މެޗުގެ އިތުރު ވަގުތުގައި ގޯލުޖަހާ ވުލްވްސް އިން ލިވަޕޫލް ބަލިކޮށްފި

އިނގިރޭސި ޕްރިމިއާ ލީގުގައި ރޭ ކުޅުނު މެޗުގެ ފަހު ވަގުތު ޖެހި ލަނޑާއެކު 2-1 އިން ލިވަޕޫލް ބަލިކޮށް، ވުލްވްސް އިން މުހިންމު މޮޅެއް ހޯދައިފިއެވެ.

ވުލްވްސްގެ ދަނޑުގައި ކުޅުނު މި މެޗުގެ 78 ވަނަ މިނިޓްގައި ރޮޑްރީގޯ ގޯމޭސް އެ ޓީމަށް ލީޑު ނަގައިދީފައިވަނިކޮށް، 83 ވަނަ މިނިޓްގައި މުހައްމަދު ސަލާހު ވަނީ ލަނޑެއް ޖަހައި ލިވަޕޫލަށް ނަތީޖާ އެއްވަރުކޮށްދީފައެވެ.

ނަމަވެސް މެޗުގެ އިތުރު ވަގުތުގެ ހަތަރުވަނަ މިނިޓްގައި ވުލްވްސްގެ އަންޑްރޭ ފޮނުވާލި ހަމަލާއެއް ލިވަޕޫލްގެ ޖޯ ގޯމޭޒް ފައިގައި ޖެހިފައި ބައިކޮޅަށް ވަނުމުން، ވުލްވްސް އަށް ތިން ޕޮއިންޓް ކަށަވަރުވީއެވެ. މިއީ މި ސީޒަނުގައި އިތުރު ވަގުތުގެ ތެރޭގައި ގޯލު ވަދެގެން ލިވަޕޫލަށް މެޗު ގެއްލުނު ފަސްވަނަ ފަހަރެވެ. މި މެޗުގައި ލިވަޕޫލްގެ ކެޕްޓަން ވާޖިލް ވެން ޑައިކް އާއި އެންގުމޯހާ އަށް ލަނޑު ޖަހަން ރަނގަޅު ފުރުސަތުތަކެއް ލިބުނު ނަމަވެސް ބޭނުމެއް ނުކުރެވުނެވެ.

މި ނަތީޖާއާއެކު ލިވަޕޫލަށް ތާވަލުގެ ތިންވަނައަށް އެރުމަށް ލިބުނު ފުރުސަތު ގެއްލި، އެ ޓީމު މިހާރު އޮތީ 29 މެޗުން 48 ޕޮއިންޓާއެކު ފަސްވަނަ މަގާމުގައެވެ. މޮޅުވި ވުލްވްސް އަށް 30 މެޗުން 16 ޕޮއިންޓް ލިބިފައިވާއިރު، އެ ޓީމުން ވަނީ އެންމެ ފަހުން އަމިއްލަ ދަނޑުގައި ކުޅުނު ތިން މެޗުގައިވެސް ވަރުގަދަ ޓީމުތަކާ ދެކޮޅަށް ރަނގަޅު ނަތީޖާތަކެއް ނެރެފައެވެ.