މުޖުތަމައުގެ ރައްކާތެރިކަން ކަށަވަރުކުރުމަށާއި، ގަވާއިދާ ހިލާފަށް ހިންގާ އަމަލުތައް ހުއްޓުވުމުގެ ގޮތުން، ރާއްޖޭގައި އުޅޭ ކޮންމެ ބިދޭސީއަކަށް ދޫކުރެވޭނީ އެންމެ މޯބައިލް ސިމްކާޑެއް ކަމަށް ސަރުކާރުން ކަނޑައަޅައިފިއެވެ.
މި އުސޫލު ފާސްކޮށްފައިވަނީ މިދިޔަ އާދީއްތަ ދުވަހު އޮތް ވަޒީރުންގެ މަޖިލީހުގެ ބައްދަލުވުމުގައެވެ. މި ނިންމުމާއެކު، ބިދޭސީއަކު ގެންގުޅޭ ސިމްކާޑެއް ގެއްލިގެން ނުވަތަ ހަލާކުވެގެން އާ ސިމްކާޑެއް ނަގަން ބޭނުންވި ނަމަވެސް، ދެން އެކަން ކުރެވޭނީ ސީދާ ފުލުހުންގެ މުއައްސަސާ މެދުވެރިކޮށް ހިންގާ ހާއްސަ އިޖުރާއަތްތަކެއް ފުރިހަމަކުރުމަށްފަހުގައެވެ.
މިފަދަ ހަރުކަށި ފިޔަވަޅެއް އެޅުމުގެ އެންމެ ބޮޑު އެއް ސަބަބަކީ، ރާއްޖޭގެ ޖަލުތަކަށް ސިއްރުން ވައްދާ ފޯނުތަކުގައި ގިނައިން ބޭނުންކުރަމުންދަނީ ބިދޭސީންގެ ނަމުގައި ނަގާފައިވާ ސިމްކާޑުތަކަށް ވުމެވެ. މި ބަދަލާއެކު، ޖަލަށް ވައްދާ ސިމްކާޑުތަކުގެ ވެރިން ފަސޭހައިން ހޯދައި، އެމީހުންނާ ދެކޮޅަށް ގާނޫނީ ފިޔަވަޅު އެޅުމަށް ކަމާބެހޭ އިދާރާތަކަށް މަގުފަހިވެގެންދާނެ ކަމަށް ރައީސް އޮފީހުން ވަނީ ހާމަކޮށްފައެވެ.
މީގެ އިތުރުން، ރާއްޖޭގައި ފުޅާ ދާއިރާއެއްގައި ހިންގަމުންދާ ސްކޭމްގެ މައްސަލަތަކުގައިވެސް ބިދޭސީންގެ ނަމުގައި ރަޖިސްޓަރީކޮށްފައިވާ އެތައް ހާސް ސިމްކާޑެއް ބޭނުންކުރާކަން ފުލުހުންގެ ތަހުގީގުތަކަށް ވަނީ ފާހަގަކުރެވިފައެވެ. އެހެންކަމުން، މި އުސޫލަށް އަމަލުކުރަން ފެށުމުން، މަކަރާއި ހީލަތުން ފައިސާ ފޭރުމަށް ގުޅާ ކޯލުތައް މަދުވެ، އާންމު ރައްޔިތުންނަށް ލިބެމުންދާ މާލީ ގެއްލުންތަކަށް ބޮޑު ހައްލެއް ލިބިގެންދާނެކަމަށް ބެލެވެއެވެ.
ކޮމެންޓް (0)
ލޯޑް ކުރަމުން...