ކްރީޓް ކައިރިން ދަތުރުކުރި އުޅަނދެއް ބަންޑުންޖަހާލައި ތިން މީހަކު މަރުވެއްޖެ
ގްރީސް ގެ ރަށެއް ކަމަށްވާ ކްރީޓް ކައިރިން ހިޖުރަވެރިން ދަތުރުކުރި އުޅަނދެއް ބަންޑުން ޖަހާލައި، މަދުވެގެން ތިން މީހުން މަރުވެއްޖެއެވެ.
ގްރީސް ގެ ކަމާބެހޭ އިދާރާތަކުން ހޮނިހިރު ދުވަހު ހާމަކުރި ގޮތުގައި، ކަނޑުމަތީގައި ހިންގި ސަލާމަތީ އޮޕަރޭޝަނެއްގެ ތެރެއިން ތިން މީހެއްގެ ހަށިގަނޑު ވަނީ ފެނިފައެވެ. މި ހާދިސާ ހިނގި ސަރަހައްދުން 20 މީހަކު ސަލާމަތްކޮށްފައިވަނީ އެ ސަރަހައްދުން ދަތުރުކުރި މުދާ އުފުލާ ބޯޓަކުންނެވެ.
ގްރީސް ގެ ގައުމީ މީޑިއާ (އީ.އާރް.ޓީ) އިން ރިޕޯޓްކޮށްފައިވާ ގޮތުގައި، މި ހާދިސާ ހިނގަން މެދުވެރިވީ ހިޖުރަވެރިން ތިބި ލަކުޑި ދޯނި ކައިރިއަށް މުދާ އުފުލާ ބޯޓު ކައިރިކުރި ވަގުތުގައެވެ. ދޯނީގައި ތިބި މީހުން ބޯޓަށް އެރުމަށް ސިޑިތަކަށް އެރި ވަގުތު، ދޯނި ކުއްލިއަކަށް ލަނބާލައި ބަންޑުން ޖަހާލީއެވެ.
ގްރީސް ގެ ކޯސްޓްގާޑުގެ ތަރުޖަމާނަކު އޭ.އެފް.ޕީ އަށް މައުލޫމާތު ދެއްވި ގޮތުގައި، ގެއްލުނު މީހުން ހޯދުމުގެ މަސައްކަތް މިހާރުވެސް ދަނީ ކުރިއަށެވެ. މި މަސައްކަތުގައި ކޯސްޓްގާޑުގެ ހަތަރު އުޅަނދަކާއި، މަތިންދާބޯޓެއްގެ އިތުރުން ޔޫރަޕްގެ ބޯޑަރު އެޖެންސީ (ފްރޮންޓެކްސް) ގެ ދެ އުޅަނދު ދަނީ ހަރަކާތްތެރިވަމުންނެވެ.
އީ.އާރް.ޓީ އިން ބުނި ގޮތުގައި، ސަލާމަތްވި މީހުން މައުލޫމާތު ދީފައިވަނީ އެ ދޯނީގައި ގާތްގަނޑަކަށް 50 މީހުން ތިބި ކަމަށެވެ. މީގެ އިތުރުން، އެ ސަރަހައްދުން ހިޖުރަވެރިން ގޮވައިގެން ދަތުރުކުރި އިތުރު އުޅަނދެއް ފެނުމާ ގުޅިގެން، އެމީހުން ސަލާމަތްކުރުމުގެ މަސައްކަތްވެސް ވަނީ ފަށާފައެވެ.
ފާއިތުވި އަހަރެއްހާ ދުވަހުގެ ތެރޭގައި، ލީބިޔާއިން ފުރައިގެން ނުރައްކާތެރި ކަނޑުގެ ދަތުރަކަށްފަހު ޔޫރަޕަށް އެތެރެވުމަށްޓަކައި ކްރީޓަށް ދިއުމަށް ގިނަ ބަޔަކު ދަނީ މަސައްކަތް ކުރަމުންނެވެ. އދ. ގެ ރެފިއުޖީ އެޖެންސީ (ޔޫ.އެން.އެޗް.ސީ.އާރް) ގެ ތަފާސްހިސާބުތަކުން ދައްކާ ގޮތުގައި، 2025 ވަނަ އަހަރުގެ މިހާތަނަށް 16,770 އަށްވުރެ ގިނަ މީހުން ވަނީ ހިމާޔަތް ހޯދުމަށް ކްރީޓަށް ގޮސްފައެވެ.
ހިޖުރަވެރިން އިތުރުވަމުންދާތީ، ޔޫނާނީގެ ސަރުކާރުން ވަނީ މިދިޔަ އަހަރުގެ ހޫނު މޫސުމުގައި ތިން މަސް ދުވަހުގެ މުއްދަތަށް ހިމާޔަތަށް އެދި ހުށަހަޅާ ފޯމުތައް ބަލައިގަތުން މެދުކަނޑާލާފައެވެ. ޔޫ.އެން.އެޗް.ސީ.އާރް އިން ހާމަކުރި ގޮތުގައި، 2025 ވަނަ އަހަރުގެ ތެރޭގައި ޔޫނާނީގެ ކަނޑުގެ ސަރަހައްދުގައި 107 މީހަކު ވަނީ މަރުވެ ނުވަތަ ގެއްލިފައެވެ.
