ކައިވެންޏަށް ތިން މަސް ނުވަނީސް، ލޯބިވެރިޔާއާ ގުޅިގެން ފިރިމީހާ މަރާލި އަންހެނަކު ހައްޔަރުކޮށްފި

ޖައިޕޫރު، އިންޑިއާ: އިންޑިއާގެ ރާޖަސްތާނުގައި، ކައިވެނި ކުރިތާ އެންމެ ތިން މަސް ދުވަސް ތެރޭގައި ލޯބިވެރިޔާއާ ގުޅިގެން ފިރިމީހާ ރަހުމުކުޑަ ގޮތަކަށް މަރާލި އަންހެނަކު ފުލުހުން ހައްޔަރުކޮށްފިއެވެ. “ހަނީމޫން މާޑަރ” ގެ ނަމުން މީޑިއާތަކުގައި މަޝްހޫރުވެފައިވާ މި ހާދިސާގައި ހައްޔަރުކޮށްފައިވަނީ އުމުރުން 23 އަހަރުގެ އަންޖަލީ ނަމަކަށް ކިޔާ އަންހެނެކެވެ.

ފުލުހުންގެ ތަހުގީގުން ހާމަވެފައިވާ ގޮތުގައި، އަންޖަލީ އާއި އޭނާގެ ލޯބިވެރިޔާ ސަންޖޭ (25 އަހަރު) ފުރަތަމަ ބައްދަލުވީ މީގެ ހަތް އަހަރު ކުރިން 2018 ވަނަ އަހަރު ބޭއްވި ކައިވެނި ހަފްލާއަކުންނެވެ. އެ ދުވަސްވަރު ސަންޖޭ މަސައްކަތް ކުރީ ވެއިޓަރެއްގެ ގޮތުގައެވެ. އޭރު ދެމީހުންގެ މެދުގައި ވާހަކަދެކެވި، ސަންޖޭގެ ނަންބަރު އަންޖަލީއަށް ދިން ނަމަވެސް، އަންޖަލީގެ އަތުގައި ފޯނެއް ނެތުމުގެ ސަބަބުން ދެމީހުންގެ މެދުގައި އޮތް ގުޅުން މެދުކެނޑުނެވެ.

ނަމަވެސް، 2024 ވަނަ އަހަރު އަންޖަލީ ފޯނެއް ގަތުމަށްފަހު އަލުން ސަންޖޭއާ ގުޅުން އުފެދި، ދެމީހުންގެ މެދުގައި ލޯބީގެ ގުޅުމެއް ފެށުނެވެ. މި ގުޅުން އޮއްވައި، އަންޖަލީގެ އާއިލާއިން އޭނާ މަޖުބޫރުކޮށްގެން އަޝިޝް ކުމާރާ ކައިވެނި ކުރުވީ 30 އޮކްޓޯބަރު 2025 ގައެވެ. ކައިވެންޏަށްފަހު ފިރިމީހާގެ ރަށަށް ބަދަލުވި ނަމަވެސް، އަންޖަލީ ހުރީ އެ ކައިވެންޏާ މެދު ނުހަނު ބޮޑަށް ހިތްހަމަނުޖެހިފައެވެ.

މި މަރު ރާވާފައިވަނީ މީގެ ދެ ހަފްތާއެއްހާ ދުވަސް ކުރިން އަންޖަލީ އޭނާގެ އާއިލާގެ މީހުން ކައިރިއަށް ޒިޔާރަތް ކުރި ދުވަސްވަރު ސަންޖޭއާ ބައްދަލުކޮށްގެންނެވެ.

މަރުގެ ހާދިސާ ހިނގި ގޮތް:
ޖެނުއަރީ 30 ވަނަ ދުވަހުގެ ރޭ، ޕްލޭނާ އެއްގޮތަށް އަންޖަލީ ވަނީ ފިރިމީހާ ގޮވައިގެން ބޭރަށް ހިނގާލަން ގޮސްފައެވެ. އަދި ފޯނުން ސަންޖޭއަށް އެމީހުން ތިބި ތަން ކިޔައިދިނެވެ. ސަންޖޭ އާއި އޭނާގެ ދެ ރަހުމަތްތެރިން ކަމަށްވާ ރޯކީ އަދި ސިދާތު ތިބީ މަގުމަތީގައި ހުރި ގަސްތަކުގެ ނިވަލުގައި ފިލައެވެ. އަންޖަލީ ދިން ސިގްނަލަކާއެކު، އެ ތިން މީހުން އަޝިޝްއަށް ހަމަލާދީ، ލަކުޑިބުރިން ތަޅައި، ކަރުގައި ސްކާފެއް އޮޅައިލައި ނޭވާ ހާސްކޮށްލައިގެން މަރާލިއެވެ.

މިއީ ފޭރުމެއްގެ ތެރެއިން ހިނގި ކަމެއްކަން ދެއްކުމަށްޓަކައި، އަންޖަލީ ވަނީ އޭނާގެ ކަންފަތުލާ އެއްޗިއްސާއި ފިރިމީހާގެ ފޯނު ގާތިލުންނަށް ދީފައެވެ. އަދި އޭނާ އަމިއްލައަށް މަގުމައްޗަށް ވެއްޓި، ހޭނެތިފައިވާ ކަމަށް ހެދިގެން އޮތެވެ. މަގުން ދިޔަ މީހުންނަށް ފެނިގެން ފުލުހުންނަށް ރިޕޯޓްކުރުމުން ދެމީހުން ހޮސްޕިޓަލަށް ގެންދިޔައިރުވެސް އަޝިޝް އޮތީ މަރުވެފައެވެ.

ފުލުހުންނަށް މިކަމުގައި ޝައްކު އުފެދުނީ ޕޯސްޓްމޯޓަމް ރިޕޯޓުން އަޝިޝްގެ ބޮލުގެ ފަހަތަށް ބޮޑެތި ޒަހަމްތަކެއް ލިބިފައިވާކަމާއި، އޭނާ މަރުވީ ކަރުގައި ހިފުމުގެ ސަބަބުންކަން އެނގުމުންނެވެ.

މި މައްސަލައިގައި އަންޖަލީ އާއި ސަންޖޭގެ އިތުރުން މަރުގައި ބައިވެރިވި އަނެއް ދެ މީހުންވެސް މިހާރު ވަނީ ހައްޔަރުކޮށްފައެވެ. ކޯޓުން ވަނީ އަންޖަލީ ދެ ދުވަހަށް، އަދި ސަންޖޭ އާއި އޭނާގެ ބައިވެރިން ފަސް ދުވަހަށް ބަންދުގައި ބޭތިއްބުމަށް އަމުރުކޮށްފައެވެ.