ޔޫކްރޭނާއެކު “ޑްރޯން އެއްބަސްވުމެއް” އީޔޫ އިން ޤާއިމުކޮށްފި

ހަނގުރާމައިގެ މައިދާނުގައި ބޭނުންކުރާ މުހިންމު ޓެކްނޮލޮޖީއެއް ކަމަށްވާ ޑްރޯން އުފެއްދުމުގެ މަސައްކަތް ދެފަރާތް ގުޅިގެން ފުޅާކުރުމަށްޓަކައި، ޔޫކްރޭނާއެކު “ޑްރޯން އެއްބަސްވުމެއް” ގާއިމުކުރިކަން ޔޫރަޕިއަން ޔޫނިއަން (އީޔޫ) ގެ އިސްވެރިޔާ އުރްސުލާ ފޮން ޑަ ލޭޔަން ބުދަ ދުވަހު އިޢުލާނު ކުރައްވައިފިއެވެ.

ޔޫކްރޭނުގެ ރައީސް ވޮލޮޑިމީރް ޒެލެންސްކީ ދެއްވި ޝަރަފުގެ އެވޯޑަކާ ހަވާލުވެވަޑައިގަތުމަށްފަހު ކީވްގައި ވާހަކަފުޅު ދައްކަވަމުން ފޮން ޑަ ލޭޔަން ވިދާޅުވީ، މި އެއްބަސްވުމުގެ ސަބަބުން ޔޫކްރޭނުގެ އީޖާދީ ވިސްނުމާއި ޔޫރަޕުގެ ސިނާޢީ ގާބިލުކަން އެއްތަންވެގެންދާނެ ކަމަށެވެ.

ރަޝިޔާއާއެކު ހަތަރު އަހަރަށްވުރެ ގިނަ ދުވަހު ކުރަމުންދާ ހަނގުރާމައިގެ ތެރެއިން ޔޫކްރޭނުން ހޯދާފައިވާ ފަންނީ ތަޖުރިބާގެ ބޭނުން ހިފުމަށްޓަކައި، އީޔޫގެ ބައެއް ގައުމުތަކާއި ގަލްފުގެ ގައުމުތަކާއެކުވެސް ޔޫކްރޭނުން ވަނީ މީގެ ކުރިން މިފަދަ އެއްބަސްވުންތައް ގާއިމުކޮށްފައެވެ.

މި އެއްބަސްވުންތައް ކޮންމެ ގައުމަކަށް ވަކިން ބައްޓަންކޮށްފައިވީ ނަމަވެސް، އާންމުކޮށް މިކަމުގައި ހިމެނެނީ ޑްރޯން ޓެކްނޮލޮޖީގެ ކުރެހުންތަކާއި ފަންނީ މަޢުލޫމާތު ޔޫކްރޭނުން ފޯރުކޮށްދިނުމުގެ ބަދަލުގައި، އެހެން ގައުމުތަކުން އިންވެސްޓްމަންޓާއި އަސްކަރީ ސާމާނު ފޯރުކޮށްދިނުމެވެ.

“ޔޫރަޕުގައި މިފަދަ ތަކެތި އުފެއްދުމުގެ ފަންނީ އަދި ސިނާޢީ ބޮޑު ގާބިލުކަމެއް އެބައޮތް. އަދި މި މަސައްކަތް ފުޅާކުރުމަށް ބޭނުންވާ ރައްކާތެރި އުފެއްދުންތެރި ސަރަހައްދުތައް ވެސް އެބަހުރި،” ފޮން ޑަ ލޭޔަން ވިދާޅުވިއެވެ. “ނަމަވެސް، ހަނގުރާމައިގެ މައިދާނުގައި ޔޫކްރޭނުން ހާސިލުކޮށްފައިވާ ފަދަ އަމަލީ ތަޖުރިބާއެއް ޔޫރަޕުގެ ނެތް.”

އޭނާ އިތުރަށް ވިދާޅުވީ، ދެފަރާތް ގުޅިގެން ޑްރޯންގެ ހުރިހާ ބައިތަކެއް ފުރިހަމައަށް މަސައްކަތްކުރާނެ ގޮތް ހެދުމަށާއި، ދިފާޢީ ސިނާޢަތަށް ބޭނުންވާ އިންވެސްޓްމަންޓްތައް އިތުރުކުރުމަށް މަސައްކަތް ކުރެވޭނެ ކަމަށެވެ.

އީޔޫއިން މި ފިޔަވަޅު އަޅާފައިވަނީ، ރަޝިޔާ އާއި ޔޫކްރޭނާ އިންވެގެންވާ އީޔޫގެ އިރުމަތީ ބޯޑަރުގެ ގައުމުތަކުގެ ސަރަހައްދަށް ޑްރޯންތައް ވަންނަމުންދާ ދަނޑިވަޅެއްގައެވެ. “ޑްރޯން އަދި އެންޓި-ޑްރޯން ނިޒާމުތައް ބޭނުންކުރުމުގައި ތިޔަބޭފުޅުން ހޯއްދަވާފައިވާ ތަޖުރިބާއަކީ ހަގީގަތުގައިވެސް ނުހަނު އަގުހުރި އެއްޗެއް،” ރައީސް ޒެލެންސްކީއާ މުޚާތަބުކުރައްވައި ފޮން ޑަ ލޭޔަން ވިދާޅުވިއެވެ. “މި ދާއިރާއިން ޔޫރަޕަށް ކުރިމަތިވެފައިވާ ނުރައްކާތައް އަޅުގަނޑުމެންނަށް އެނގޭތީ، މި މަސައްކަތުގައި ދެފަރާތުން ގުޅިގެން ކުރިއަށްދިއުން މުހިންމު.”

ނަމަވެސް، މި އެއްބަސްވުމުގެ ދަށުން އައު ފަންޑިންގްއެއް ދޫކުރާނެތޯ ނުވަތަ ނޫންތޯއާ ގުޅޭގޮތުން ފޮން ޑަ ލޭޔަން އެއްވެސް ތަފްސީލެއް ދެއްވާފައެއް ނުވެއެވެ.

ރަޝިޔާއާ ދެކޮޅަށް ކުރާ ހަނގުރާމައިގައި ޔޫކްރޭނަށް އެންމެ ބޮޑަށް އެހީތެރިކަން ފޯރުކޮށްދެނީ ޔޫރަޕުންނެވެ. އެގޮތުން، ޔޫކްރޭންގެ ސިފައިން ހަތިޔާރު އެޅުމަށާއި ބަޖެޓުގެ ދަތިތަކަށް އެހީވުމަށް 90 ބިލިއަން ޔޫރޯ (103 ބިލިއަން ޑޮލަރު) ގެ ލޯނެއް ދޫކުރަން ދާދިފަހުން ވަނީ ފަށާފައެވެ. މި ލޯނުގެ ތެރެއިން ފުރަތަމަ ދޫކުރި 6 ބިލިއަން ޔޫރޯ ޚާއްޞަކޮށްފައިވަނީ ޔޫކްރޭނުގެ ޑްރޯން އުފެއްދުމުގެ ގާބިލުކަން އިތުރުކުރުމަށެވެ.

ޔޫކްރޭން ހަނގުރާމައިގެ ކުރީ ސަފުގައި މިހާރު އެންމެ މުހިންމު ދައުރެއް އަދާކުރަނީ ޑްރޯންތަކެވެ. މީގެ ސަބަބުން ރަޝިޔާގެ ސިފައިންނަށް ބޮޑެތި ގެއްލުންތަކެއް ދަނީ ލިބެމުންނެވެ. މީގެ އިތުރުން، ޔޫކްރޭނުގެ ރަށްތަކަށް އަމާޒުކޮށް ރަޝިޔާއިން ފޮނުވާލާ ޑްރޯންތައް ވައްޓާލުމުގެ ހުނަރުވެސް ޔޫކްރޭނުން ވަނީ ވަރަށް ބޮޑަށް ތަރައްގީކޮށްފައެވެ.

ރައީސް ޒެލެންސްކީ ދެއްވި ބަޔާނެއްގައި ވިދާޅުވީ، ޔޫކްރޭނުން މިހާރު އަހަރަކު 10 މިލިއަން ޑްރޯން އުފައްދަމުންދާ ކަމަށާއި، އަމާޒަކީ އެ އަދަދު ދެގުނަ ކުރުން ކަމަށެވެ. “އަޅުގަނޑުމެންގެ ބައިވެރިންނާ ގުޅިގެން މި އަމާޒަށް ވާޞިލުވާނަން. މިއީ ޔޫކްރޭނާއި ޔޫރަޕުގެ ދިފާޢީ ސިނާޢަތަށް ލިބޭނެ ބޮޑު ކާމިޔާބީއެއް،” އޭނާ ވިދާޅުވިއެވެ.