ދިރިއުޅުމުގެ އެކި މައިދާންތަކުގައި އިންސާނުންނަށް ކުރިމަތިވާ ނަފުސާނީ ބުރަތަކާއި ހާސްކަމުން އަރައިގަނެ، ހަގީގީ ހިތްހަމަޖެހުން ލިބިގަތުމަށް އޮތް އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަނދުމަކުރުން ކަމުގައި މިއަދުގެ ހުކުރު ޚުތުބާގައި ހަނދާންކޮށްދީފިއެވެ.
މިއަދުގެ ޚުތުބާގައި ފާހަގަކުރި ގޮތުގައި، ޒަމާނީ ދުނިޔޭގައި އިންސާނާ ހޭދަކުރަމުންދަނީ ފިކުރުތަކާއި ހާސްކަމުން ފުރިގެންވާ ދުވަސްތަކެކެވެ. މިފަދަ ހާލަތްތަކުގައި ހިތްތަކަށް ދިރުންދީ، ނަފުސަށް އުފާވެރިކަން ގެނެސްދޭނެ އެންމެ މުހިންމު ކަމަކީ ޛިކުރުކުރުމެވެ. މިއީ މާތް ﷲ ގެ ޙަޟްރަތާ ކުއްތަންވުމަށް އޮތް އެންމެ ކުރު އަދި އެންމެ ފަސޭހަ މަގު ކަމުގައިވެސް ބަޔާންކުރިއެވެ.
މާތް ﷲ ހަނދުމަކުރުމުގެ މައިގަނޑު ތިން ބައެއް ޚުތުބާގައި ވަނީ ތަފްސީލުކޮށްދީފައެވެ. އެއީ ހިތުގެ އިޚްލާޞްތެރިކަމާއެކު އެކަލާނގެ ކުޅަދުންވަންތަކަމާމެދު ވިސްނައި ބިރުވެތިވުމާއި، ކީރިތި ޤުރްއާން ކިޔެވުމާއި ތަސްބީޙަ ކިޔައި ދުޢާކުރުން ފަދަ ދުލުން ކުރާ ޛިކުރުތަކެވެ. އަދި ފަރުޟު ފަސް ނަމާދު އަދާކުރުމާއި، ހެޔޮ ޢަމަލުތައް ކުރުމާއި، މައިންބަފައިންނަށް ކިޔަމަންތެރިވުން ފަދަ ގުނަވަންތަކުން ކުރާ ޢަމަލީ ޛިކުރުތައް މީގެ ތެރޭގައި ހިމެނެއެވެ.
ކީރިތި ރަސޫލާ ﷺ ގެ ޙަދީޘްފުޅުތަކަށް އަލިއަޅުއްވާލައްވަމުން ޚުތުބާގައި ވިދާޅުވީ، ﷲ ހަނދުމަކުރާ މީހާއާއި ހަނދުމަނުކުރާ މީހާގެ މިސާލަކީ ދިރިހުރި މީހަކާއި މަރުވެފައިވާ މީހެއްގެ މިސާލު ކަމަށެވެ. އަދި ޛިކުރުކުރުމަކީ ހަމައެކަނި މިސްކިތުގައި އިނދެގެން ކުރާ ކަމެއް ނޫން ކަމަށާއި، ދަތުރުފަތުރުގެ ވަގުތުތަކުގައްޔާއި، މަސައްކަތުގެ މައިދާނުގައި އަދި އޮށޯވެ އޮންނަ ހާލަތުގައިވެސް މާތް ﷲ ހަނދުމަކުރުންމަތީ ދޫ ތެތްކޮށް ބެހެއްޓުމަށް އިރުޝާދު ދެއްވިއެވެ.
ޚުތުބާ ނިންމާލަމުން ވަނީ، ހަގީގީ ޛިކުރަކީ ހަމައެކަނި ދުލުން ކިޔައިލާ ކަލިމަތަކަކަށް ނުހަދައި، ހިތްވެސް އެކަމަށް ޙާޟިރުކުރުން ކަމަށް ނަސޭހަތްތެރިވެފައެވެ. އަދި ފާފަތަކާ ދުރުހެލިވެ، ފަރުޟު ނަމާދުތަކުގެ ފަހުގައި ކުރާ ޛިކުރުތަކާއި ހެނދުނާއި ހަވީރުގެ ދުޢާތަކަށް ރައްކާތެރިވެ ދެމިތިބުމަށް އެންމެހައި މުސްލިމުންނަށް ގޮވާލާފައެވެ.
ކޮމެންޓް (0)
ލޯޑް ކުރަމުން...