އަފްޣާނިސްތާނުގެ އަންހެނުންނަށް އެހީތެރިވުމަށް އދ އިން ގޮވާލައިފި

ތާލިބާނުން އަފްޣާނިސްތާނުގެ ވެރިކަމާ ހަވާލުވިތާ ފަސް އަހަރު ފުރިފައިވާއިރު، ފައިސާގެ ދަތިކަމާ ހުރެ އެ ގައުމުގައި ހަރަކާތްތެރިވާ އަންހެނުންގެ ޖަމާއަތްތަކުގެ ތެރެއިން ދެބައިކުޅަ އެއްބަޔަށް ވުރެ ގިނަ ޖަމާއަތްތަކުގެ ހަރަކާތްތައް ކުރިއަށް އޮތް އަހަރުގެ ތެރޭގައި ހުއްޓިދާނެކަމަށާއި، އެޖަމިއްޔާތަކަށް އެހީތެރިވުމަށް އދ އިން ގޮވާލައިފިއެވެ.

އދ. ގެ ވިމެންސްގެ ފަރާތުން އަފްޣާނިސްތާނަށް ކަނޑައަޅާފައި ހުންނަ ޚާއްސަ މަންދޫބު ސޫޒަން ފަރގަސަން ވަނީ، އަންހެނުންގެ ޕްރޮގްރާމްތަކަށް ދޭ ފައިސާގެ އެހީ ކަނޑާނުލުމަށް އެހީދޭ ގައުމުތަކަށް ގޮވާލާފައެވެ. އޭނާ ވިދާޅުވީ އެގޮތަށް ފައިސާ ކަނޑާލުމުން އަފްޣާނިސްތާނުގެ އަންހެނުން އުފުލަމުންދާ ތަކުލީފުތައް އިތުރަށް ބޮޑުވެގެންދާނެ ކަމަށެވެ.
މިދިޔަ އޭޕްރީލް މަހު 74 ޖަމާއަތެއް މެދުވެރިކޮށް ހެދި ސަރވޭއަކުން ދައްކާ ގޮތުގައި، ފައިސާގެ ދަތިކަމާ ހުރެ އޭގެ ތެރެއިން ދެބައިކުޅަ އެއްބަޔަށް ވުރެ ގިނަ ޖަމާއަތްތަކުން ކުރިއަށް އޮތް އަހަރުގެ ތެރޭގައި އެ މީހުންގެ މަސައްކަތްތައް މެދުކަނޑާލަން ނުވަތަ ހުއްޓާލަން ޖެހުމަކީ ވަރަށް އެކަށީގެންވާ ކަމެކެވެ.
އަދި އދ. އިން އަފްޣާނިސްތާނަށް އިންސާނީ އެހީގެ ގޮތުގައި ހޯދުމަށް އަމާޒުކުރި 1.7 ބިލިއަން ޑޮލަރުގެ ތެރެއިން މިހާތަނަށް ލިބިފައިވަނީ އެންމެ 25 އިންސައްތައެވެ. މީގެ އިތުރުން، 2025 ވަނަ އަހަރު އަންހެނުންގެ ޖަމާއަތްތަކުގެ ގާތްގަނޑަކަށް ހަތަރުބައިކުޅަ ތިންބަޔަށް ފައިސާގެ އެހީ ކުޑަވެފައިވާއިރު، ތިންބައިކުޅަ ދެބައި ޖަމާއަތްތަކުން ރިޕޯޓުކޮށްފައިވާ ގޮތުގައި އެ މީހުންގެ އަތުގައި ބާކީ ހުރީ ހަ މަސްދުވަހަށް ނުވަތަ އެއަށްވުރެ މަދު ދުވަހަކަށް ބޭނުންވާ ފައިސާއެވެ.
އދ. އިން މިގޮތަށް ގޮވާލާފައި މިވަނީ، އެމެރިކާ ސިފައިން 20 އަހަރުގެ ހަނގުރާމައަކަށް ފަހު 2021 ވަނަ އަހަރުގެ އޮގަސްޓް މަހު އަފްޣާނިސްތާނުން ފައިބައި، ތާލިބާނުން އަލުން ވެރިކަމާ ހަވާލުވިތާ ފަސް އަހަރު ފުރުން ފާހަގަކުރަމުންދާ ދަނޑިވަޅެއްގައެވެ.
މި މުނާސަބަތާ ގުޅިގެން ވެރިރަށް ކާބުލްގައި އިސްލާމިކް އެމިރޭޓް އޮފް އަފްޣާނިސްތާނުގެ ހުދު ދިދަތައް ޖަހައި، “މިނިވަންކަމަކީ ޝަރަފާއި ފަޚުރާއި އަމިއްލަވަންތަކަމުގެ ނިޝާނެއް” ކަމަށް ލިޔެފައިވާ ކުރެހުންތައް ވަނީ ކުރަހާފައެވެ. އަދި މި އުފާފާޅުކުރުންތަކުގެ ތެރެއިން ތާލިބާނުން ކްރިކެޓް މެޗެއްވެސް ބާއްވާއިރު، އެހެނިހެން އާންމު ކަންކަމެކޭ އެއްފަދައިން މި މެޗު ބެލުމަށްވެސް އަންހެނުންނާއި އަންހެން ކުދިންނަށް ވަނީ މަނާކޮށްފައެވެ.
ތާލިބާނުން ވެރިކަމަށް އައުމަށްފަހު އަންހެނުންގެ ހައްގުތައް ހަނިކުރުމަށް 100 އަށްވުރެ ގިނަ ގަރާރު ނެރެފައިވެއެވެ. ފަރގަސަން ވިދާޅުވި ގޮތުގައި މިކަމުގެ ސަބަބުން އަންހެނުންގެ ތައުލީމާއި، ވަޒީފާއާއި، ދަތުރުފަތުރު ކުރުމުގެ މިނިވަންކަމާއި، ސިއްހީ ފަރުވާއާއި، އިންސާފު ހޯދުމުގެ ހައްގު ފަދަ އާންމު ދިރިއުޅުމުގެ ގާތްގަނޑަކަށް ހުރިހާ ދާއިރާއަކަށް ވަނީ އޭގެ ނޭދެވޭ އަސަރުކޮށްފައެވެ.
އަންހެން ކުދިން ސްކޫލަށް ފޮނުވުމަށް އިސްލާމީ އުސޫލުތަކާ އެއްގޮތް މަގަކުން ހައްލެއް ހޯދާނެކަމަށް ތާލިބާނުން ތަކުރާރުކޮށް ވަޢުދުވި ނަމަވެސް، އަދިވެސް އަންހެން ކުދިންނަށް ސާނަވީ ތައުލީމު ހާސިލުކުރުން އޮތީ މަނާކޮށްފައެވެ. އަދި އަންހެނުންނަށް ޔުނިވަރސިޓީތަކަށް ދިއުންވެސް ވަނީ މަނާކޮށްފައެވެ.
އދ. ގެ ވިމެންސް އިން 3,200 އަންހެނުންނާ ސުވާލުކޮށްގެން ހެދި ސަރވޭއަކުން ދައްކާ ގޮތުގައި އޭގެ ތެރެއިން ދެބައިކުޅަ އެއްބަޔަށް ވުރެ ގިނަ އަންހެނުން މިހާރު ގެއިން ބޭރަށް ނުކުންނަނީ މަހަކު އެންމެ ފަހަރަކު ނުވަތަ ދެ ފަހަރަކުއެވެ. އަދި މި ސަރވޭގައި ބައިވެރިވި ކޮންމެ ދިހަ އަންހެނެއްގެ ތެރެއިން ހަތް މީހަކު އެމީހުންގެ ނަފްސާނީ ދުޅަހެޔޮކަން ހުރީ ގޯސްކޮށް ނުވަތަ ވަރަށް ގޯސްކޮށް ކަމަށް ބުނެފައިވާކަމަށް ފަރގަސަން ވިދާޅުވިއެވެ.
މިކަމާ ގުޅިގެން އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް، ޖަޕާން، ލުބުނާން، އެމެރިކާ އަދި ޔޫއޭއީ ހިމެނޭހެން 56 ގައުމަކުން އދ. ގައި ނެރުނު ގުޅިފައިވާ ބަޔާނެއްގައި ވަނީ އަންހެނުންނާއި އަންހެން ކުދިންނަށް އަޅާފައިވާ ފިޔަވަޅުތައް އުވާލުމަށް ތާލިބާނުންނަށް ގޮވާލާފައެވެ. އަދި އަންހެނުންނާ ދެކޮޅަށް ހިންގާ ނިޒާމީ އަނިޔާވެރިކަމަކީ މިހާރުގެ ނިޒާމު ސިފަކޮށްދޭ އެންމެ ބޮޑު އެއް ކަންތައް ކަމުގައި އެ ގައުމުތަކުން ވަނީ ބުނެފައެވެ.
ތާލިބާނުންގެ ފަސް އަހަރުގެ ވެރިކަމުގައި އަފްޣާނިސްތާނުގެ މުޖުތަމައު ވަނީ އެހެނިހެން ގިނަ ގޮންޖެހުންތަކަކާވެސް ކުރިމަތިލާން ޖެހިފައެވެ. އދ. ގެ ވޯލްޑް ފުޑް ޕްރޮގްރާމުން ބުނާ ގޮތުގައި ޕްރައިމަރީ ސްކޫލް އުމުރުފުރާގެ ކުދިންގެ ތެރެއިން ދެބައިކުޅަ އެއްބަޔަށް ވުރެ ގިނަ ކުދިން ސްކޫލަކަށް ނުދެއެވެ. އަދި އަފްޣާނިސްތާނުގެ ތިންބައިކުޅަ އެއްބައި ޕްރޮވިންސްތަކުގައި ކުޑަކުދިންނަށް ފައިދާހުރި ކާނާ ނުލިބުމުގެ މައްސަލަ ވަނީ ވަރަށް ނުރައްކާތެރި ދަރަޖައަކަށް ގޮސްފައެވެ.
މީގެ އިތުރުން، ބިންހެލުންތަކާއި ފެންބޮޑުވުމުގެ ސަބަބުން އެ ގައުމުގެ އުމްރާނީ ތަރައްގީއަށް ބޮޑެތި ގެއްލުންތަކެއް ލިބި އެތައް ހާސް ބަޔަކު ވަނީ މަރުވެފައެވެ. ސައުތު އޭޝިއާ ޓެރަރިޒަމް ޕޯޓަލްގެ ތަފާސްހިސާބުތަކުން ދައްކާ ގޮތުގައި ތާލިބާނުން ވެރިކަމަށް އައި ފަހުން “ޓެރަރިޒަމް” ގެ އަމަލުތަކުގައި މަރުވާ މީހުންގެ އަދަދު ވަރަށް ބޮޑަށް މަދުވެފައިވީ ނަމަވެސް، އީރާނާއި ޕާކިސްތާނާ ގުޅޭ ބޯޑަރުގައި ނުރައްކާތެރި ކުރިމަތިލުންތަކެއް ދަނީ ހިނގަމުންނެވެ. އަދި ޚާރިޖީ ގޮތުންވެސް އަފްޣާނިސްތާނު އޮތީ އެކަހެރިވެފައެވެ. ތާލިބާނުންގެ ސަރުކާރު ރަސްމީކޮށް ބަލައިގަނެފައިވާ ހަމައެކަނި ގައުމަކީ ރަޝިޔާއެވެ.