ކޮނާޓޭ ނެތްތަން ފޫބެއްދުމަށް ބާސާގެ ކެޕްޓަން އަރައޫހޯ ލިވަޕޫލަށް
އިނގިރޭސި ކްލަބް ލިވަޕޫލްގެ ދިފާއު ވަރުގަދަކުރުމުގެ ގޮތުން، ބާސެލޯނާގެ ކެޕްޓަން އަދި އުރުގުއާއީގެ ޑިފެންޑަރު ރޮނާލްޑް އަރައޫހޯ ލޯން އެއްބަސްވުމެއްގެ ދަށުން އެ ކްލަބަށް ސޮއިކޮށްފިއެވެ.
އުމުރުން 27 އަހަރުގެ އަރައޫހޯ ލިވަޕޫލާ ގުޅުނީ އެއް ސީޒަނުގެ މުއްދަތަށެވެ. އަދި ލޯން މުއްދަތު ހަމަވުމަށްފަހު، ބޭނުންނަމަ އޭނާ ދާއިމީކޮށް ގަންނަން މަޝްވަރާ ކުރެވޭނެ ގޮތަށްވެސް އެއްބަސްވުމުގައިވަނީ ހިމަނާފައެވެ.
ލިވަޕޫލުން އަރައޫހޯ ހޯދަން މަސައްކަތްކުރީ އެ ފޯމޭޝަންގެ މުހިންމު ޑިފެންޑަރު އިބްރާހިމާ ކޮނާޓޭ ރެއާލް މެޑްރިޑަށް ބަދަލުވުމާ ގުޅިގެން، އޭނާ ނެތްތަން ފޫބެއްދުމުގެ މަގުސަދުގައެވެ.
އުރުގުއާއީގެ ބޮސްޓަން ރިވާއިން 2018 ވަނަ އަހަރު ބާސާއާ ގުޅުނު އަރައޫހޯ ވަނީ އެ ކްލަބަށް 200 އަށްވުރެ ގިނަ މެޗު ކުޅެދީ، ތިން ފަހަރަށް ލީގު ކާމިޔާބުކޮށް އަދި ދެ ފަހަރަށް ކޮޕާ ޑެލް ރޭވެސް ހޯދާފައެވެ. އަދި ގޯލްކީޕަރު މާކް-އަންދްރޭ ޓާ ސްޓެގެން ދިޔުމާއެކު ބާސާގެ ކެޕްޓަން ބޭންޑްވެސް ހަވާލުކުރީ އޭނާއާއެވެ.
ނަމަވެސް 2024-25 ސީޒަނުގައި ކުރިމަތިވި ފަލަމަސްގަނޑުގެ އަނިޔާއަކާ ގުޅިގެން 147 ދުވަހު ކުޅުމާ ދުރުގައި ހުންނަންޖެހުމުން، މިދިޔަ ސީޒަނުގައި އޭނާއަށް ފެށުނީ ލީގުގެ 11 މެޗެވެ. ބާސާއާއެކު 2031 ވަނަ އަހަރުގެ ނިޔަލަށް އެއްބަސްވުން އޮތް ނަމަވެސް، އަނިޔާގެ ސަބަބުން އޭނާގެ ކެރިއަރަށް ވަނީ ގޮންޖެހުންތަކެއް ކުރިމަތިވެފައެވެ.
