ރާއްޖޭގެ މަސްވެރިކަމުގެ ދާއިރާގައި ހަރަކާތްތެރިވާ ފަރާތްތައް ބާރުވެރިކުރުވައި، އެ ސިނާއަތް އިތުރު ހަރުފަތަކަށް ގެންދިއުމުގެ މަގުސަދުގައި 278 މިލިއަން ރުފިޔާގެ ބަޖެޓަކާއެކު “އާރުވެރި މެޗިން ގްރާންޓް” ސްކީމް ރަސްމީކޮށް އިފްތިތާހުކޮށްފިއެވެ.
މިއަދު ބޭއްވި ހާއްސަ ރަސްމިއްޔާތެއްގައި މި ސްކީމް އިފްތިތާހުކޮށްދެއްވީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމްއެވެ.
ވާލްޑް ބޭންކުގެ އެހީގައި ހިންގާ “ޓްރާންސްފޯމް” ޕްރޮޖެކްޓުގެ ދަށުން ކުރިއަށްގެންދާ މި ސްކީމުގެ މައިގަނޑު އަމާޒަކީ މަސްވެރިކަމުގެ ދާއިރާގައި ހަކަތަ ބޭނުންކުރާ މިންވަރު ކުޑަކުރުމާއި، ދެމެހެއްޓެނިވި ގޮތެއްގައި އުފެއްދުންތެރިކަން އިތުރުކުރުމުގެ އިތުރުން ކުދި އަދި މެދު ފަންތީގެ ވިޔަފާރިތަކަށް ފަހި މާހައުލެއް ގާއިމުކޮށްދިނުމެވެ.
ހާއްސަ ހަތް ދާއިރާއަކަށް އިސްކަންދީގެން ފަރުމާކޮށްފައިވާ މި ސްކީމަށް ހުށަހަޅައިގެން ފާސްވާ މަޝްރޫއުތަކުގެ ޖުމްލަ ހަރަދުގެ 40 އިންސައްތަ ހަމަޖައްސައިދިނުމަށް ހަމަޖެހިފައިވަނީ ހިލޭ އެހީގެ ގޮތުގައެވެ.
މީގެއިތުރުން މެރިކަލްޗާ ތަރައްގީކުރުމާއި، މަހުގެ އުފެއްދުންތަކަށް އަގުއެއްކުރުމަށް ބޭނުންވާ ނިޒާމުތައް ގާއިމުކުރުމުގެ އިތުރުން އަންހެނުންނާއި ޒުވާނުންނަށް ވިޔަފާރިއާއި ވަޒީފާގެ ފުރުސަތުތައް ފަހިކޮށްދިނުންވެސް މި ޕްރޮގްރާމުގެ ތެރޭގައި ހިމެނެއެވެ.
މި ގްރާންޓް ސްކީމާ ގުޅޭ މައުލޫމާތު ހޯދުމަށާއި އެޕްލިކޭޝަން ހުށަހެޅުމަށް ހާއްސަ ޕޯޓަލެއް މިހާރު ވަނީ އާންމުކޮށް ހުޅުވާލައިފައެވެ.
ޖުމްލަ 64.8 މިލިއަން އެމެރިކާ ޑޮލަރުގެ މާލީ އެހީތެރިކަމާއެކު 2023 ވަނަ އަހަރު ފެށި މި “ޓްރާންސްފޯމް” ޕްރޮޖެކްޓަކީ ދެކުނު ހުޅަނގު އިންޑިއާ ކަނޑުގެ ސަރަހައްދުގައާއި ރާއްޖޭގައި މަސްވެރިކަން މެނޭޖްކުރުން ވަރުގަދަކޮށް، ސިނާއަތުގެ ވާދަވެރިކަން އިތުރުކުރުމަށް 2030 ވަނަ އަހަރުގެ ނިޔަލަށް ކުރިއަށްގެންދިއުމަށް ރާވާފައިވާ މަޝްރޫއެކެވެ.
ކޮމެންޓް (0)
ލޯޑް ކުރަމުން...