އެބޯލާ ބަލިމަޑުކަން ކޮންޓްރޯލް ނުވެ، މަރުވި މީހުންގެ އަދަދު 220 އަށް
އެބޯލާ ބަލިމަޑުކަން ކޮންޓްރޯލް ނުވެ، މަރުވި މީހުންގެ އަދަދު 220 އަށް އަރައިފިއެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) ގެ ޑިރެކްޓަރ ޖެނެރަލް ޓެޑްރޮސް އަދަނޮމް ގެބްރެޔޭސޫސް ވިދާޅުވީ، މިހާރު ފެތުރެމުންދާ އެބޯލާ ބަލިމަޑުކަމުގައި ޝައްކުކުރެވޭ މަރުގެ އަދަދު 220 އަށް އަރާފައިވާ ކަމަށާއި، ބަލި ޖެހިފައިވާ މީހުން ދެނެގަތުން ލަސްވުމުގެ ސަބަބުން ބަލި ކޮންޓްރޯލް ކުރުމުގައި ރެސްޕޮންޑަރުންނަށް ބޮޑެތި ގޮންޖެހުންތަކާ ކުރިމަތިވަމުންދާ ކަމަށެވެ. ޓެޑްރޮސް ވިދާޅުވި ގޮތުގައި، ސިއްހީ އިދާރާތަކުން އޮޕަރޭޝަންތައް ވަރުގަދަކުރަމުންދިޔަ ނަމަވެސް، މި ވަގުތު ބަލިމަޑުކަން ފެތުރެމުންދާ ދުވެލި މާ އަވަހެވެ. އެހެންކަމުން ޑިމޮކްރެޓިކް ރިޕަބްލިކް އޮފް ދަ ކޮންގޯ (ޑީއާރްސީ) އާ ބޯޑަރު ހިއްސާކުރާ ގައުމުތަކުން މިކަމަށް ވަގުތުން ފިޔަވަޅު އެޅުމަށް އޭނާ ވަނީ އިލްތިމާސް ކުރައްވާފައެވެ.
މި ބަލިމަޑުކަން މިހާރު ވަނީ ޑީއާރްސީގެ ބޯޑުން ބޭރަށް، އަވަށްޓެރި ޔުގެންޑާއަށް ވެސް ފެތުރެން ފަށާފައެވެ. ޔުގެންޑާގެ މިނިސްޓްރީ އޮފް ހެލްތުން ހާމަކުރި ގޮތުގައި، ވެރިރަށް ކަމްޕާލާގެ އަމިއްލަ ސިއްހީ މަރުކަޒެއްގައި މަސައްކަތްކުރާ ދެ ސިއްހީ އެހީތެރިއަކު އެބޯލާއަށް ޕޮޒިޓިވްވުމާ އެކު، އެ ގައުމުން ބަލި ޖެހުނު މީހުންގެ ޖުމްލަ އަދަދު ވަނީ ހަތަކަށް އަރާފައެވެ. ޑަބްލިޔުއެޗްއޯގެ ތަފާސްހިސާބުތައް ދައްކާ ގޮތުން، ޑީއާރްސީގައި ބަލި ޖެހިފައިވާ ކަމަށް ޝައްކުކުރެވޭ 900 އަށް ވުރެ ގިނަ ކޭސް މިހާތަނަށް ވަނީ ދެނެގަނެވިފައެވެ.
މި ފަހަރު ފެތުރެމުންދަނީ އެބޯލާގެ ވަރަށް މަދުން ނޫނީ ނުފެންނަ “ބުންޑިބުގްޔޯ” (Bundibugyo) ކިޔާ ސްޓްރެއިންއެކެވެ. މިއީ މިހާތަނަށް ވެކްސިނެއް ނުވަތަ ވަކި ހާއްސަ ފަރުވާއެއް ހޯދިފައިނުވާ ނުރައްކާތެރި ވައިރަހެކެވެ. މި ބަލީގެ ނުރައްކާތެރިކަން ބޮޑުވުމުގެ ސަބަބުން، ޑަބްލިޔުއެޗްއޯއިން ވަނީ މި ބަލިމަޑުކަމަކީ ބައިނަލްއަގުވާމީ ސަމާލުކަމަށް އައިސްފައިވާ ކުއްލި ސިއްހީ ނުރައްކަލެއްގެ ގޮތުގައި ކަނޑައަޅާފައެވެ. މި ބަލިމަޑުކަމުގެ މައިގަނޑު މަރުކަޒަކީ ޑީއާރްސީގެ އިތޫރީ ޕްރޮވިންސް ނަމަވެސް، މިހާރު އެ ސަރަހައްދާ 200 ކިލޯމީޓަރު ދުރަށް ވައިރަސް ވަނީ ފެތުރިފައެވެ.
ބަލިމަޑުކަން ފެތުރެމުންދާ ދަނޑިވަޅުގައި، ޑީއާރްސީގެ ބައެއް ސަރަހައްދުތަކުގައި އާންމުންގެ މެދުގައި ނުތަނަވަސްކަމާއި ހަމަނުޖެހުން ވަނީ އުފެދިފައެވެ. އެގޮތުން، ބަލީގައި މަރުވާ މީހުން ވަޅުލުމުގެ ކަންކަން ސަރުކާރުގެ ބެލުމުގެ ދަށުން ކުރިއަށްގެންދާތީ، އާއިލާތަކުގެ ސަގާފީ އާދަކާދަތަކާ ހެދި ބައެއް އާންމުން ވަނީ މެޑިކަލް ސެންޓަރުތަކަށް ހަމަލާދީފައެވެ.
މޮންގްބުވާލޫ ޖެނެރަލް ހޮސްޕިޓަލަށް ހަތިޔާރުއެޅި ޒުވާނުންތަކެއް ވަދެ ބަޑީގެ ހަމަލާތަކެއް ދީފައިވާއިރު، އޭގެ ކުރީ ދުވަހު “ޑޮކްޓާސް ވިތައުޓް ބޯޑާސް” އިން ގާއިމުކުރި ފެސިލިޓީއެއްގައި ހުރި ފޭލިގެއެއްގައި ރޯކޮށްލުމުން، ބަލިޖެހިފައިވާ ކަމަށް ޝައްކުކުރެވޭ 18 މީހަކު ވަނީ އެ ތަނުން ފިލާފައެވެ. ހާލަތު ކޮންޓްރޯލް ކުރުމުގެ ގޮތުން ޑީއާރްސީގެ ސަރުކާރުން މިހާރު ވަނީ ޖަނާޒާތަކާއި 50 މީހުންނަށް ވުރެ ގިނަ މީހުން އެއްވާ އެއްވުންތައް މަނާކޮށްފައެވެ.
