ރަމަޟާން މަހުގެ ތެރޭގައި 240،000 މުޞްޙަފް އުމްރާވެރިންނަށް ބަހައިފި
ސައުދީ ރަސްގެފާނުގެ ހަދިޔާ ޕްރޮގްރާމުގެ ދަށުން، ފާއިތުވި ފެބްރުއަރީ މަހުގެ ތެރޭގައި މަދީނާގެ މީޤާތު މިސްކިތުން އުމްރާވެރިންނަށް ޖުމްލަ 240،000 މުޞްޙަފް ބަހާފައިވާ ކަމަށް ސައުދީ ޕްރެސް އެޖެންސީން ރިޕޯޓްކޮށްފިއެވެ.
މިނިސްޓްރީ އޮފް އިސްލާމިކް އެފެއާޒް، ދައުވާ އެންޑް ގައިޑަންސްގެ މަދީނާ ގޯފިން ކުރިއަށްގެންދިޔަ މި ހަރަކާތަކީ، މަދީނާއަށް ޒިޔާރަތްކުރާ އުމްރާވެރިންނަށާއި ޒިޔާރަތްތެރިންނަށް ޚިދުމަތްކުރުމަށް އެ މިނިސްޓްރީން ކުރަމުންދާ މަސައްކަތްތަކުގެ ތެރެއިން ހިންގުނު ކަމެކެވެ.
މި ހަދިޔާގެ ތެރޭގައި ތަފާތު ސައިޒުތަކުގެ ކީރިތި ޤުރުއާނުގެ މުޞްޙަފްތަކާއި، ދުނިޔޭގެ އެކި ބަސްބަހުން ތަރުޖަމާކޮށްފައިވާ ޤުރުއާނުގެ މާނަ ހިމެނެއެވެ. މި މުޞްޙަފްތަކަކީ ތަފާތު ޤައުމުތަކަށް ނިސްބަތްވާ މުސްލިމުންގެ ބޭނުންތަކަށް ރިޢާޔަތްކޮށް، ކިންގް ފަހުދު ކޮމްޕްލެކްސް ފޯ ދަ ޕްރިންޓިންގ އޮފް ދަ ހޯލީ ޤުރުއާނުން ތައްޔާރުކޮށްފައިވާ މުޞްޙަފްތަކެކެވެ.
ޤުރުއާން ބަހަމުންދިޔަ ސަރަޙައްދުތަކުން ފެނިގެންދިޔައީ ވަރަށް އަސަރުގަދަ މަންޒަރުތަކެކެވެ. މުޞްޙަފްތަކާ ހަވާލުވި ގިނަ އުމްރާވެރިން ވަނީ އެކަމާ ނުހަނު އުފާކުރާކަން ހާމަކޮށްފައެވެ. އަދި ސައުދީ ސަރުކާރުން އެ ފަރާތްތަކަށް ބަހައްޓާ އޯގާތެރިކަމާއި، ދެމުންދާ މެހެމާންދާރީއަށްޓަކައި ޝުކުރު އަދާކޮށް، ސައުދީގެ ލީޑަޝިޕަށް ހެޔޮދުޢާ ކޮށްފައިވެއެވެ.
މި މަސައްކަތް ކުރިއަށް ގެންގޮސްފައިވަނީ އިޙްރާމް ބަންނަ މުހިންމު މީޤާތެއް ކަމަށްވާ މީޤާތު މިސްކިތަށް ޖަމާވާ ގިނަ އަދަދެއްގެ މީހުންނަށް ފަސޭހަވާނެ ފަދަ އިންތިޒާމެއްގެ ދަށުންނެވެ. އެގޮތުން، ފީލްޑް ޓީމުތަކުން ވަނީ އެއްވެސް ދަތިކަމެއް ނެތި އުމްރާވެރިންނަށް މުޞްޙަފްތައް ފޯރުކޮށްދިނުމާ އެކު، ބޭނުންވާ އިރުޝާދުތައްވެސް ފޯރުކޮށްދީފައެވެ.
މި ހަރަކާތަކީ ކީރިތި ޤުރުއާން ޗާޕުކޮށް، ޝާއިޢުކޮށް އަދި ފުޅާ ދާއިރާއެއްގައި ފެތުރުމަށް އެ މިނިސްޓްރީން ކުރަމުންދާ މަސައްކަތްތަކުގެ ތެރެއިން ހިންގުނު ކަމެކެވެ. މީގެ އިތުރުން، އުމްރާ މޫސުމާ ދިމާކޮށް އުމްރާވެރިންނަށް ތަޢުލީމާއި އިރުޝާދު ދިނުމުގެ މަސައްކަތްވެސް އެ މިނިސްޓްރީން ދަނީ މެދުކެނޑުމެއް ނެތި ކުރަމުންނެވެ.
