ސްކޭމްކޮށްގެން ހޯދި ފައިސާ އޭޓީއެމުން ނަގައިދިން މީހަކު 30 ދުވަހަށް ބަންދުކޮށްފި
ސޯޝަލް މީޑިއާ އެކައުންޓުތައް ހެކްކޮށް ވިޔަފާރި ކުންފުންޏެއްގެ ބޭންކު އެކައުންޓަށް ވަދެ ގިނަ އަދަދެއްގެ ފައިސާ ނެގި މައްސަލައެއްގައި ހައްޔަރުކުރި 10 މީހުންގެ ތެރެއިން މީހަކު، އޭނާގެ އެކައުންޓަށް ޖަމާކުރި 25،000 ރުފިޔާއަށް ވުރެ ގިނަ ފައިސާ ނަގައި އެހެން މީހަކަށް ދިން ކަމަށް ކްރިމިނަލް ކޯޓުގައި އެއްބަސްވުމުން 30 ދުވަހަށް އޭނާ ބަންދުކޮށްފި އެވެ.
މި މައްސަލައިގައި ހައްޔަރުކުރި ގއ. ކަނޑުހުޅުދޫ މުހައްމަދު އަލީ، 42، ގެ ބަންދަށް ކޯޓުން ވަނީ 30 ދުވަސް އިތުރުކޮށްފަ އެވެ. ފުލުހުން މި މައްސަލަ އިތުރަށް ތަހުގީގު ކުރަމުންދާއިރު، މިއީ 279،600 ރުފިޔާއަށް ވުރެ ގިނަ ފައިސާ ސްކޭމްކޮށްގެން ނަގާފައިވާ މައްސަލައެކެވެ.
ކްރިމިނަލް ކޯޓުން އިއްޔެ ނެރުނު އަމުރުގައިވާ ގޮތުން، ސްކޭމްކޮށްގެން ކުންފުނީގެ އެކައުންޓަށް ވަދެ އެކި މީސްމީހުންނަށް ފޮނުވި 279،600 ރުފިޔާއަށް ވުރެ ގިނަ ފައިސާގެ ތެރެއިން 25،242.80 ރުފިޔާ މުހައްމަދު އަލީގެ އެކައުންޓަށް ވަދެފައިވެ އެވެ. އޭނާ ވަނީ މި ފައިސާ އޭޓީއެމުން ނަގައި އެހެން މީހަކަށް ހަވާލުކުރި ކަމަށް ކޯޓުގައި އިއްޔެ އެއްބަސްވެފަ އެވެ. އޭނާގެ ބަންދަށް 30 ދުވަސް އިތުރުކުރީ ފުލުހުންގެ ތަހުގީގަށް ބުރޫނާރާނެ ކަމަށް ފެންނާތީ އެވެ.
ފުލުހުން މި މައްސަލައިގައި މީހުން ހައްޔަރުކުރީ މި މަހުގެ 21 ވަނަ ދުވަހުން ފެށިގެން ހިންގި އޮޕަރޭޝަނެއްގެ ދަށުންނެވެ. އެ މީހުން ބުނި ގޮތުގައި މި ސްކޭމް ހިންގާފައިވަނީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާ ހިއްސާވާ ވިޔަފާރި ކުންފުންޏެއްގެ ބޭންކު އެކައުންޓަށް ވަދެގެންނެވެ. މިގޮތަށް ވަނުމަށް ފަހު އެކައުންޓުގައި ހުރި ފައިސާ އެކި ފަރާތްތަކަށް ޖަމާކޮށް ނަގާފައިވަނީ ހެކަރުންގެ ކޮންޓްރޯލްގެ ދަށުން ކަމަށް ތަހުގީގަށް ވަނީ ހާމަވެފަ އެވެ.
ހައްޔަރުކުރި 10 މީހުންނަކީ މާލެއިން ހައްޔަރުކުރި ހަ މީހުންނާއި، އައްޑޫން ހައްޔަރުކުރި ތިން މީހުންނާއި، ހިންމަފުށިން ހައްޔަރުކުރި އެކަކު ހިމެނޭހެންނެވެ. ފުލުހުން ފާހަގަކުރި ގޮތުގައި މި މީހުންގެ ތެރޭގައި ކުށުގެ ރެކޯޑް ހުރި ފަރާތްތައް ވެސް ހިމެނެ އެވެ. މިކަމުން ދައްކުވައިދެނީ މިފަދަ ކުށްތަކުގައި ފުޅާ ދާއިރާއެއްގައި ވަކި ކުށްވެރި ޖަމާއަތްތަކެއް ހަރަކާތްތެރިވާ ކަމެވެ.
ފުލުހުން ބުނި ގޮތުގައި، ހައްޔަރުކުރި މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ ފަރާތްތަކެވެ. އަދި އެ ތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާއަށް މުދާ ގަނެފައިވެ އެވެ. އަނެއް ތިން މީހުންނަކީ، އެކި މީހުން އޭޓީއެމަށް ގެންގޮސްގެން އެ މީހުން މެދުވެރިކޮށް އޭޓީއެމުން ފައިސާ ނެގުމަށް ފަހު އެ ފައިސާތަކާ ހަވާލުވި މީހުންނެވެ. މިކަމުން މި ކުށުގައި ބައިވެރިވި ފަރާތްތަކުގެ ތަފާތު ދައުރުތައް ދައްކުވައިދެ އެވެ.
