އިންތިޚާބުގެ ކެމްޕެއިން ނިންމުމަށް ޕީއެންސީ އާއި އެމްޑީޕީން މިއަދު ބޮޑު ހިނގާލުމެއް ބާއްވަނީ
މާދަމާ ބޭއްވުމަށް ހަމަޖެހިފައިވާ މުހިންމު އިންތިޚާބުތަކުގެ ކެމްޕެއިން ނިންމާލުމުގެ ގޮތުން، ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އާއި އިދިކޮޅު މައި ޕާޓީ، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން މިއަދު ހަވީރު މާލޭގައި ބޮޑު ހިނގާލުމެއް ބޭއްވުމަށް ނިންމައިފިއެވެ.
މާދަމާ ރާއްޖޭގައި ކުރިއަށްދާނީ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބުގެ އިތުރުން، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާ މެދު ރައްޔިތުންގެ ފެންނަނުފެންނަ ވޯޓު ނެގުމެވެ.
ސަރުކާރު ހިންގާ ޕީއެންސީން ބާއްވާ ހިނގާލުން ފެށުމަށް ހަމަޖެހިފައިވަނީ މިއަދު ހަވީރު 15:45 ގައި ބޮޑުތަކުރުފާނު މަގުގައި ހުންނަ އެ ޕާޓީގެ މައި ޖަގަހަ ކުރިމަތިންނެވެ. މި ހިނގާލުމުގައި ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގަންނަވާނެ ކަމަށް އެ ޕާޓީން ވަނީ ބުނެފައެވެ. ޕީއެންސީން ވަނީ މި ހަރަކާތުގައި ވީހާވެސް ގިނަ ރައްޔިތުން ބައިވެރިވުމަށް އެދިފައެވެ.
ހަމައެއާއެކު، އިދިކޮޅު އެމްޑީޕީން ބާއްވާ ކެމްޕެއިން ނިންމުމުގެ ހިނގާލުން ފެށުމަށް ހަމަޖެހިފައިވަނީ މިއަދު ހަވީރު 4:00 ގައި އާޓިފިޝަލް ބީޗުންނެވެ. އެމްޑީޕީން ބުނެފައިވަނީ މި ހިނގާލުމަކީ ސަރުކާރަށް “ނޫނެކޭ” ބުނެ، ޤައުމުގެ މިސްރާބު ހަމަމަގަށް އެޅުވުމަށް ބާއްވާ ހަރަކާތެއް ކަމަށެވެ. އެ ޕާޓީންވެސް ވަނީ ޤައުމުގެ ހެވާއި ލާބައަށް އެދޭ ވީހާވެސް ގިނަ ރައްޔިތުން މި ހިނގާލުމުގައި ބައިވެރިވުމަށް ގޮވާލާފައެވެ.
މާދަމާ ބޭއްވޭ މި އިންތިޚާބުތަކަކީ ޤައުމުގެ ސިޔާސީ މަސްރަޙުގައި މުހިންމު ނިންމުންތަކެއް ނިންމިގެންދާނެ އިންތިޚާބުތަކަކަށް ވުމާއެކު، ދެ ޕާޓީންވެސް ދަނީ ފޯރިއާއެކު ކެމްޕެއިންގެ ފަހު ހަރަކާތްތައް ކުރިއަށް ގެންދަމުންނެވެ.
