މިނިސްޓަރ މަހްލޫފްގެ އަނބިކަނބަލުންނާއި ދަރިކަނބަލުން ކޮވިޑަށް ފައްސިވެއްޖެ

ޔޫތު މިނިސްޓަރ އަހްމަދު މަހްލޫފްގެ އަނބިކަނބަލުން ނަޒްރާ ނަސީމް އާއި ދަރިކަނބަލުން ލައިބާ އަހްމަދު މަހްލޫފް (އެލީ) ކޮވިޑް-19 އަށް ފައްސިވެއްޖެއެވެ.

މަހްލޫފްގެ އަނބިކަނބަލުން ނަޒްރާ އާއި ދަރިކަނބަލުން ކޮވިޑް-19 އަށް ފައްސިވިއިރު މަހްލޫފް ހުންނެވީ ގައުމީ ފުޓްބޯޅަ މުބާރާތުގެ ފައިނަލް މެޗްގައި ބައިވެރިވެ ވަޑައިގަތުމަށް ރ.އަތޮޅު އަލިފުއްޓަށް ވަޑައިގެން އެރަށުގައެވެ. ނަޒްރާ ވަނީ އޭނާ އާއި ދަރިކަނބަލުން ކޮވިޑް-19 އަށް ފައްސިވެފައިވާ ކަން ރޭ ކުރެއްވި ޓްވީޓެއްގައި ކަށަވަރު ކޮށްދެއްވާފައެވެ.

ނަޒްރާ އަކީ ރައީސް އޮފީހުގެ ސްޓޭޓް މިނިސްޓަރެކެވެ. އޭނާ އަކީ ނައިބު ރައީސް ފައިސަލް ނަސީމްގެ ޗީފް އެގެޒެކެޓިވް އެވެ.

ކޮވިޑް-19 އަށް ފައްސިވާ މީހުންގެ އަދަދު ވަރަށް ބޮޑަށް އިތުރުވަމުން އަންނައިރު ރައީސް ސޯލިހް ވެސް މިވަގުތު ހުންނެވީ ކޮވިޑް-19 އަށް ފައްސިވުމުން އެކަހެރިވެ ވަޑައިގެންނެވެ. އަދި މިނިސްޓަރ ޔުމްނާ މައުމޫން ވެސް އިއްޔެ ވަނީ ކޮވިޑް-19 އަށް ފައްސިކަން ކަށަވަރު ކޮށްދެއްވާފައެވެ.

ކޮވިޑް-19 އަށް ރާއްޖެ އިން ފައްސިވާ މީހުންގެ އަދަދު އިތުރުވެ، ރާއްޖޭގައި ތިބި ކޮވިޑް ބަލި މީހުންގެ އަދަދު އިއްޔެ ވަީ 14000 އަށް އަރާފައެވެ. މިހާރު ރާއްޖެ އިން ކޮވިޑް-19 އަށް ދުވާލަކު ފައްސިވާ މީހުންގެ އަދަދު ދެހާހަށްވުރެ މަތީގައި ހުރިއިރު ދުވާލަކު ފައްސިވާ މީހުންގެ އަދަދު ހަހާހަށް އެރުން ވެސް އެކަށީގެންވާ ކަމަށް އެޗްޕީއޭ އިން ވަނީ ވިދާޅުވެފައެވެ.