ޗާގޯސް މައްސަލައިގައި ދެބަސްވުން އުފެދި، މޮރިޝަސްއިން ރާއްޖެއާ ގުޅުން ކަނޑާލައިފި

ޗާގޯސްގެ އިސްތިގުލާލާ ގުޅޭގޮތުން އިނގިރޭސިވިލާތާއި މޮރިޝަސްއާ ދެމެދު ވެފައިވާ އެއްބަސްވުމަށް ރާއްޖެއިން އިއުތިރާޒުކުރާ ކަމަށް ބުނެ، މޮރިޝަސްއިން ދިވެހިރާއްޖެއާއެކު އޮތް ހުރިހާ ސިޔާސީ ގުޅުންތަކެއް ވަގުތުން މެދުކަނޑާލުމަށް ނިންމައިފިއެވެ. މި ނިންމުން ނިންމާފައިވަނީ މިއަދު ބޭއްވުނު އެ ގައުމުގެ ވަޒީރުންގެ މަޖިލީހުގެ ކުއްލި ބައްދަލުވުމެއްގައެވެ.

މޮރިޝަސް ސަރުކާރުން ނެރުނު ބަޔާނެއްގައިވާ ގޮތުން، ޗާގޯސް އައިލެންޑްސް ނުވަތަ ފޯޅަވައްސަކީ މޮރިޝަސްގެ ބައެއްގެ ގޮތުގައި ބަލައިގަތުން ދިވެހި ސަރުކާރުން މިހާރު ވަނީ ހުއްޓާލާފައެވެ. މީގެ އިތުރުން، ޗާގޯސްގެ މިލްކުވެރިކަން މޮރިޝަސްއަށް ބަދަލުކުރުމަށް އިނގިރޭސިވިލާތާއެކު އެކުލަވާލާފައިވާ ތާރީޚީ އެއްބަސްވުމަށް ރާއްޖެއިން ހުރަސްއަޅަމުންދާކަން އެ ގައުމުގެ ކެބިނެޓުން ވަނީ ފާހަގަކޮށްފައެވެ.

މި މައްސަލައިގެ ފަސްފަހަތަށް ބަލާއިރު، ރާއްޖެއާއި މޮރިޝަސްއާ ދެމެދު އޮތް ކަނޑުގެ ސަރަހައްދުގެ މައްސަލަ ބައިނަލްއަގުވާމީ ކަނޑުގެ ގާނޫނާ ބެހޭ ޓްރައިބިއުނަލް (އިޓްލޮސް) އިން 2023 ވަނަ އަހަރު ވަނީ ނިންމާފައެވެ. އެ ހުކުމުގައި ރާއްޖޭގެ ދެކުނުގެ އިގްތިސާދީ ސަރަހައްދުން ބޮޑު ބައެއް ރާއްޖެއަށް ލިބޭ ގޮތަށް ނިންމާފައި އޮތް ނަމަވެސް، ރާއްޖޭގެ މިހާރުގެ ސަރުކާރުން ވަނީ އެ ނިންމުމާ މެދު އަލުން ވިސްނާނެ ކަމަށް މީގެ ކުރިން ބުނެފައެވެ.

އިނގިރޭސިވިލާތުން ޗާގޯސްގެ އިސްތިގުލާލު މޮރިޝަސްއާ ހަވާލުކުރަން އެއްބަސްވީ 2024 ވަނަ އަހަރުގެ ފަހުކޮޅުގައެވެ. ނަމަވެސް، މި އެއްބަސްވުމުގެ ސަބަބުން ރާއްޖޭގެ ކަނޑުގެ ސަރަހައްދަށް އަސަރުކޮށްފާނެ ކަމަށް ބުނެ ރާއްޖެއިން އިއުތިރާޒު ކުރަން ފެށުމަކީ ދެ ގައުމުގެ ގުޅުން ގޯސްވާން މެދުވެރިވި މައިގަނޑު ސަބަބެވެ.

މޮރިޝަސްއިން ރާއްޖެއާއެކު އޮތް ޚާރިޖީ ގުޅުންތައް ކަނޑާލުމަކީ މި ސަރަހައްދުގެ ޖިއޮޕޮލިޓިކްސްއަށް އަންނާނެ ބޮޑު ބަދަލެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ. މިކަމާ ގުޅޭގޮތުން ދިވެހި ހާރިޖިއްޔާއިން އަދި ރަސްމީކޮށް އެއްޗެއް ބުނެފައެއް ނުވެއެވެ.