ޚަބަރު ކޯވިޑް-19 އަށް ޝައްކު ކުރެވޭ މީހުން ފެނިގެން ދެރަށަކަށް އަރާފޭބުން މަނާކޮށްފި

ކޯވިޑް-19 އަށް ޝައްކު ކުރެވޭ މީހުން ފެނިގެން ދެރަށަކަށް އަރާފޭބުން މަނާކޮށްފި

ކިޔާލަން ހޭދަވާނީ 2 މިނިޓް

ފޮންޓް ސައިޒް

ދުނިޔޭގައި ހަލުވިކަމާއެކު ފެތުރެމުން ދާ ނުރައްކާތެރި ކޮވިޑް-19 ނުވަތަ ކޮރޯނާ ވައިރަހަށް ޝައްކުކުރެވޭ މީހަކު ފެނިގެން ވ.ތިނަދުއާއި ޅ.އަތޮޅުގެ ކުރެއްދޫ ރިސޯޓަށް އަރައި ފޭބުން ވަގުތީގޮތުން މަނާކޮށްފިއެވެ.

ހެލްތް މިނިސްޓްރީން ވިދާޅުވީ އެ ދެރަށަށް އަރާފޭބުން މަނާކުރީ ދެ ރަށުން ކޯވިޑް19އަށް ޝައްކުވެގެން ގެންދިޔަ މީހުންގެ ޓެސްޓްތަކުގެ ނަތީޖާ ލިބެންދެންކަމަށެވެ. އެ ދެރަށުން ގެންދިޔަ މީހުން ފަރުކޮޅުފުށީގައި ޤާއިމް ކޮށްފައިވާ ކަރަންޓީން ފެސިލިޓީއަށް ގެންގޮސް މިހާރު ވަނީ ޓެސްޓު ހެދުމުގެ މަސައްކަތް ފަށާފައެވެ.

މީގެ އިތުރުން ޗައިނާ ފިޔަވައި އެންމެ ބޮޑަށް ކޯވިޑް-19 ފެތުރެމުންދާ އިޓަލީ ވިލާތުން ރާއްޖެއަށް އަންނަ ޑައިރެކްޓް އަދި ޓްރާންސިޓް ފްލައިޓްތައްވެސް ވަނީ މެދުކަނޑާލާފައެވެ.

ހެލްތު މިނިސްޓަރު އަމީން ވިދާޅުވީ ރާއްޖޭގެ އެއްވެސް ރަށަކުން ކޯވިޑް-19 ފެނިއްޖެ ނަމަ އެ ރަށަކަށް އަރައި ފޭބުން މެދުކަނޑާލުމަށް ނިންމާފައިވާކަމަށެވެ. އަދި ރާއްޖޭގެ ހުރިހާ ރަށަކަށް ވެސް، ބޭނުންވާ ސިއްޙީ ސާމާނު ހާލަތާ އެކަށީގެންވާ ވަރަށް ފޮނުވާފައިވާ ކަމަށެވެ.

މީގެ އިތުރުން މިހާރު ފަރުކޮޅުފުއްޓާއި ފުނަދޫގެ އިތުރުން ކުރިން ރިސޯޓް ހިންގި ރަށެއް ކަމަށްވާ ވިލިވަރުގައިވެސް 30 މީހުންގެ ޖާގައިގެ ކަރަންޓީން ފެސިލިޓީއެއްވެސް ސަރުކާރުން ވަނީ ޤާއިމް ކޮށްފައެވެ.

މިހާތަނަށް ރާއްޖޭގައި ކޯވިޑް-19 އަށް ޝައްކުކުރެވޭ 6 މީހަކު ވަނީ ކަރަންޓީނުކޮށްފައެވެ.

ކޯވިޑް-19 ރާއްޖެއަށް އެތެރެވިޔަ ނުދިނުމަށްޓަކައި ސަރުކާރުން ދަނީ ގިނަ ފިޔަވަޅުތަކެއް އަޅަމުންނެވެ. އެގޮތުން ވަޔާއި ކަނޑުގެ މަގުން ރާއްޖެ އެތެރެވާ މީހުން ހެލްތް ސްކްރީން ކުރުމާއި ރާއްޖެއިން މި ވައިރަހަށް ޓެސްޓު ކުރެވޭނެ ގޮތްވެސް ވަނީ ހަދާފައެވެ. އަދި ރާއްޖެއިން މިވަގުތު މިއޮތީ މި ވައިރަސް އަތުވެދާނެ ހާލަތަކަށް ބަލައި ފުރިހަމައަށް ތައްޔާރުވެފައި ކަމަށްވެސް ސަރުކާރުން ވަނީ ހާމަކުރައްވާފައެވެ.

މީގެ އިތުރުން ނޭޝަނަލް އެމަޖެންސީ އޮޕަރޭޝަން ސެންޓަރެއް ޤާއިމްކޮށް، ރައްކާތެރިކަމުގެ ފިޔަވަޅުތައް ވަނީ ވަރުގަދަކޮށްފައެވެ. އަދި މި ބައްޔާގުޅޭ އެއްވެސް ކަމެއް ރައްޔިތުންނަށް ނުފޮރުވައި ހާމަކުރާނެކަމުގެ ޔަޤީންކަން ސަރުކާރުން ވަނީ ރައްޔިތުންނަށް ދީފައެވެ.

ޓެގް

ކޮރޯނާވައިރަސް

މި ޚަބަރަށް ތިޔަބޭފުޅުންގެ ވިސްނުން

ކޮމެންޓް (0)

ލޯޑް ކުރަމުން...

ކޮމަންޓް ޝާއިއު ކުރެވޭނީ އެޑިޓޯރިއަލް ޓީމުން ރިވިއުކުރުމަށްފަހު، ކޮމެންޓް ކުރުމުގެ މިންގަނޑުތަކަށް ފެތޭނަމަ އެވެ.