަކަކީ އިސްލާމްދީނުގައި އަންގަވާފައިވާ ނިވާކަން ބޮޑު، ހުތުރުކަން ކުޑަ ގޮތްތަކަށް ބާރުއަޅާ ކަންކަމެވެ. ހެދުމުގެ ކަރުވަޅާއި އަތުގެ ދިގުމިން ވަކި މިންގަނޑެއްގައި ހިފެހެއްޓުމާއި، ހަށިގަނޑުގެ ބައްޓަން ނުފެންނާނެހެން ބުޑު ނިވާވާވަރަށް ހެދުން ހުރުން ލާޒިމުކުރުމަކީ، އަންހެން މުވައްޒަފުންގެ އިއްޒަތާއި ގަދަރު އުފުލިގެންދާނެ ކަމެކެވެ. އަދި އިސްތަށިގަނޑުގައި ފާޅުކަން ބޮޑު ކުލަތައް ޖެއްސުން މަނާކުރުމަކީ، ވަޒީފާގެ މާހައުލަކީ ކުޅިވަރު ކުޅޭ ތަނެއްގެ ބަދަލުގައި، ޚިދުމަތް ދޭ ރަސްމީ ތަނެއްގެ ގޮތުގައި ފެނިގެންދާނެ ސަބަބެކެވެ.
މި އިސްލާހުތަކާ ގުޅިގެން ސިޔާސީ ބައެއް ބޭފުޅުން ކަމަށްވާ ފައްޔާޒު އިސްމާޢީލާއި، ރައީސް ނަޝީދު އަދި ދުންޔާ މައުމޫން ފާޅުކުރައްވާފައިވާ ކަންބޮޑުވުންތަކަކީ ހަގީގަތާ ޚިލާފު ވާހަކަތަކެކެވެ. މިއީ ރައްޔިތުންގެ ޒާތީ މިނިވަންކަން ފޭރިގަތުމެއް ނޫނެވެ. ދައުލަތުގެ ވަޒީފާއަކީ ވަކި ގަވާއިދުތަކަކާއި އުސޫލުތަކެއްގެ ތެރެއިން އަދާކުރަންޖެހޭ މަސްއޫލިއްޔަތެކެވެ. ކޮންމެ ތަނެއްގައިވެސް “ޑްރެސް ކޯޑް” އެއް އޮތުމަކީ ދުނިޔޭގެ ހުރިހާ ތަނެއްގައިވެސް އޮންނަ އުސޫލެކެވެ. އެހެންކަމުން، މުސްލިމު މުޖުތަމައެއްގައި އިސްލާމީ މިންގަނޑުތަކަށް އިސްކަންދީގެން ހެދުން އެޅުން ބައްޓަންކުރުމަކީ ހުދުމުހުތާރުކަމެއްގެ ގޮތުގައި ސިފަކުރުމަކީ ބަލައިގަނެވޭނެ ކަމެއް ނޫނެވެ.
ދިވެހިރާއްޖޭގެ ގާނޫނުއަސާސީގައި އިސްލާމްދީނުގެ އަސްލުތަކާ ޚިލާފު އެއްވެސް ގާނޫނެއް ނުވަތަ ގަވާއިދެއް ނުހެދޭނެކަން ސާފުކޮށް ބަޔާންކޮށްފައިވެއެވެ. ސިވިލް ސާވިސްގެ މުވައްޒަފުންގެ ހެދުމަށް ގެނައި ބަދަލަކީ މި އަސާސަށް ބާރުދޭ، އަދި ދިވެހިންގެ ދީނީ އަދި ސަގާފީ އުސޫލުތަކާ ގުޅޭ ނިންމުމެކެވެ. މި ބަދަލުގެ ސަބަބުން ވަޒީފާގެ މާހައުލުގައި އެކަކު އަނެކަކަށް ކުރާ އިހުތިރާމް އިތުރުވެ، ރައްޔިތުންގެ ކުރިމަތީގައި ސިވިލް ސާވަންޓުންގެ ގަދަރު އުފުލިގެންދާނެއެވެ.
ސިވިލް ސާވިސްގެ ހެދުމުގެ ގަވާއިދަށް ގެނެވުނު މި ހެޔޮ ބަދަލަކީ ސަރުކާރުން ގައުމުގެ އިސްލާމީ އާދަކާދަތައް ދެމެހެއްޓުމަށް އެޅުއްވި ވަރަށް ހަރުދަނާ ފިޔަވަޅެކެވެ. މިއީ މުވައްޒަފުންނަށް ދަތިކުރުމުގެ ބަދަލުގައި، އެ މީހުންނަކީ މުޖުތަމައު ގަދަރުކުރާ، ނަމޫނާ ދައްކާ ބަޔަކަށް ހެދުމަށް ކުރެވުނު އިޚުލާޞްތެރި މަސައްކަތެކެވެ. މިކަމަށް މުޅި ދިވެހި އުންމަތުން ތާއިދުކޮށް، ސިވިލް ސާވިސްގެ ހައިބަތު ދެމެހެއްޓުމުގައި އެންމެން އެކަތިގަނޑަކަށް ވާންޖެހެއެވެ.
