އެސް.ޑީ.އެފް އާއެކު ވެވުނު ސުލްހައިގެ އެއްބަސްވުމުގެ ދަށުން ސޫރިޔާގެ ސިފައިން ގާމިޝްލީއަށް ވަދެއްޖެ
ކުރުދީންގެ އިސްނެގުމާއެކު އުފައްދާފައިވާ ހަނގުރާމަވެރި ޖަމާއަތްތަކާއެކު ވެވުނު ސުލްހައިގެ އެއްބަސްވުމުގެ ދަށުން، ސޫރިޔާގެ އިރުއުތުރުގައި އޮންނަ ގާމިޝްލީ ސިޓީއަށް އެ ގައުމުގެ ސަރުކާރު ސިފައިން ވަންނަން ފަށާފައިވާ ކަމަށް ސޫރިޔާގެ ދައުލަތުގެ މީޑިއާއިން ރިޕޯޓްކޮށްފިއެވެ.
ސޫރިޔާގެ ދާޚިލީ ވުޒާރާއާ ހަވާލާދީ ‘ސަނާ’ ނިއުސް އެޖެންސީން އަންގާރަ ދުވަހު ބުނީ، ހަސަކާ ޕްރޮވިންސްގެ އެ ސިޓީއަށް ސިފައިންގެ ޔުނިޓުތައް ވަންނަން ފަށާފައިވަނީ އެއްބަސްވުމުގެ މާއްދާތައް ތަންފީޒުކުރުމަށާއި ސަލާމަތީ ކަންކަން ބެލެހެއްޓުމުގެ މަސްއޫލިއްޔަތުތަކާ ހަވާލުވުމަށް ކަމަށެވެ.
މިއީ ކުރުދީންގެ ބާރުގެ ދަށުގައި އޮންނަ ސީރިއަން ޑިމޮކްރެޓިކް ފޯސަސް (އެސް.ޑީ.އެފް) އިން ސޫރިޔާގެ ދައުލަތުގެ މުއައްސަސާތަކާ ގުޅުމަށް މިދިޔަ ހުކުރު ދުވަހު ސަރުކާރާއެކު އެއްބަސްވުމާ ގުޅިގެން ނިންމި ނިންމުމެކެވެ. މިއާއެކު، ސަރުކާރު ސިފައިންނާއި އެސް.ޑީ.އެފް އާ ދެމެދު ހިނގަމުންދިޔަ ކުރިމަތިލުންތަކާއި އުފެދިފައިވާ ނުތަނަވަސްކަމަށް ވަނީ ނިމުމެއް އައިސްފައެވެ. މި އެއްބަސްވުމުގެ ދަށުން، ސޫރިޔާގެ އަސްކަރިއްޔާއިން ވަނީ މިދިޔަ ހޯމަ ދުވަހު ހަސަކާ ސިޓީއަށް ވެސް ވަދެފައެވެ.
ގާމިޝްލީގެ ބޭރުގައި އޮންނަ ތެލް ބްރަކް ކައިރިން އަލްޖަޒީރާގެ ރިޕޯޓަރު ޓެރެސާ ބޯ ބުނި ގޮތުގައި، ސޫރިޔާ ސިފައިންގެ ގާފިލާ އެ ސިޓީއަށް ދަތުރުކުރަމުން ދިޔައިރު އެތައް ސަތޭކަ ބަޔަކު ދިޔައީ އެމީހުންގެ ފަހަތުން ދަތުރުކުރަމުންނެވެ. އޭނާ އިތުރަށް ބުނި ގޮތުގައި، މި ހަރަކާތަށް އެ ސަރަހައްދުގެ އަރަބި ދަރިކޮޅުގެ މީހުންނާއި ބައެއް ކުރުދީންގެ ފަރާތުން ބޮޑު ތަރުހީބެއް ލިބެމުންދެއެވެ. އެހެންނަމަވެސް، އަދިވެސް ކޮންމެވެސް ވަރެއްގެ ނުތަނަވަސްކަމެއް އެބައޮތް ކަމަށާއި، އަނިޔާވެރި އަމަލެއް ހިނގައިދާނެކަމުގެ ބިރު އެބައޮތް ކަމަށް ވެސް އޭނާ ފާހަގަކުރިއެވެ.
ހުކުރު ދުވަހު ވެވުނު އެއްބަސްވުމުގެ ސަބަބުން، ރައީސް އަހުމަދު އަލްޝަރާއުގެ ސަރުކާރާއި އެސް.ޑީ.އެފް އާ ދެމެދު އިތުރު ކުރިމަތިލުންތަކެއް ހިނގުން ވަނީ ހުއްޓުވިފައެވެ. މިދިޔަ ޖެނުއަރީ މަހުގެ ތެރޭގައި ސޫރިޔާގެ އިރުމައްޗާއި އުތުރުގެ ބޮޑު ސަރަހައްދެއް ސަރުކާރު ސިފައިން ވަނީ އެސް.ޑީ.އެފްގެ އަތުން ހޯދާފައެވެ.
އެމެރިކާއިން ވެސް ތައުރީފުކޮށްފައިވާ މި އެއްބަސްވުމަކީ ގައުމީ އެއްބައިވަންތަކަމަށް އެޅުނު މުހިންމު ފިޔަވަޅެއްގެ ގޮތުގައި ބެލެވެއެވެ. މި އެއްބަސްވުމުގެ ދަށުން ކުރުދީ ހަނގުރާމަވެރިން މަރުހަލާތަކަކަށް ބަހާލައިގެން ސަރުކާރުގެ އަސްކަރީ ސަފުތަކާ ގުޅެމުންދާނެއެވެ. ރިޕޯޓަރު ބުނި ގޮތުގައި މިއީ ކުރިން އެސް.ޑީ.އެފްގެ ބާރުގެ ދަށުގައި އޮތް ސަރަހައްދުތަކުގައި ދިރިއުޅޭ ރައްޔިތުންނަށް އަންނާނެ ބޮޑު ބަދަލެކެވެ.
