އާރުޓީއައި ގާނޫނުގެ ދަށުން ހުރިހާ މިނިސްޓްރީއަކުން މައުލޫމާތު ހާމަކޮށްފި
މައުލޫމާތު ހޯދައި ލިބިގަތުމުގެ ހައްގުގެ (އާރުޓީއައި) ގާނޫނުގެ ދަށުން ދައުލަތުގެ އިދާރާތަކުން އަމިއްލަ އިސްނެގުމުގައި ހާމަކުރަންޖެހޭ މައުލޫމާތުތައް، ރާއްޖޭގެ ހުރިހާ މިނިސްޓްރީއަކުން ފުރަތަމަ ފަހަރަށް 100 ޕަސެންޓް ފުރިހަމައަށް އާންމުކޮށް ގާނޫނީ ސުންގަޑިއަށް ތަބާވެ މައުލޫމާތު ހާމަކޮށްފިއެވެ.
މިއީ 2014 ވަނަ އަހަރު މި ގާނޫނު ތަންފީޒު ކުރަން ފެށިފަހުން، ސަރުކާރުގެ ހުރިހާ ވުޒާރާއަކުން މިފަދަ މައުލޫމާތުތައް އެއްކޮށް ހާމަކުރި ފުރަތަމަ ފަހަރު ކަމަށް އިންފޮމޭޝަން ކޮމިޝަނަރުގެ އޮފީހުން ވަނީ ކަށަވަރުކޮށްދީފައެވެ.
އިންފޮމޭޝަން ކޮމިޝަނަރު އާހިދު ރަޝީދު ހާމަކުރެއްވި ގޮތުގައި، މީގެ ކުރިން މިނިސްޓްރީތަކުން އަމިއްލައަށް ހާމަކޮށްފައިވަނީ ބޭނުންވާ މައުލޫމާތުގެ އެންމެ 34 ޕަސެންޓެވެ. ނަމަވެސް، ފާއިތުވި މަސްދުވަހުގެ ތެރޭގައި ރައީސް އޮފީހާއި ހުރިހާ 16 މިނިސްޓްރީއަކުން ކުރި މަސައްކަތުން މިހާރު ވަނީ ފުރިހަމަ ކޮމްޕްލަޔަންސް ހާސިލްކޮށްފައެވެ.
އާރުޓީއައި ގާނޫނުގެ ދަށުން ދައުލަތުގެ އިދާރާތަކުން އަހަރަކު އެއްފަހަރު އަމިއްލައަށް ޝާއިޢުކުރަންޖެހޭ 13 ކަމެއް ހިމެނެއެވެ. އޭގެ ތެރޭގައި:
- އިދާރާތަކުގެ ބަޖެޓާއި ހިނގާފައިވާ ޚަރަދުތަކުގެ ތަފުސީލު
- ކުރަން ރާވާފައިވާ މަސައްކަތްތައް
- މުވައްޒަފުންނަށް ވަކިވަކިން ދެވޭ އުޖޫރައާއި ޢިނާޔަތްތައް
ކޮމިޝަނަރު އާހިދު މި ކުރިއެރުން ބަލައިގަތް ނަމަވެސް، މިނިސްޓްރީތަކުގެ ދަށުން ހިނގާ އެހެނިހެން އިދާރާތަކުން ވެސް މިގޮތަށް މައުލޫމާތު ހާމަކުރުމަށާއި، އާންމުކޮށްފައިވާ މައުލޫމާތުތައް އަދާހަމަކޮށް ބެލެހެއްޓުމަށް އިލްތިމާސްކުރެއްވިއެވެ. އަދި އާންމުން ހުށަހަޅާ އާރުޓީއައި ފޯމުތަކަށް ގަވައިދުން ޖަވާބުދާރީވުމަށް ވެސް އެދިވަޑައިގަތެވެ.
މި ބަދަލު އައިސްފައިވަނީ ސަރުކާރުގެ އިދާރާތަކުން، ޚާއްޞަކޮށް ރައީސް އޮފީހުން މައުލޫމާތު ނުލިބޭ ކަމުގެ ޝަކުވާ ބޮޑުވެ، ނިމިދިޔަ އަހަރު އެކަނިވެސް 487 ޝަކުވާއެއް އިންފޮމޭޝަން ކޮމިޝަނަރުގެ އޮފީހަށް ހުށަހެޅިފައިވަނިކޮށެވެ. ބައެއް ވަޒީރުން އާރުޓީއައި ގާނޫނުގެ ބޭނުން ނަހަމަ ގޮތުގައި ހިފާ ކަމަށް ވިދާޅުވި ނަމަވެސް، ކޮމިޝަނަރު ވަނީ އެފަދަ ކަމެއް ފާހަގަކުރެވިފައި ނުވާ ކަމަށް ވިދާޅުވެ، ގާނޫނު ތަންފީޒުކުރުމުގެ މުހިންމުކަން ފާހަގަކުރައްވާފައެވެ.
