2025 ގެ އެންމެ މޮޅު ފިލްމުތަކުގެ ލިސްޓުން “28 ޔިއާސް ލޭޓާ” ޖާގަ ހޯދައިފި
މަޝްހޫރު އެންޓަޓެއިންމަންޓް މެގަޒިން “ވެރައިޓީ” އިން ނެރުނު 2025 ވަނަ އަހަރުގެ އެންމެ މޮޅު ފިލްމުތަކުގެ ލިސްޓުން، ގިނަ ބަޔަކު އިންތިޒާރުކުރި ޒޮމްބީ ތްރެއިލަރ “28 ޔިއާސް ލޭޓާ” ޖާގަ ހޯދައިފިއެވެ.
ވެރައިޓީގެ ފިލްމު ކްރިޓިކުން އެކުލަވާލި މި ޚާއްސަ ލިސްޓުގެ 5 ވަނައިގައި މި ފިލްމު ހިމެނިފައިވުމަކީ، މި ފްރެންޗައިޒްގެ ފޭނުންނަށް ލިބުނު ވަރަށް ބޮޑު އުފަލެކެވެ.
މި ފިލްމަކީ 2002 ވަނަ އަހަރު ނުކުތް މަޝްހޫރު ފިލްމު “28 ޑޭސް ލޭޓާ” ގެ ސީކުއެލް އެކެވެ. މި ފިލްމުގެ އެންމެ ޚާއްސަ ކަމަކީ، އަސްލު ފިލްމުގެ ޑައިރެކްޓަރު ޑެނީ ބޮއިލް އާއި ލިޔުންތެރިޔާ އެލެކްސް ގާލެންޑް އަދި ލީޑު އެކްޓަރު ސިލިއަން މާފީ، ދިގު މުއްދަތަކަށްފަހު އަލުން އެކުގައި މަސައްކަތް ކޮށްފައިވުމެވެ. މީގެ އިތުރުން ޖޯޑީ ކޯމާ އާއި އާރޮން ޓޭލާ-ޖޯންސަން ފަދަ ހުނަރުވެރި ތަރިންވެސް މި ފިލްމުން ފެނިގެންދެއެވެ.
ވެރައިޓީން ފާހަގަކޮށްފައިވާ ގޮތުގައި، “28 ޔިއާސް ލޭޓާ” އަކީ ހަމައެކަނި ބިރުވެރި ފިލްމެއް ނޫނެވެ. މިއީ އިންސާނީ ގުޅުންތަކާއި، ދުނިޔެއަށް އައި ބޮޑު ބަދަލަކަށްފަހު މީހުންގެ ދިރިއުޅުން ބައްޓަންވެފައިވާ ގޮތް ވަރަށް ފުރިހަމައަށް ދައްކުވައިދީފައިވާ ފިލްމެކެވެ. ފުރަތަމަ ފިލްމެކޭ އެއްގޮތަށް މި ފިލްމުގައިވެސް ބޭނުންކޮށްފައިވާ ތަފާތު ވިޝުއަލް ސްޓައިލްގެ ސަބަބުން، މިއީ 2025 ވަނަ އަހަރުގެ ސިނަމާގައި އެންމެ ފާހަގަކޮށްލެވޭ އެއް އުފެއްދުން ކަމަށް ކްރިޓިކުން ބުނެއެވެ.
މި ލިސްޓުގައި މި ފިލްމު ހިމެނުމުން ދޭހަވަނީ، އަހަރުތަކަކަށްފަހު އެނބުރި އައި ނަމަވެސް، މި ސީރީޒްގެ މަގުބޫލުކަން އަދިވެސް ކުޑަވެފައި ނުވާކަމެވެ.
