ޔަމަނުގެ ސީޔޫންގައި ސައުދީން ސެކަންޑަރީ ސްކޫލެއް ބިނާކުރަނީ

ޔަމަނުގެ ސީޔޫންގައި ސައުދީ ޑިވެލޮޕްމަންޓް އެންޑް ރީކޮންސްޓްރަކްޝަން ޕްރޮގްރާމް ފޯ ޔަމަން (އެސް.ޑީ.އާރު.ޕީ.ވައި) ގެ ފަރާތުން ބިނާކުރާ “އަލް-ސައްބާން މޮޑެލް ސެކަންޑަރީ ސްކޫލް” ގެ އަމަލީ މަސައްކަތްތައް ބާރުމިނުގައި ކުރިއަށް އެބަދެއެވެ.

ސައުދީ ޕްރެސް އެޖެންސީ (އެސް.ޕީ.އޭ) އިން ރިޕޯޓުކޮށްފައިވާ ގޮތުގައި، މިއީ ޔަމަނުގެ ތައުލީމީ ދާއިރާ ކުރިއެރުވުމަށާއި، އެކި ސަރަހައްދުތަކުގައި ކިޔަވައިދޭނެ އެކަށީގެންވާ މާހައުލެއް ގާއިމުކުރުމަށް ސައުދީ އަރަބިއްޔާއިން ކުރަމުންދާ މަސައްކަތުގެ ތެރެއިން ހިންގޭ މުހިންމު މަޝްރޫއެކެވެ. މި ސްކޫލަކީ ޒަމާނީ ކްލާސްރޫމްތަކާއި، ސައިންސް ލެބޯޓްރީތަކުގެ އިތުރުން ދަރިވަރުންގެ އުނގެނުމަށް ބޭނުންވާނެ އެންމެހައި ޒަމާނީ ވަސީލަތްތައް ހިމެނޭހެން ފަރުމާކުރެވިފައިވާ ތަނެކެވެ.

ހަޟްރަމައުތު ޕްރޮވިންސްގައި ބިނާކުރާ މިފަދަ ހަތަރު ސްކޫލުގެ ތެރެއިން އެއް ސްކޫލަކީ މިއީއެވެ. މުޅި ޔަމަނުގައި މިފަދަ 30 އަށްވުރެ ގިނަ މަޝްރޫއު އެސް.ޑީ.އާރު.ޕީ.ވައި އިން އަންނަނީ ހިންގަމުންނެވެ. މީގެ އިތުރުން، ހަޟްރަމައުތުގެ މުކައްލާ، ސީޔޫން، ދޯއަން އަދި ވާދީ އަލް-އައިން ފަދަ ސަރަހައްދުތަކުގައި ތައުލީމީ ފުރުސަތުތައް ފުޅާކުރުމަށްޓަކައި އިއާދަކުރަނިވި ހަކަތައިގެ މަޝްރޫއުތައް ވެސް ވަނީ ފަށާފައެވެ.

މިދިޔަ ޖެނުއަރީ މަހު އެ ޕްރޮގްރާމުން ވަނީ ހަޟްރަމައުތު އަދި ސީޔޫން ޔުނިވާސިޓީގައި ކޮމްޕިއުޓަރ ސައިންސް އާއި އައި.ޓީ ކޮލެޖުތައް ގާއިމުކުރުމަށާއި، އެގްރިކަލްޗަރަލް ވެޓެރިނަރީ ޓެކްނިކަލް އިންސްޓިޓިއުޓް މަރާމާތުކޮށް ހުޅުވުމަށް ނިންމާފައިވާކަން އިއުލާނުކޮށްފައެވެ.

މި މަސައްކަތްތަކުގެ މައިގަނޑު މަގުސަދަކީ ޔަމަނުގެ ފަންނީ އަދި މަތީ ތައުލީމު ހަރުދަނާކޮށް، ވަޒީފާގެ ބާޒާރަށް ބޭނުންވާ ފަދަ ހުނަރުވެރި ޖީލެއް ބިނާކުރުމެވެ. މި މަޝްރޫއުތަކުގެ ސަބަބުން ހަޟްރަމައުތުގެ ތައުލީމީ ފެންވަރު މަތިވެ، ދަރިވަރުން ބާރުވެރިކުރުވުމަށާއި ގައުމުގެ ކުރިމަގު ބިނާކުރުމަށް ބޭނުންވާ ފަންނީ މަސައްކަތްތެރިން އުފެއްދުމަށް ބޮޑު އެހީތެރިކަމެއް ލިބިގެންދާނެއެވެ.