ދައުލަތުގެ ކުންފުނިތަކުން ޚަރަދު ކުޑަކުރުމަށް ވަރުގަދަ ފިޔަވަޅުތަކެއް އެޅުމަށް ޕީސީބީ އިން އަންގައިފި

މެދުއިރުމަތީގައި އުފެދިފައިވާ ހަމަނުޖެހުންތަކާއި، އިޒްރޭލާއި އެމެރިކާއިން އީރާނާ ދެކޮޅަށް ފަށާފައިވާ ހަނގުރާމައިގެ ސަބަބުން ރާއްޖޭގެ އިގްތިސާދަށް ކުރާނެ ނޭދެވޭ އަސަރުތަކުން ސަލާމަތްވުމަށްޓަކައި، ސަރުކާރު ހިއްސާވާ ކުންފުނިތަކުން ޚަރަދު ކުޑަކުރުމުގެ ހަރުކަށި ފިޔަވަޅުތަކެއް އެޅުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގައިފިއެވެ.

މިދިޔަ މަހުގެ 30 ވަނަ ދުވަހު ފުރަތަމަ ފޮނުވި އެންގުމަށް ބައެއް އިތުރު އިސްލާހުތައް ގެނައުމަށްފަހު، ޕީސީބީން މިއަދު ވަނީ ހުރިހާ ސަރުކާރު ކުންފުނިތަކަކަށާއި އެ ކުންފުނިތަކުގެ ސަބްސިޑަރީތަކަށް އާ ސާކިއުލާއެއް ފޮނުވާފައެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އިގްތިސާދީ އިސްލާހީ ފިޔަވަޅުތައް އަޅަމުންދާ މި ދަނޑިވަޅުގައި، ޕީސީބީން އެންގި މައިގަނޑު ކަންތައްތަކުގެ ތެރޭގައި ހިމެނެނީ:

މުވައްޒަފުންނާއި އިދާރީ ހިންގުން:

ކުންފުނިތަކުގެ މުވައްޒަފުންގެ މުސާރައާއި އިނާޔަތްތަކަށް ކުރާ ހޭދަ ބޮޑުތަނުން ކުޑަކުރުމަށް ވަނީ އަންގާފައެވެ. މީގެ އިތުރުން، ރަސްމީ ގަޑީގެ ބޭރުން ކޮންމެހެން ކުރަންޖެހޭ މަސައްކަތެއް ނޫނީ އިތުރުގަޑީގައި ނުކުރުވުމަށާއި، މަގާމުގެ ކުރިއެރުން ދިނުން މިވަގުތަށް މަޑުޖައްސާލުމަށް ވަނީ އަންގާފައެވެ. އަދި އޮޕަރޭޝަން ހުއްޓިދާނެ ފަދަ ހާލަތެއްގައި ނޫނީ އާ މުވައްޒަފުން ނުނެގުމަށްވެސް ވަނީ އިރުޝާދު ދީފައެވެ.

ދަތުރުފަތުރާއި ތަމްރީނުތައް:

ރާއްޖެއިން ބޭރަށް ކުރާ ރަސްމީ ދަތުރުތައް ކޮންމެހެން ކުރަންޖެހޭ ހާލަތެއްގައި މެނުވީ ނުކުރުމަށާއި، ބައިނަލްއަގްވާމީ ކަސްޓަމަރުންނާއި ސަޕްލަޔަރުންނާ ބައްދަލުކުރުމަށް އޮންލައިން ވަސީލަތްތައް ބޭނުންކުރުމަށް ވަނީ އަންގާފައެވެ. އަދި ރާއްޖެއިން ބޭރުގައި ހިންގާ ތަމްރީނު ޕްރޮގްރާމްތައް ހުއްޓާލައި، އޮންލައިންކޮށް އެފަދަ ކަންކަން ކުރިއަށް ގެންދިއުމަށް ވަނީ އަންގާފައެވެ. މީގެ އިތުރުން، ފެރީގެ ޚިދުމަތް ލިބޭ ސަރަހައްދުތަކުގައި ދަތުރުކުރުމަށް ފެރީ ބޭނުންކުރުމަށްވެސް ވަނީ އިރުޝާދު ދީފައެވެ.

މާލީ މެނޭޖްމަންޓާއި ހަފްލާތައް:

ކުންފުނިތަކުގެ ކޭޝްފްލޯ ދެމެހެއްޓެނިވި ގޮތެއްގައި މެނޭޖްކުރުމަށާއި، ކޮންމެހެން ބާއްވަންޖެހޭ ހަފްލާއެއް ނޫނީ ނުބޭއްވުމަށް ވަނީ އަންގާފައެވެ. ހަފްލާތައް ބޭއްވުމުގައިވެސް އެހެން ކުންފުނިތަކުގެ ވަސީލަތްތައް ހިއްސާކޮށްގެން ޚަރަދު ކުޑަކުރުމަށް ވަނީ ބާރުއަޅާފައެވެ. އަދި ކުންފުންޏަށް ސީދާ މާލީ ފައިދާއެއް ނުލިބޭ ބޭރުގެ މަހާސިންތާތަކާއި ފެއާތަކުގައި ބައިވެރިނުވުމަށްވެސް ވަނީ އަންގާފައެވެ.

އިގްތިސާދީ ދިރާސާއާއި ހަކަތަ:

މެދުއިރުމަތީގެ މައްސަލައިގެ ސަބަބުން ރައްޔިތުންނަށް އުފުލަންޖެހިދާނެ މާލީ ބުރަތަކަށް ރިއާޔަތްކޮށް، އިގްތިސާދީ ހިރާސްތައް ދިރާސާކުރުމަށް ޕީސީބީން ވަނީ ގޮވާލާފައެވެ. އަދި ކުންފުނިތައް ހިންގުމުގައި އިއާދަކުރަނިވި ހަކަތަ ބޭނުންކުރުމާއި ކަރަންޓު ޚަރަދު ކުޑަކުރުމަށްވެސް ވަނީ އިރުޝާދު ދީފައެވެ.

ޕީސީބީން މިފަދަ އެންގުމެއް ފޮނުވާފައި މިވަނީ، ދުނިޔޭގެ ބާޒާރުގައި ތެލުގެ އަގަށް އަތުވެދާނެ ބަދަލުތަކާއި އިގްތިސާދީ ނުތަނަވަސްކަމަށް ދުރާލައި ތައްޔާރުވުމުގެ ގޮތުންނެވެ. މިހާރުވެސް ދައުލަތުގެ ބައެއް ކުންފުނިތަކުން އަމިއްލައަށް އިސްނަގައިގެން ޚަރަދު ކުޑަކުރުމުގެ ފިޔަވަޅުތައް އަޅަން ފަށާފައިވާކަން ފާހަގަކުރެވެއެވެ.