ރާއްޖޭގައި ހެލިކޮޕްޓަރުގެ ޚިދުމަތް ފެށުމުގެ އެއްބަސްވުމުގައި އަންނަ މަހު ސޮއިކުރަނީ

ރާއްޖޭގެ ދަތުރުފަތުރުގެ ނިޒާމަށް ބޮޑު ބަދަލެއް ގެނެސް، ރޭގަނޑާއި ދުވާލު މޫސުމަށް ބެލުމެއްނެތި ދަތުރުކުރެވޭނެ އިންތިޒާމު ހަމަޖެއްސުމުގެ ގޮތުން ހެލިކޮޕްޓަރުގެ ޚިދުމަތް ފެށުމަށް ހަމަޖެހިފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

މި ޚިދުމަތް ދިނުމަށް ހުށަހެޅުނު ޕްރޮޕޯސަލްތައް އިވެލުއޭޓްކޮށް ނިމިފައިވާއިރު، ޚިދުމަތް ދޭނެ ފަރާތާއެކު އަންނަ އޮގަސްޓު މަހު އެއްބަސްވުމުގައި ސޮއިކުރުމަށް ވަނީ ނިންމާފައެވެ. އެއަށްފަހު ސިވިލް އޭވިއޭޝަންގެ ގަވާއިދުތަކާ އެއްގޮތަށް އެއާ އޮޕަރޭޓާ ސެޓްފިކެޓް (އޭއޯސީ) ހޯދުމުގެ މަސައްކަތް ކުރިއަށްދާނެއެވެ.

މި ޚިދުމަތަކީ ހަމައެކަނި ފަތުރުވެރިން އުފުލުމަށް އެކަނި ޚާއްޞަކުރެވިފައިވާ ކަމެއް ނޫނެވެ. މީގެ މައިގަނޑު އެއް ބޭނުމަކީ ކުއްލި ޙާލަތްތަކުގައި ބަލިމީހުން އުފުލުމާއި (މެޑިކަލް އިވެކުއޭޝަން) އަދި ކަނޑުމަތީގެ ނުރައްކާތަކުން މީހުން ސަލާމަތްކުރުމުގެ (ސާޗް އެންޑް ރެސްކިއު) އޮޕަރޭޝަންތައް ފުޅާކުރުމެވެ. މި ގޮތުން، ކަނޑައެޅިފައިވާ އުސޫލުގެ ދަށުން ޚިދުމަތް ފަށާ ފުރަތަމަ 3 އަހަރުގެ ތެރޭގައި، ކޮންމެ މަހަކު 50 ގަޑިއިރު މެޑިކަލް އިވެކުއޭޝަންގެ ޚިދުމަތް މުޅިން ހިލޭ ފޯރުކޮށްދޭންޖެހޭނެއެވެ. ނަމަވެސް ސާޗް އެންޑް ރެސްކިއު މަސައްކަތްތަކަށް ސަރުކާރުން އަގު އަދާކުރާނެއެވެ.

މި އޮޕަރޭޝަންތައް ހިންގުމަށް ހޮވޭ ފަރާތްތަކަށް އެންމެ ދިގު މުއްދަތެއްގެ ގޮތުގައި 10 އަހަރުގެ ހުއްދައެއް ދިނުމަށް ހަމަޖެހިފައިވާއިރު، ސަރުކާރުގެ އަމާޒަކީ އެންމެ ލަސްވެގެން 2027 ވަނަ އަހަރުގެ ނޮވެމްބަރު 1 ގެ ކުރިން ރަސްމީކޮށް ހެލިކޮޕްޓަރުގެ ޚިދުމަތް ފެށުމެވެ. މި މުޅި މަޝްރޫޢު ކުރިއަށްދާނީ ބައިނަލްއަޤްވާމީ އަދި ރާއްޖޭގެ ވައިގެ ދަތުރުފަތުރުގެ ސަލާމަތީ އެންމެ މަތީ މިންގަނޑުތަކަށް ފުރިހަމައަށް ބަލައިގެންނެވެ.