އިނގިރޭސިވިލާތުގެ އިމާމެއްގެ ގޭގައި މީހަކު ހުޅުޖަހައިފި

އިނގިރޭސިވިލާތުގެ އުތުރުގެ ސިޓީއެއްގައި ދިރިއުޅޭ އިމާމެއްގެ އާއިލީ ގޭގައި ހުޅުޖެހި މޫނުމަތި ނިވާކޮށްގެން ހުރި މީހަކު ހޯދުމުގެ މަސައްކަތް އެގައުމުގެ ފުލުހުން ފަށައިފިއެވެ.

ބޯލްޓަންގެ ތޮައްޔިބާ މިސްކިތުގެ އިސްލާމީ ތައުލީމާބެހޭ އިސްވެރިޔާ ހަސަން ފަޓޭލް ވަނީ އޭނާގެ ގޭގެ ކުރިމަތީގައި ރޯކޮށްލި ބިރުވެރި މަންޒަރު ފެންނަ ސީސީޓީވީ ފޫޓޭޖް އާންމުކޮށްފައެވެ. އެ ވީޑިއޯއިން ފެންނަ ގޮތުގައި، މޫނުމަތި ނިވާކޮށްގެން ހުރި މީހަކު ގޭގެ ބޭރުގައި އަލިފާން ރޯކުރުމަށްފަހު، ކުޑަދޮރެއް ތަޅާލައި، ގޭގެ އެތެރެއަށް އަވަހަށް އަލިފާން ހިފާ ފަދަ ދިޔާ އެއްޗެއް ޖަހައެވެ.

ބުދަ ދުވަހުގެ އިރުއޮއްސުނު ވަގުތު ހިނގި މި ހާދިސާއަކީ، އިނގިރޭސިވިލާތުގައި ހިޖުރަވެރިންނާ ދެކޮޅަށް ފަތުރަމުންދާ ފިތުނަވެރި ވާހަކަތަކާ ގުޅިގެން ހަރުކަށި ކަނާތު ފިޔައިގެ ފަރާތްތަކުން ހިންގަމުންދާ ހަމަނުޖެހުންތަކުގެ ތެރެއިން ހިނގި ކަމެކެވެ.

ފުލުހުން މި ހާދިސާ ސިފަކޮށްފައިވަނީ ވަކި އަމާޒަކަށް ބަލައިގެން ދީފައިވާ ހަމަލާއެއްގެ ގޮތުގައެވެ. އަދި އާންމުންނަށް މިކަމުގެ ސަބަބުން ނުރައްކަލެއް ނެތް ކަމަށް ވެސް ފުލުހުން ބުނެފައިވެއެވެ. މި ހާދިސާގައި ގޭގައި ތިބި އެންމެން ސަލާމަތްވި ނަމަވެސް، ލިބުނު ނަފްސާނީ ހާސިލާއި މާލީ ގެއްލުން ބޮޑެވެ.

ފަޓޭލް ވިދާޅުވި ގޮތުގައި މި ހަމަލާގެ ސަބަބުން އޭނާގެ އާއިލާ ތިބީ ވަރަށް ބޮޑު ސިހުމެއްގައެވެ. “މިއީ ގަސްތުގައި ބަޔަކު މަރާލުމުގެ ނިޔަތުގައި ހިންގާފައިވާ ނުރައްކާތެރި އަމަލެއް. މީގެ ސަބަބުން އަޅުގަނޑުމެންގެ ގެޔަށާއި، އާއިލާގެ މެންބަރުންނާއި ކުޑަކުދިންނަށް ނަފްސާނީ ގޮތުން ވަރަށް ބޮޑު އަސަރެއް ކޮށްފި،” އޭނާ ނެރުއްވި ބަޔާނެއްގައި ވިދާޅުވިއެވެ.

ފަޓޭލް އިތުރަށް ފާހަގަކުރެއްވި ގޮތުގައި، މި ހަމަލާއަކީ “ނަފުރަތުގެ ކުށެއް” (hate crime) ގެ ގޮތުގައި ފުލުހުން އަދި ކަނޑައަޅާފައި ނުވާތީ އެކަމާ ސުވާލު އުފެދެއެވެ. އެހެން މިފަދަ ހާދިސާތަކާ އެއްގޮތަށް މިކަން ވެސް ސީރިއަސްކޮށް ބަލަންޖެހޭނެ ކަމަށް އޭނާ ވިދާޅުވިއެވެ.

ޑިޓެކްޓިވް ޗީފް އިންސްޕެކްޓަރ މައިކް ޝާޕްލްސް ވިދާޅުވީ، މި ހާދިސާގެ ސަބަބުން މުޖުތަމައުގެ ތެރޭގައި ކަންބޮޑުވުން އުފެދޭނެކަން ގަބޫލުކުރާ ކަމަށާއި، ކުށްވެރިން ހޯދުމުގެ މަސައްކަތް ވަރަށް ހަލުވިކަމާއެކު ކުރިއަށްދާ ކަމަށެވެ.

2025 ވަނަ އަހަރުގެ އޮކްޓޯބަރު މަހު އާންމުކުރި ތަފާސްހިސާބުތަކުން ދައްކާ ގޮތުގައި، މުސްލިމުންނަށް އަމާޒުކޮށް ހިންގާ ދީނީ ނަފުރަތުގެ ކުށްތައް ވަނީ 19 އިންސައްތަ އިތުރުވެފައެވެ. މިއީ ހަރުކަށި ފިކުރުގެ ސިޔާސީ ޕާޓީތަކަށް އޮތް ތާއީދު އިތުރުވެ، ހިޖުރަވެރިންނާ ދެކޮޅަށް ކުރާ މުޒާހަރާތައް ގިނަވެފައިވާ ދަނޑިވަޅެކެވެ.

މީގެ އިތުރުން، މި ހަފުތާގައި އުތުރު އަޔަލޭންޑްގެ ބެލްފާސްޓްގައި ވެސް ހިޖުރަވެރިންނާ ދެކޮޅަށް ބޮޑެތި ހަމަނުޖެހުންތަކެއް ވަނީ ހިނގާފައެވެ. އަދި މިދިޔަ ހަފުތާގައި ސައުތުހެމްޕްޓަންގައި ސިކު ދީނުގެ މީހަކަށް މަރުގެ ހުކުމެއް އިއްވުމާ ގުޅިގެން ވެސް ފުލުހުންނާއި އާންމުންގެ ދެމެދުގައި ކުރިމަތިލުންތަކެއް ހިނގާފައިވެއެވެ.