ޓޫރިޒަމްގެ ބޭނުމަށް ދޫކޮށްފައިވާ ތަންތަނުގެ ތެރެއިން ކުއްޔާއި ޖޫރިމަނާ ފައިސާ ނުދައްކާ ހުރި ފަރާތްތަކާ މެދު ގާނޫނީ ގޮތުން އަޅަންޖެހޭ އެންމެ ހަރުކަށި ފިޔަވަޅުތައް އަޅައި، އެފަދަ ތަންތަނުގެ ކުލީގެ އެއްބަސްވުންތައް ބާތިލުކުރުމަށް ސަރުކާރުން ނިންމައިފިއެވެ.
ފަތުރުވެރިކަމާ ބެހޭ ވުޒާރާއިން މިއަދު އާންމުކުރި އިއުލާނެއްގައި ބުނެފައިވަނީ، ޓޫރިޒަމާ ބެހޭ ގާނޫނާއި ގަވާއިދުތަކާ އެއްގޮތްވާ ގޮތުގެ މަތިން ކުއްޔަށް ދޫކޮށްފައިވާ ތަންތަނުގެ ތެރެއިން މިހާރު ހިންގަމުންދާ ތަންތަނާއި، މިނިސްޓްރީގެ ހުއްދައެއް ނެތި އޮޕަރޭޝަންތައް މެދުކަނޑާލާފައިވާ ތަންތަނުން ދައުލަތަށް ދައްކަންޖެހޭ ފައިސާ ނުދައްކާ ހުރުމުން އެ ފަރާތްތަކާ މެދު ފިޔަވަޅު އަޅަން ނިންމާފައިވާ ކަމަށެވެ.
އެހެންކަމުން، ފަތުރުވެރިކަމުގެ ބޭނުމަށް ތަންތަން ކުއްޔަށް ހިފާފައިވާ އެންމެހައި ފަރާތްތަކުން، އެއްބަސްވުމުގައިވާ ގޮތުގެ މަތިން ދައުލަތަށް ދައްކަންޖެހޭ ކުއްޔާއި ޖޫރިމަނާގެ ފައިސާ ދައްކައި ހަލާސްކުރުމަށް ސަރުކާރުން ވަނީ އެދިފައެވެ.
ޓޫރިޒަމްގެ ގާނޫނު ބުނާގޮތުން، ކުލި ނުދައްކާ ރިސޯޓުތައް ބޮޑެތި އަދަދުތަކުން ޖޫރިމަނާކުރުމުގެ އިތުރުން، އެ ހާލަތުގައި ކުލީގެ އެއްބަސްވުން ބާތިލުކޮށް، އެ ރިސޯޓެއް އަނބުރާ ދައުލަތަށް ނެގުމުގެ ބާރު ސަރުކާރަށް ލިބިގެންވެއެވެ.
މީރާގެ ތަފާސްހިސާބުތަކަށް ބަލާއިރު، މި އަހަރުގެ ފުރަތަމަ ކުއާޓަރުގެ ތެރޭގައިވެސް ރިސޯޓު ކުލީގެ ގޮތުގައި ދައުލަތަށް ލިބެންޖެހޭ އެތައް މިލިއަން ރުފިޔާއެއް ވަނީ ނުލިބިއެވެ.
ކޮމެންޓް (0)
ލޯޑް ކުރަމުން...