2026 ވަނަ އަހަރުގެ ވޯލްޑް ކަޕްގެ ރަސްމީ ލަވަ “ދައި ދައި” އަންނަ ބުރާސްފަތި ދުވަހު ނެރެނީ
2026 ވަނަ އަހަރު ބާއްވާ ފީފާ ވޯލްޑް ކަޕްގެ ރަސްމީ ލަވަ “ދައި ދައި” އަންނަ މެއި މަހުގެ 14 ވާ ބުރާސްފަތި ދުވަހު ރަސްމީކޮށް ނެރޭނެކަން މަޝްހޫރު ލަވަކިޔުންތެރިޔާ ޝަކީރާ އިއުލާނުކޮށްފިއެވެ. ނައިޖީރިއާގެ މަޝްހޫރު ފަންނާނު ބާނާ ބޯއީ އާ އެކު ތައްޔާރުކޮށްފައިވާ މި ލަވަ އަކީ މިއަހަރުގެ އެންމެ އިންތިޒާރު ކުރެވޭ އެއް މިއުޒިކީ އުފެއްދުމެވެ.
ބްރެޒިލްގެ މަޝްހޫރު މަރަކާނާ ސްޓޭޑިއަމްގައި ހުރެ ސޯޝަލް މީޑިއާ މެދުވެރިކޮށް ޝަކީރާ ހާމަކުރި ގޮތުގައި، މި ލަވަ އަށް މިހާރު އޮތީ މުޅިން ތައްޔާރުވެފައެވެ. ޝަކީރާ ވަނީ ވޯލްޑް ކަޕަށް އޭނާ ހުރީ ވަރަށް ބޮޑަށް ތައްޔާރުވެފައިވާ ކަމަށް ބުނެ ފޭނުންނަށް އުފާވެރި މެސެޖެއް ދީފައެވެ.
މިއީ ވޯލްޑް ކަޕްގެ ރަސްމީ ލަވަތަކުގެ ތާރީހުގައި ޝަކީރާގެ ފަރާތުން ފެންނާނެ މުހިންމު މަސައްކަތެކެވެ. މީގެ ކުރިން ވެސް އޭނާ ވަނީ “ވާކާ ވާކާ” އަދި “ލާ ލާ ލާ” ފަދަ ދުނިޔޭގެ މަގުބޫލުކަން ހޯދި ވޯލްޑް ކަޕް ލަވަތައް ކިޔައިދީ، ފުޓްބޯޅަ އީދުގެ ފޯރި ގަދަކޮށްދީފައެވެ.
އަންނަ ބުރާސްފަތި ދުވަހު “ދައި ދައި” ރިލީޒްކުރުމާ އެކު، މުބާރާތުގެ ފޯރި އިތުރަށް ގަދަވެގެންދާނެ ކަމަށް ބެލެވެއެވެ. 2026 ވަނަ އަހަރުގެ ވޯލްޑް ކަޕަކީ އެމެރިކާ، މެކްސިކޯ އަދި ކެނެޑާގައި ބޭއްވުމަށް ހަމަޖެހިފައިވާ ބޮޑު މުބާރާތެކެވެ.
