ރައްޔިތުންގެ މަޖިލީހުގެ މެންބަރުންނާއި އެ ބޭފުޅުންގެ އާއިލާތަކަށް ދައުލަތުގެ ޚަރަދުގައި ދެމުން އަންނަ ޚާއްސަ ހެލްތު އިންޝުއަރެންސް އިނާޔަތް އުވާލުމަށް އެދި ހުށަހެޅި އީ-ޕެޓިޝަނަށް، މަޖިލީހުގެ ކޮމިޓީއަށް ފޮނުވުމަށް ގަވާއިދުގައި ބުނާ އަދަދަށް ސޮއި ހަމަވެއްޖެއެވެ.
މިދިޔަ އޮގަސްޓް 12 ވަނަ ދުވަހު މިދުއަމް ސައުދު އިސްނަންގަވައިގެން ފެށި މި ޕެޓިޝަނުގައި، މަޖިލީހުގެ އީ-ޕެޓިޝަން ގަވާއިދުގެ ދަށުން “ޚާއްސަ ދަރަޖައިގެ” ޕެޓިޝަނަކަށް ބަދަލުވުމަށް ބޭނުންވާ 2,100 ސޮއިގެ ތެރެއިން 2,117 ސޮއި މިހާރު ވަނީ ހަމަވެފައެވެ.
މި ޕެޓިޝަންގެ މައިގަނޑު ބޭނުމަކީ ކުރީގެ މެންބަރުންނާއި މިހާރުގެ މެންބަރުންގެ އިތުރުން އެ ބޭފުޅުންގެ އާއިލާތަކަށް ރާއްޖެއާއި، ސާކް އަދި އޭޝިއާގެ ގައުމުތަކުން އިންޝުއަރެންސް ލިބޭ ގޮތަށް އޮންނަ ގާނޫނީ މާއްދާތައް އުވާލުމެވެ. އަދި އާންމު ރައްޔިތުންނެކޭ އެއްފަދައިން މެންބަރުންނަށްވެސް އާސަންދަ މެދުވެރިކޮށް އެކަނި ޚިދުމަތް ލިބޭގޮތަށް ހަމަޖެއްސުމެވެ.
މަޖިލީހުގެ އިމްތިޔާޒުތަކުގެ ގާނޫނުގެ ދަށުން ކޮންމެ މެންބަރަކަށް އަހަރަކު 1 މިލިއަނަށް ވުރެ ގިނަ ރުފިޔާގެ ކަވަރޭޖެއް ލިބޭ މި ޚާއްސަ ސްކީމާ މެދު އާންމުންގެ ނުރުހުން އިތުރުވެފައިވާއިރު، ގަވާއިދުގައިވާ ގޮތުން މި ޕެޓިޝަން ކޮމިޓީއަށް ދިރާސާކުރަން ފޮނުވައި، ކުރިއަށް އޮތް ތިން ޖަލްސާގެ ތެރެއިން ޖަލްސާއެއްގައި ތަޅުމުގައި ބަހުސްކުރަން ޖެހޭނެއެވެ.
ކޮމެންޓް (0)
ލޯޑް ކުރަމުން...