ތެލުގެ އަގު 119 ޑޮލަރަށްވުރެ މައްޗަށް އުފުލިއްޖެ
އިޒްރޭލުން އީރާނުގެ ސައުތު ޕާސް ގޭސް ފީލްޑަށް ދިން ހަމަލާއާ ގުޅިގެން، ބަދަލުހިފުމުގެ ގޮތުން މެދުއިރުމަތީގެ އެކި ސަރަހައްދުތަކުގައި ހުރި ހަކަތަ އުފައްދާ މަރުކަޒުތަކަށް އީރާނުން ހަމަލާދިނުމާ ގުޅިގެން، ބްރެންޓް ކުރޫޑް ތެލުގެ އަގު ބުރާސްފަތި ދުވަހު 119 ޑޮލަރަށްވުރެ މައްޗަށް އަރައިފިއެވެ. މިއީ މި ހަނގުރާމައިގައި މަސްރަހު ވަރަށް ބޮޑަށް ގޯސްވެގެންދިޔަ ދަނޑިވަޅެކެވެ.
ސައުދީ ގަޑިން ހަވީރު 4:21 ހާއިރު، ބްރެންޓް ފިއުޗާސްގެ އަގު ވަނީ 6.84 ޑޮލަރު (ނުވަތަ 6.37 އިންސައްތަ) މަތިވެ، ފީފާއެއް 114.20 ޑޮލަރަށް އަރާފައެވެ. މީގެ ކުރިން ބްރެންޓްގެ އަގު 11 ޑޮލަރަށްވުރެ ބޮޑަށް އުފުލި، ފީފާއެއްގެ އަގު 119.13 ޑޮލަރަށް އެރިއެވެ. މިއީ މާޗް 9 ވަނަ ދުވަހަށްފަހު ތެލުގެ އަގު މިހާ މައްޗަށް ދިޔަ ފުރަތަމަ ފަހަރެވެ.
އެމެރިކާގެ ވެސްޓް ޓެކްސަސް އިންޓަރމީޑިއަޓް (WTI) ކުރޫޑްގެ އަގު 56 ސެންޓް (ނުވަތަ 0.58 އިންސައްތަ) މަތިވެ، ފީފާއެއް ހުރީ 96.88 ޑޮލަރުގައެވެ. މީގެ ކުރިން މިއަގު 100.02 ޑޮލަރަށްވެސް އެރިއެވެ. ފާއިތުވި 11 އަހަރުގެ ތެރޭގައި ބްރެންޓް އާއި WTI ގެ އަގުގެ ދެމެދުގައި ހުރި ފަރަގު މިހާ ބޮޑުވި މިއީ ފުރަތަމަ ފަހަރެވެ.
މީގެ އިތުރުން، މެދުއިރުމަތީގެ މިންގަނޑެއް ކަމަށްވާ ދުބާއީ އަދި އޮމާން ތެލުގެ ޕްރީމިއަމް އަގުތައް ފީފާއަކަށް 65 ޑޮލަރަށް އަރައި، ރެކޯޑް މިންވަރަކަށް ވަނީ އުފުލިފައެވެ.
އެމެރިކާގެ މަރުކަޒީ ބޭންކުން ބުދަ ދުވަހު އިންޓްރެސްޓް ރޭޓް ބަދަލެއް ނުގެނެސް ހިފަހައްޓާފައިވާއިރު، ހަނގުރާމައިގެ ސަބަބުން އިންފްލޭޝަން މަތިވެދާނެ ކަމަށް ވަނީ ލަފާކޮށްފައެވެ.
ނޮވެމްބަރު މަހު ބޭއްވުމަށް ހަމަޖެހިފައިވާ އިންތިޚާބުގެ ކުރިން ތެލުގެ އަގު ކުޑަކުރުމަށް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ދަނީ މަސައްކަތް ކުރަމުންނެވެ. މިގޮތުން، ޓޭންކަރުތަކުގައި ހުރި އީރާނުގެ ގާތްގަނޑަކަށް 140 މިލިއަން ފީފާ ތެލަށް ދީފައިވާ ދަތިކުރުމުގެ ފިޔަވަޅުތައް އުވާލައި، ބާޒާރަށް އެ ތެލަށް ނެރުމުގެ ފުރުސަތު އޮތް ކަމަށް ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވިއެވެ.
އީރާނުގެ ސައުތު ޕާސް ގޭސް ފީލްޑަށް އިޒްރޭލުން ހަމަލާދިން ނަމަވެސް، އެކަމުގައި އެމެރިކާއާއި ގަތަރުގެ ބައިވެރިވުމެއް ނެތް ކަމަށް ބުދަ ދުވަހުގެ ރޭ ޓްރަމްޕް ވިދާޅުވިއެވެ. ސައުތު ޕާސް އަކީ ދުނިޔޭގައި އޮތް އެންމެ ބޮޑު ގޭސް ފީލްޑްގެ އީރާނަށް ނިސްބަތްވާ ފަޅިއެވެ. މި ފީލްޑްގެ އަނެއް ފަޅި އޮންނަނީ އެމެރިކާގެ ބައިވެރިއެއް ކަމަށްވާ ގަތަރުގެ ސަރަހައްދުގައެވެ.
ޓްރަމްޕް އިތުރަށް ވިދާޅުވީ، އީރާނުން ގަތަރަށް ހަމަލާ ނުދޭހާ ހިނދަކު އިޒްރޭލުން ދެން ސައުތު ޕާސް އަށް ހަމަލާ ނުދޭނެ ކަމަށެވެ. އަދި އީރާނުން ގަތަރާ ދެކޮޅަށް އެއްވެސް ފިޔަވަޅެއް އަޅައިފިނަމަ އެމެރިކާއިން އެކަމަށް ރައްދުދޭނެ ކަމުގެ އިންޒާރުވެސް އޭނާ ދެއްވިއެވެ.
ގަތަރުގެ މައިގަނޑު އެލް.އެން.ޖީ (LNG) މަރުކަޒުތައް ހުންނަ ރައުސް ލައްފާނަށް އީރާނުން ދިން މިސައިލް ހަމަލާތަކުގެ ސަބަބުން ބޮޑެތި ގެއްލުންތަކެއް ލިބިފައިވާ ކަމަށް ގަތަރު އެނާޖީން ބުދަ ދުވަހު ބުނެފައިވެއެވެ. މި ހަމަލާގައި ޝެލް ކުންފުނިން ހިންގާ ދުވާލަކު 140،000 ފީފާ އުފައްދާ “ޕާލް” ގޭސް-ޓޫ-ލިކުއިޑް ޕްލާންޓަށްވެސް ވަނީ ގެއްލުން ލިބި، އުފެއްދުންތައް ހުއްޓިފައެވެ.
މި ހަމަލާތަކާ ގުޅިގެން ޔޫރަޕްގެ ގޭހުގެ އަގުތައްވެސް ވަނީ ފާއިތުވި ތިން އަހަރުގެ ތެރޭގައި ނުދާހާ މައްޗަށް އުފުލިފައެވެ.
