ގެއްލުނު ޑައިވަރުން ހޯދުމުގެ މަސައްކަތަށް ފިންލޭންޑްގެ ޚާއްޞަ ޓީމެއް ރާއްޖެ އަތުވެއްޖެ

ވ. އަތޮޅު އަލިމަތާ ރިސޯޓު ކައިރިއަށް ޑައިވިންއަށް ގޮސް އުޅެނިކޮށް ގެއްލުނު އިޓަލީގެ ފަތުރުވެރިން ހޯދުމަށް ސިފައިން ކުރިއަށްގެންދާ ނުރައްކާތެރި އޮޕަރޭޝަނަށް އެހީތެރިވުމަށްޓަކައި، ފިންލެންޑްގެ ތަޖުރިބާކާރުންގެ ޓީމެއް ރާއްޖެ އަތުވެއްޖެއެވެ.

ސަރުކާރުގެ އިސްތަރުޖަމާނު މުހައްމަދު ހުސައިން ޝަރީފް (މުންދު) ވަނީ އެ ޓީމު މިހާރު ރާއްޖެ އައިސްފައިވާކަން ކަށަވަރުކޮށްދެއްވާފައެވެ.

މި ހާދިސާ ހިނގާފައިވަނީ މިމަހުގެ 14 ވަނަ ދުވަހު، ދިވެހި އެއްވެސް ޑައިވަރަކާ ނުލައި އެ ފަތުރުވެރިން މޫދަށް ފޭބި ފަހުންނެވެ. އެމީހުން ގެއްލިގެން ރިޕޯޓްކޮށްފައިވަނީ އެދުހުގެ މެންދުރު 13:15 އެހާއިރު ކަމަށްވާއިރު، އެވަގުތުން ފެށިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއި ކަމާގުޅުންހުރި ފަރާތްތަކުން ދިޔައީ ކަނޑުގެ ސަރަހައްދު ބަލަމުންނެވެ.

އެގޮތުން ހިންގި ހޯދުމުގެ އޮޕަރޭޝަނުގައި، ގެއްލުނު މީހުންގެ ތެރެއިން އެކަކު ނިޔާވެފައި އޮއްވާ ވަނީ ފެނިފައެވެ. އޭނާ ފެނިފައިވަނީ ހަމަ އެދުވަހުގެ ވަގުތެއްގައި، ކަނޑުގެ 60 މީޓަރު އަޑީގައި ހުރި ހޮހަޅައެއް (ކޭވްއެއް) ގެ ތެރެއިންނެވެ.

މި ހާދިސާއާ ގުޅިގެން އެމްއެންޑީއެފުން އެ ސަރަހައްދުގައި “ހައި ރިސްކު” އޮޕަރޭޝަނެއް ކުރިއަށްގެންގޮސްފައިވާއިރު، މިއަދުވެސް އަށް ޑައިވަރަކު އެ ސަރަހައްދުގައި ހަރަކާތްތެރިވިއެވެ. ނަމަވެސް، މި ނުރައްކާތެރި ހޯދުމުގެ ތެރޭގައި ހާލު ދެރަވި ސިފައިންގެ ޑައިވަރު، ސާޖަންޓް ފަސްޓް ކްލާސް މުހައްމަދު މަހުދީ ވަނީ ފަރުވާ ދެމުންދަނިކޮށް ނިޔާވެފައެވެ.

ސިފައިންގެ ޑައިވަރު ނިޔާވުމާ ގުޅިގެން މިހާރު މި އޮޕަރޭޝަން ވަގުތީގޮތުން މެދުކަނޑާލާފައިވާއިރު، ދެން މި މަސައްކަތް ކުރިއަށްގެންދާނީ އިޓަލީ ސަރުކާރުން ހަމަޖައްސާފައިވާ އެ ގައުމުގެ “ބޭން” ކުންފުނީގެ ތަޖުރިބާކާރުންނާއި، އަލަށް ރާއްޖެއައި ފިންލެންޑްގެ ޓީމާ ގުޅިގެންނެވެ.