ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލުގައި މިރޭ ފްރާންސާ ދެކޮޅަށް ނުކުންނައިރު، ދަތުރުފަތުރުގެ ސަބަބުން ކުރިމަތިވި ވަރުބަލިކަމަށްވުރެ ބޮޑަށް ސްޕޭންގެ ވިސްނުން ހުރީ މެޗުގެ ކޮންޓްރޯލް ހޯދައިގެން މޮޅުވުމަށް ކަމަށް އެ ޓީމުން ހާމަކޮށްފިއެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ސްޕޭނުގެ މިޑްފީލްޑަރު އެލެކްސް ބައެނާ ފާހަގަކުރި ގޮތުގައި، މިހާތަނަށް ދެ ޓީމުން މެޗުތަކަށް ދަތުރުކޮށްފައިވާ ދުރުމިނަށް ބަލާއިރު ފްރާންސަށް ވަނީ ބޮޑު އެޑްވާންޓޭޖެއް ލިބިފައެވެ. އެގޮތުން ފްރާންސާ އަޅާބަލާއިރު ސްޕޭނުން ވަނީ 15،000 އަށްވުރެ ގިނަ ކިލޯމީޓަރުގެ އިތުރު ދަތުރެއް ކޮށްފައެވެ. މި ދަތުރުތަކުގެ ސަބަބުން ކުޅުންތެރިންނަށް ވަރުބަލިކަން އިހުސާސް ކުރެވުނު ނަމަވެސް، އެކަމާ މެދު ވިސްނައި ވަގުތު ބޭކާރު ނުކޮށް، އެކަށީގެންވާ އަރާމު ހޯދައިގެން ފިޓްކޮށް ދަނޑަށް ނުކުންނަން ޓީމުން އޮތީ ފުރިހަމައަށް ތައްޔާރަށެވެ.
މިރޭގެ މެޗުގައި ފްރާންސްގެ ފަރާތުން ފެންނާނެ އެންމެ ބޮޑު ނުރައްކަލަކީ އެ ޓީމުގެ ހަލުވި އަދި ވަރުގަދަ ފޯވާޑް ލައިންކަން ސްޕޭނުން ގަބޫލުކުރެއެވެ. ހާއްސަކޮށް ފްރާންސްގެ ކުރިއަށް ކުޅޭ ހަތަރު ކުޅުންތެރިންގެ ހުނަރާއި ދުވެލި ހުއްޓުވުމަކީ ސްޕޭންގެ ޑިފެންސަށް އޮތް އެންމެ ބޮޑު އިމްތިހާނެވެ.
އެހެންނަމަވެސް، ފްރާންސްގެ މި ވަރުގަދަ ހަމަލާތަކުން ސަލާމަތްވުމަށް ސްޕޭނުން ގެންގުޅޭނެ އެންމެ ބޮޑު ހަތިޔާރަކީ ބޯޅަ ހިފެހެއްޓުމުގެ މޮޅު ގޭމްޕްލޭނެވެ. އެންމެ ފަހުން ކުޅުނު ޔޫރޯ އާއި ނޭޝަންސް ލީގުގައި ވެސް ފްރާންސްގެ މައްޗަށް ސްޕޭނުން ކުރިހޯދި ސަބަބަކީ ފްރާންސްގެ ކުޅުންތެރިންނަށް ބޯޅަ ނުލިބޭނެހެން ދަނޑުމަތީގައި ބޯޅަ ހިފަހައްޓައިގެން ކުޅުންކަން ހަނދާންކޮށްދެމުން ބައެނާ ބުނީ، މިރޭގެ މެޗުގައި ވެސް އެންމެ ބޮޑު އިސްކަމެއް ދޭނީ ބޯޅަ އަތުގައި ބާއްވައިގެން މެޗު ޑޮމިނޭޓް ކުރުމަށް ކަމަށެވެ.
ކޮމެންޓް (0)
ލޯޑް ކުރަމުން...