ކައުންސިލް އެކަހެރިކޮށްގެން ހުޅުމާލެއަށް ކުރިއެރުމެއް ނެތް: މޭޔަރު
މާލެ ސަރަހައްދުގެ ތަރައްގީގެ ކަންކަން އެއްވެސް އިދާރާއަކުން ވަކިވަކިން ނިންމައިގެން ކުރިއަށް ނުގެންދެވޭނެ ކަމަށާއި، ހުޅުމާލެއާއި މާލެއަކީ ބަދަހި ގުޅުމަކުން ގުޅިފައިވާ ދެ ތަން ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
މޭޔަރު މިހެން ވިދާޅުވީ މާލެ ސިޓީ ކައުންސިލުން ބޭއްވި މަޝްވަރާ ބައްދަލުވުމެއްގެ ތެރެއިން، ރައްޔިތުންގެ މަޖިލީހުގެ ކުރީގެ މެންބަރު އަލީ ނިޔާޒު ފާހަގަކުރެއްވި ކަންބޮޑުވުންތަކަކަށް އިޝާރާތް ކުރައްވަމުންނެވެ. ނިޔާޒު ވިދާޅުވި ގޮތުގައި ހުޅުމާލޭގެ މާސްޓާ ޕްލޭން ތަންފީޒު ކުރަމުންދާއިރު އެ ސަރަހައްދުގެ މައްޗަށް ސިޓީ ކައުންސިލްގެ އެއްވެސް ބާރެއް ނެތުމަކީ މުޅި ދައުލަތް ފެއިލްވެފައިވާ ކަމުގެ ހެއްކެކެވެ. އަދި ހުޅުމާލޭގެ ތަރައްގީގެ ޕްލޭން މާލޭގެ މާސްޓާ ޕްލޭނާ ގުޅިފައިވާ މިންވަރާ ބެހޭގޮތުންވެސް އޭނާ ވަނީ ސުވާލު އުފައްދަވާފައެވެ.
މިކަމާ ގުޅިގެން އާޒިމް އިތުރަށް ވިދާޅުވީ މާލެއާއި ހުޅުމާލޭގެ ތަރައްގީގެ މަޝްރޫއުތައް ބައްޓަން ކުރުމުގައި މާލެ ސިޓީ ކައުންސިލް ބާކީ ނުކުރެވޭނެ ކަމަށެވެ. މާލެއަށް ދިމާވެފައިވާ ޓްރެފިކްގެ ބޮޑެތި މައްސަލަތަކާއި ބޯހިޔާވަހިކަމުގެ ދަތިތަކަށް ދާއިމީ ހައްލެއް ހޯދުމަށްޓަކައި ހުޅުމާލެއަކީ ކޮންމެހެން މުހިންމު ސަރަހައްދެއް ކަމަށް އޭނާ ފާހަގަކުރެއްވިއެވެ. މިފަދަ ބޮޑެތި މައްސަލަތަކަށް ހައްލު ހޯދުމަށްޓަކައި ސަރުކާރާ ގުޅިގެން މަސައްކަތް ކުރުމަށް ސިޓީ ކައުންސިލް އަބަދުވެސް އޮތީ ތައްޔާރަށް ކަމަށާއި، މި މައްސަލަތަކާ ގުޅޭގޮތުން މަޝްވަރާ ކުރުމަށް ރައީސުލްޖުމްހޫރިއްޔާއަށް މިހާރު ރަސްމީކޮށް ސިޓީއެއް ފޮނުއްވާފައިވާނެ ކަމަށްވެސް މޭޔަރު ވިދާޅުވިއެވެ.
