ޔޫކްރެއިންގެ ހަނގުރާމަވެރި ސަރަޙައްދުތަކުގެ 700،000 ކުދިން މިހާރު ރަޝިޔާގައި އެބަތިބި: މޮސްކޯ

ޔޫކްރެއިންގައި ހިނގަމުންދާ ހަނގުރާއިގައި ބަދަލުކުރެވޭ ހަމަލާތަކުން ސަލާމަތް ވުމަށް 700،000 ކުދިން މިހާރު ރަޝިޔާގައި އެބަތިބި ކަމަށް މޮސްކޯގެ އޮފިޝަލަކު ވިދާޅުވެއްޖެއެވެ.

ރަޝިޔާގެ ގާނޫނު ހަދާ މަޖިލީހުގެ މަތިގެ ކަމަށްވާ ފެޑެރޭޝަން ކައުންސިލްގެ ބައިނަލްއަގުވާމީ ކޮމިޓީގެ މުގައްރިރު ގްރިގޯރީ ކަރަސިން އާދީއްތަ ދުވަހުގެ ރޭ ވިދާޅުވީ ޔޫކްރެއިންގެ ހަނގުރާމަވެރި ސަރަހައްދުތަކުން ހަތް ލައްކައެއްހާ ކުޑަކުދިން ރަޝިއާގެ ސަރަހައްދަށް ގެނެސްފައިވާ ކަމަށެވެ.

ކަރަސިން އޭނާގެ ޓެލެގްރާމް މެސެޖިން ޗެނަލްގައި ލިޔުއްވާފައިވާ ގޮތުގައި ފާއިތުވި އަހަރުތަކުގައި 700،000 ކުޑަކުދިން ވަނީ ބޮމުގެ ހަމަލާތަކުން ސަލާމަތްވެ، ޔޫކްރެއިންގެ ހަމަނުޖެހުންބޮޑު ސަރަހައްދުތަކުން ނުކުމެ ރަޝިއާގެ ހިމާޔަތް ހޯދާފައެވެ.

ހުޅަނގުގެ އަވަށްޓެރި ޔޫކްރެއިންއަށް ރަޝިޔާއިން ފުލް ސްކޭލް ހަމަލާއެއް ދޭން ފެށީ 2022 ވަނަ އަހަރުގެ ފެބްރުއަރީ މަހުގެ ތެރޭގައެވެ.

މޮސްކޯއިން ބުނީ ޔޫކްރެއިންއިން ކުޑަކުދިން ރަޝިއާގެ ސަރަހައްދަށް ގެނައުމުގެ ޕްރޮގްރާމަކީ ހަމަނުޖެހުން ހިނގަމުންދާ ސަރަހައްދުގައި ދޫކޮށްލާފައިވާ ޔަތީމު ކުދިންނާއި ކުޑަކުދިން ހިމާޔަތްކުރުން ކަމަށެވެ.

ނަމަވެސް ޔޫކްރެއިންއިން ބުނަނީ ގާނޫނާ ހިލާފަށް ގިނަ ކުދިންތަކެއް ޑީޕޯޓްކޮށްފައިވާ ކަމަށާއި އެމެރިކާއިން ބުނަނީ އެތައް ހާސް ކުއްޖަކު ގަދަކަމުން ގެއިން ނެރެފައިވާ ކަމަށެވެ.

މީހުންނާއި ކުޑަކުދިންގެ ބަދަލު ކުރުމުގެ ގިނަ ހަރަކާތްތައް ހިނގާފައިވަނީ ހަނގުރާމައިގެ ފުރަތަމަ މަސްތަކުގެ ތެރޭގައި އަދި އޮގަސްޓް މަހުގެ ފަހުކޮޅު ޔޫކްރެއިންއިން އިރުމަތީ އަދި ދެކުނުން ހިފާފައިވާ ސަރަހައްދުތައް އަލުން ހޯދުމަށް ވަރުގަދަ ކައުންޓާ އެޓޭކްތަކެއް ފެށުމުގެ ކުރިންނެވެ.

2022 ވަނަ އަހަރުގެ ޖުލައި މަހު އެމެރިކާއިން އަންދާޒާކުރި ގޮތުގައި ރަޝިޔާއިން 260،000 ކުޑަކުދިން “މަޖުބޫރުން ޑީޕޯޓް” ކޮށްފައިވާއިރު، ޔޫކްރެއިންގެ މިނިސްޓްރީ އޮފް އިންޓަގްރޭޝަން އޮފް އޮކިއުޕައިޑް ޓެރިޓަރީސް އިން ބުނާ ގޮތުގައި ޔޫކްރެއިންގެ 19،492 ކުއްޖަކު މިހާރު ވެސް ގަވާއިދާ ހިލާފަށް ޑީޕޯޓްކޮށްފައިވާ ކަމަށް ބެލެވެ އެވެ.

ޔޫކްރެއިންގައި މިހާރު ހިނގަމުންދާ ހަމަނުޖެހުންތަކުގެ ސަބަބުން އެ ގައުމަށާއި މުޅި ސަރަހައްދަށް ވަނީ ވަރަށް ބޮޑު އަސަރެއް ކޮށްފަ އެވެ. 2022 ވަނަ އަހަރު ފެށި މި ހަނގުރާމައިގެ ސަބަބުން އެތައް ހާސް ބައެއްގެ ފުރާނަ ގެއްލި، ޔޫކްރެއިންގެ ރައްޔިތުންނަށް ވަނީ ބޮޑެތި ތަކުލީފުތަކެއް ކުރިމަތިވެފައެވެ.

މި ހަމަނުޖެހުން އުފެދުނީ ރަޝިޔާއިން ކްރިމިއާ ހިފުމާއި އޭގެ ފަހުން ޔޫކްރެއިންގެ އިރުމަތީ ސަރަހައްދުގައި ވަކިވެގަތުމުގެ ހަރަކާތްތަކަށް ތާއީދު ކުރުމާ ގުޅިގެންނެވެ. މި ހަނގުރާމައަކީ ބޮޑެތި ގެންލުންތަކާއި ސަރަހައްދީ ހަމަނުޖެހުންތަކާއި ޖިއޮޕޮލިޓިކަލް ނުތަނަވަސްކަން އުފެދިފައިވާ ހަނގުރާމައެކެވެ.

ސުލްހަވެރި ހައްލެއް ހޯދުމަށް ކުރަމުންދާ މަސައްކަތްތަކަށް ގޮންޖެހުންތަކެއް ކުރިމަތިވެފައިވާ އިރު، ހަނގުރާމަ ހުއްޓާލުމުގެ ގިނަ އެއްބަސްވުންތަކާ ހިލާފުވެ، ޑިޕްލޮމެޓިކް މަޝްވަރާތައް ގިނަ ފަހަރަށް ހުއްޓިފައި ވެ އެވެ. ޔޫކްރެއިންގައި ހިނގަމުންދާ ހަނގުރާމައަކީ ބައިނަލްއަޤްވާމީ ސަމާލުކަން ބޭނުންވާ އަދި ދެމެހެއްޓެނިވި އަދި ސުލްހަވެރި ޙައްލެއް ބޭނުންވެފައިވާ ހަނގުރާމައެކެވެ.