އިރާނާއި އިސްރާއީލުގެ ހަމަނުޖެހުންތަކާ ގުޅިގެން ސޫރިޔާގެ ހައްޖުވެރިންގެ ދަތުރުތައް މެދުކަނޑާލައިފި
އިރާނާއި އިސްރާއީލާ ދެމެދު ހަނގުރާމަ އަލުން ފެށުމުގެ ސަބަބުން، ސައުދީ އަރަބިއްޔާގެ މަދީނާއިން ސޫރިޔާގެ އަލެއްޕޯ އަދި ދިމިޝްގުގެ އެއާޕޯޓްތަކަށް ހައްޖުވެރިން އުފުލުމަށް ހޯމަ ދުވަހަށް ތާވަލުކުރެވުނު ހުރިހާ ފްލައިޓްތަކެއް ސޫރިޔާގެ ކަމާބެހޭ ފަރާތްތަކުން ވަނީ ފަސްކޮށްފައެވެ.
ސޫރިޔާގެ މިނިސްޓްރީ އޮފް އައުގާފުން ހާމަކުރި ގޮތުގައި، ގާތްގަނޑަކަށް 700 އެއްހާ ހައްޖުވެރިން ގޮވައިގެން ދަތުރުކުރި ދެ ބޯޓެއް ވަނީ އުރުދުންގެ އައްމާން އެއާޕޯޓަށް މިސްރާބު ބަދަލުކޮށްފައެވެ. މި ހައްޖުވެރިން މިހާރު ދަތުރުކުރަމުން ދަނީ ބަސްތަކުގައި އެއްގަމު މަގުން ދިމިޝްގާއި އަލެއްޕޯއަށެވެ. ކޮންމެ ބަހެއްގައި 35 އާއި 40 އާ ދެމެދުގެ އަދަދަކަށް ހައްޖުވެރިން ތިބި ކަމަށް މައުލޫމާތު ލިބެއެވެ.
މި ހަމަނުޖެހުންތަކުގެ ތެރެއިން، އިރާނުން އިސްރާއީލަށް މިސައިލް ހަމަލާތަކެއް ދިނުމާ ގުޅިގެން ސޫރިޔާ އާއި އިރާގުން ވަނީ އެ ގައުމުތަކުގެ ވައިގެ ސަރަހައްދު ވަގުތީ ގޮތުން ބަންދުކޮށްފައެވެ. އިސްރާއީލުން ވެސް ވަނީ އާދީއްތަ ދުވަހުގެ ރޭގަނޑާއި ހޯމަ ދުވަހުގެ ފަތިހުގެ ވަގުތުތަކުގައި ވައިގެ ހަމަލާތަކެއް ދީފައެވެ.
އިރާގުން އެގައުމުގެ ވައިގެ ސަރަހައްދު 72 ގަޑިއިރަށް ބަންދުކުރި ނަމަވެސް، މިހާރު ދެ ގައުމުގެ ވައިގެ ސަރަހައްދު ވެސް ވަނީ ހުޅުވާލާފައެވެ. އެހެންނަމަވެސް، ފެބްރުއަރީ މަހުގެ ފަހުކޮޅުން ފެށިގެން ސަރަހައްދުގައި ހިނގަމުންދާ ހަނގުރާމަ ދިގުލައިގެން ދާތީ، ރައްކާތެރިކަމުގެ ފިޔަވަޅެއްގެ ގޮތުން ގިނަ ފްލައިޓްތަކެއް ވަނީ ކެންސަލްކޮށްފައެވެ.
ސޫރިޔާގެ އޮފިޝަލުން ވިދާޅުވި ގޮތުގައި، މިއަހަރުގެ ހައްޖުގެ އަޅުކަމުގައި އެގައުމުން ޖުމްލަ 24,500 ހައްޖުވެރިން ބައިވެރިވެފައިވެއެވެ. ހައްޖުގެ އަޅުކަން ނިމުމަށްފަހު، އެންމެ ފުރަތަމަ ހައްޖުވެރިން އަނބުރާ އެގައުމަށް ދަތުރުކުރީ މިދިޔަ ހޯމަ ދުވަހު ޖިއްދާއިން ދިމިޝްގަށެވެ. އެ ފްލައިޓުން 134 މީހުން ދަތުރުކުރި ކަމަށް ސޫރިޔާގެ ރަސްމީ ނިއުސް އެޖެންސީން ރިޕޯޓްކުރެއެވެ.
އެމެރިކާ އާއި އިސްރާއީލުން އިރާނާ ދެކޮޅަށް ކުރަމުންދާ ހަނގުރާމައިގެ ސަބަބުން މެދުއިރުމަތީގެ ވައިގެ ދަތުރުފަތުރަށް ބޮޑެތި ހުރަސްތަކެއް ވަނީ ކުރިމަތިވެފައެވެ. މި ހަމަނުޖެހުންތަކުގައި ބެލިސްޓިކް މިސައިލާއި ޑްރޯން ހަމަލާތައް ދަނީ ބޭނުންކުރަމުންނެވެ. އެގޮތުން، މިދިޔަ ހަފުތާގައި ކުވެއިތުގެ އިންޓަނޭޝަނަލް އެއާޕޯޓަށް ދިން ޑްރޯން ހަމަލާއެއްގައި އެކަކު މަރުވެ، 60 މީހުން ޒަހަމްވެފައިވާ ކަމަށް ވެސް ރިޕޯޓްތައް ބުނެއެވެ.
