ދިވެހިރާއްޖެއަށް ކުނި އެތެރެކުރުން އެއްކޮށް މަނާކުރުމަށާއި، ޕްލާސްޓިކް ކޮތަޅުން ނަގަމުން އަންނަ ފީއަށް ލުޔެއް ދިނުމަށްޓަކައި ކުނި މެނޭޖުކުރުމުގެ ޤާނޫނަށް ސަރުކާރުގެ ފަރާތުން ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ.
މަޖިލީހުގެ 64 މެންބަރުންގެ އިއްތިފާގުން ފާސްކުރި މި ބިލަކީ އުނގޫފާރު ދާއިރާގެ މެންބަރު އިބްރާހީމް ޝިފާޒް ހުށަހެޅުއްވި އިސްލާޙެކެވެ. މީގެ ކުރިން ވަކި ހާލަތްތަކެއްގައި އެކަނި އިސްތިސްނާވާ ގޮތަށް އޮތް މި ފީ އުވާލުމާ ގުޅިގެން، ޕްލާސްޓިކް ކޮތަޅުން ނަގާ ފީގެ ގޮތުގައި ދައުލަތަށް ލިބެމުންދިޔަ އާމްދަނީއަށް ބަދަލުތަކެއް އަންނާނެއެވެ.
މި ބިލުގެ ދަށުން އިޤްތިޞާދީ އަދި ސިނާއީ މަސައްކަތްތައް ކުރާ ތަންތަނުގައި ކުނި މެނޭޖުކުރުމުގެ ޚާއްޞަ ސިޔާސަތުތަކެއް އެކުލަވާލަންޖެހެއެވެ. އަދި ކުނި މެނޭޖުކުރުމުގެ ކަންކަން ކުރިއަށްގެންދާންވާނީ ޤައުމީ މާސްޓަރ ޕްލޭނާއި، އެ ސިޓީއެއްގެ ކުނި މެނޭޖުކުރުމުގެ ޕްލޭނާ އެއްގޮތްވާ ގޮތުގެ މަތިންނެވެ.
މީގެއިތުރުން ކުނި މެނޭޖުކުރުމުގެ ނިޒާމުތައް ފަރުމާކޮށް ޤާއިމުކުރުމާއި، ކުނި މެނޭޖުކުރާ މަރުކަޒުތަކާއި ކުނި އުކާލުމަށް ބޭނުންކުރާ ވަސީލަތްތަކުގައި ހުންނަންޖެހޭ މިންގަނޑުތައްވެސް މި ބިލުގައި ވަނީ ކަނޑައަޅާފައެވެ. މި ބަދަލުތަކާއެކު ކުނި މެނޭޖުކުރުމުގެ ދާއިރާއަށް ޖުމްލަ ހައްލެއް ލިބިގެންދާނެ ކަމަށް ސަރުކާރުން ބުނެއެވެ.
ކޮމެންޓް (0)
ލޯޑް ކުރަމުން...