ކައިވެނި ރޫޅޭ ހާލަތްތަކުގައި ސަރުކާރުގެ ސޯޝަލް ހައުސިން ސްކީމްތަކުން ލިބޭ ބޯހިޔާވަހިކަމުގެ ހައްގު ދެމަފިރިންނަށް ވެސް ކަށަވަރުކޮށްދިނުމަށްޓަކައި، އާއިލާއާ ބެހޭ ގާނޫނަށް މުހިންމު އިސްލާހެއް ރައްޔިތުންގެ މަޖިލީހަށް ހުށަހަޅައިފިއެވެ.
މި އިސްލާހު މަޖިލީހަށް ތައާރަފުކުރެއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ.
މި އިސްލާހުގެ މައިގަނޑު އަމާޒަކީ، ސޯޝަލް ހައުސިންގެ އެއްބަސްވުން އޮންނަނީ އެކެއްގެ ނަމުގައި ކަމަށް ވިޔަސް، ވަރިވުމަށްފަހު އަނެއް ފަރާތް މަގުމަތިވިޔަ ނުދިނުމެވެ. ހާއްސަކޮށް ދަރިން ބަލާ މައިމީހާއަށް ނުވަތަ ބަފައަށް އެ ތަނުގައި ދިރިއުޅެވޭނެ ގޮތް ކޯޓު މެދުވެރިކޮށް ހަމަޖައްސައިދިނުމާއި، އަނެއް ފަރާތުގެ ހައްގު ގެއްލޭ ގޮތަށް ފްލެޓް ވިއްކާލުން ނުވަތަ ދޫކޮށްލުން މަނާކުރުމުގެ ބާރު ފެމިލީ ކޯޓަށް ދިނުން މި އިސްލާހުގައި ހިމެނެއެވެ.
އާއިލާއާ ބެހޭ ގާނޫނަށް 38-1 ގެ ނަމުގައި އައު މާއްދާއެއް އިތުރުކުރަން ހުށަހެޅި މި ބިލުގައި ބަޔާންކޮށްފައިވަނީ، ކައިވެނީގެ ތެރޭގައި ހޯދާފައިވާ ބޯހިޔާވަހިކަމަކީ ދެމަފިރިންގެ ހަމަހަމަ ހައްގު އެކުލެވޭ ތަނެއްގެ ގޮތުގައި ބެލުމަށެވެ. އަދި ދެމީހުންގެ މެދުގައި ވަކި ގޮތަކަށް އެއްބަސްނުވެވިއްޖެ ހާލަތެއްގައި، އެތަނުގެ ކުއްޔާއި ލޯނު ދެއްކުމުގެ ޒިންމާތައް ވެސް ދެފަރާތުގެ މާލީ ތަނަވަސްކަމަށް ބަލައި ކޯޓުން އަދުލުވެރިކަމާއެކު ބަހާލެވޭނެ މަގު ވަނީ ފަހިކޮށްދީފައެވެ.
ރާއްޖޭގައި ސަރުކާރުން ހިންގާ ބޯހިޔާވަހިކަމުގެ މަޝްރޫއުތަކުން ފްލެޓާއި ގޯތި ދޫކުރާއިރު، ކައިވެންޏެއް ކޮށްގެން އުޅޭ މީހުންނަށާއި ދަރިން ތިބޭ އާއިލާތަކަށް އިސްކަންދީގެން އިތުރު ޕޮއިންޓް ލިބެއެވެ. ނަމަވެސް އެއްބަސްވުން އެކެއްގެ ނަމުގައި ހަދާތީ، ދެމަފިރިން ވަރިވުމުން އެއްބަސްވުން ނެތް މީހާއާއި ދަރިންނަށް ބޯހިޔާވަހިކަން ގެއްލި، ބޮޑެތި އިޖުތިމާއީ އަދި މާލީ ދަތިތަކާ ކުރިމަތިލާންޖެހޭ މައްސަލައަކީ ޒަމާނުއްސުރެ އޮތް ބޮޑު ކަންބޮޑުވުމެކެވެ. އާއިލާއާ ބެހޭ މިހާރުގެ ގާނޫނުގައި މިފަދަ ހާލަތްތަކުގައި ސޯޝަލް ހައުސިންއާ މެދު ގޮތެއް ނިންމާނެ ސާފު އިޖުރާއާތެއް ނެތުމުން، ކޯޓުތަކަށް އިންސާފު ގާއިމުކުރުމަށް ހުރަސްތަކެއް ވަނީ ކުރިމަތިވެފައެވެ. މިއީ އެ ދަތިތަކަށް ދާއިމީ ހައްލެއް ހޯދުމަށް އެޅުނު ފިޔަވަޅެކެވެ.
ކޮމެންޓް (0)
ލޯޑް ކުރަމުން...