ހުޅުމާލޭގެ ކުދި އަދި ބޮޑެތި މަގުތަކުގައި ހިނގާބިނގާވެ އުޅޭ މީހުންނަށް ހާއްސަކޮށްފައިވާ ދުވާރުތަކުގައި އުޅަނދުތައް ޕާކުކުރުމުގެ މައްސަލަ ދުވަހުން ދުވަހަށް ބޮޑުވަމުންދާތީ، އެފަދަ ސަރަހައްދުތަކުގައި ގަވާއިދާ ހިލާފަށް އުޅަނދު ޕާކުނުކުރުމަށް މޯލްޑިވްސް ޕޮލިސް ސާވިސްއިން މިއަދު ވަނީ ހަރުކަށި އިލްތިމާސެއް ކުރައްވާފައެވެ. މި މައްސަލައިގައި އާންމުންގެ ޝަކުވާތައް ވަރަށް ބޮޑަށް އިތުރުވެފައިވާއިރު، ފުލުހުން ވަނީ މަގުތައް ބޭނުންކުރާ ފަރާތްތަކުން ގާނޫނަށް ބޯލެނބުމަށް ބާރުއަޅުއްވާފައެވެ.
ފުލުހުން ހަނދާންކޮށްދެއްވި ގޮތުގައި، އެއްގަމު ދަތުރުފަތުރުގެ ޤާނޫނުގެ 55 ވަނަ މާއްދާގައި ބަޔާންކޮށްފައިވާ ފަދައިން ފައިމަގުގައި ހިނގުމަށް ހާއްސަކުރެވިފައިވާ ދުވާރުތަކާއި ސަރަހައްދުތަކުގައި، އިންސާނީ ހަކަތަ ބޭނުންކޮށްގެން ދުއްވާ ފުރޮޅުލީ ގޮނޑި ފިޔަވައި އެހެން އެއްވެސް ބާވަތެއްގެ އުޅަނދެއް ދުއްވުމަކީ ނުވަތަ ޕާކުކުރުމަކީ ގާނޫނީގޮތުން މަނާކަމެކެވެ. އެހެންނަމަވެސް ކުޑަކުދިންގެ ޕްރޭމާއި، ނުކުޅެދުންތެރިކަން ހުންނަ ފަރާތްތަކުން ބޭނުންކުރާ ފުރޮޅުލީ ގޮނޑި ފަދަ ތަކެތި މި މަނާކުރުމުން އިސްތިސްނާވާނެއެވެ.
މި މައްސަލައާ ގުޅިގެން ހިނގާ މީހުންނަށާއި، ހާއްސަކޮށް ފުރޮޅުލީ ގޮނޑި ބޭނުންކުރާ ނުކުޅެދުންތެރިކަން ހުންނަ ފަރާތްތަކަށް މަގު ބޭނުންކުރުމުގައި ބޮޑެތި ހުރަސްތަކެއް ކުރިމަތިވަމުންދާކަން ފާހަގަކުރެވެއެވެ. މީގެ ކުރިންވެސް ފުލުހުންނާއި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގުޅިގެން ހުޅުމާލޭގެ ދުވާރުތައް ހުސްކުރުމަށާއި، ގަވާއިދާ ހިލާފަށް ޕާކުކުރާ އުޅަނދުތަކުގައި ސްޓިކާ ޖެހުމާއި ޓޯކުރުމުގެ ހާއްސަ އޮޕަރޭޝަންތަކެއް ހިންގާފައިވެއެވެ. މަގުތަކުގެ އަމާންކަން ކަށަވަރުކުރުމަށްޓަކައި، މިފަދަ ނޭދެވޭ އަމަލުތަކުން ދުރުހެލިވުމަށް ފުލުހުން ވަނީ އެންމެހައި ރައްޔިތުންނަށް ގޮވާލައްވާފައެވެ.
ކޮމެންޓް (0)
ލޯޑް ކުރަމުން...