ފުޅާދާއިރާއެއްގައި ނ.ލަންދޫގައި ހިންގަމުންގެންދާ ރިޓެއިލް ފިހާރައެއްކަމުގައިވާ ސްމާޓް 7 ގެ ދެވަނަ އަހަރީ ޕްރޮމޯޝަންގެ ގުރުނެގުން އިއްޔެ ބާއްވައިފިއެވެ.
ސްމާޓް 7 ގެ ދެވަނަ އަހަރީޕްރޮމޯޝަންގެ ގުރުނަގައި އިނާމްތައް ލިބުނު ފަރާތްތަކަށް އިނާމުތައް ހަވާލުކުރުން އޮތީ އިއްޔެ ހަވީރު ސްމާޓް 7 ފިހާރަ ސަރަޙައްދުގެ މަގުމަތީގައި ބޭއްވި ވަރަށް ކުލަގަދަ ރަސްމިއްޔާތެއްގައެވެ.
ސްމާޓް 7 ގެ ދެވަނަ އަހަރީ ޕްރޮމޯޝަންގެ އެއްވަނަ އިނާމަކަށް އޮޓޯ ދޮންނަމެޝިނެއް ހުށަހަޅާފައިވާ މިޕްރޮމޯޝަންއަކީ 200 ރުފިޔާއަށް ވުރެ މަތިން ވިޔަފާރިކުރާ ކަސްޓަމަރުންނަށް 3 މަސްދުވަހުގެ މުއްދަތަށް ހިންގުނު ޕްރޮމޯޝަނެކެވެ. ކޮންމެ ކަސްޓަމަރަކަށްވެސް ކޫޕަނެއް ދީގެން މިޕްރޮމޯޝަން ކުރިއަށް ގެންދިޔައެވެ.
އަގުހުރި ތަފާތު އިނާމްތަކެއް، ޖުމުލަ 10 ފަރާތަކަށް ލިބޭގޮތަށް ކުރިއަށް ގެންދިޔަ މިޕްރޮމޯޝަންގެ ވަނަތައް އިޢުލާންކޮށް ޚާއްޞަ ރަސްމިއްޔާތުގައި ނަޞީބުވެރިންނަށް ވަގުތުން ވަނީ އިނާމްތައް ޙަވާލުކޮށްފައެވެ.
1 ވަނަ އިނާމް، (އޮޓޯ ދޮންނަ މެޝިނެއް) ލިބުނީ ފަރީޝާ ސައީދު ސަނަމް ނ.ލަންދޫ އަށެވެ. 2 ވަނަ އިނާމް، (މައިކްރޯވޭވް އަވަން) ޙައްވާ ނައިޝާ ނަސީމް ނ.ލަންދޫ އަށް ލިބިފައިވާއިރު 3 ވަނަ އިނާމް، (ރައީސް ކުކަރެއް) ލިބުނީ ސަމުސުންނިޝާ އަބޫބަކުރު ސާލު ނ.ލަންދޫ އަށެވެ. 4 ވަނައިނާމަކަށް ހުށަހަޅާފައިވާ މިކްސްޗަރެއް ލިބުނީ ފަހީމާ އިބްރާހިމް ފެންފިނިމާގެ ނ.ލަންދޫ އަށެވެ. 5 ވަނައަށް ހޮވުނީ ޢަބުދުއްނާޞިރު ޢަބުދުﷲ ނޫރަންގެ ނ.ލަންދޫއެވެ. 5 ވަނަ އިނާމަކަށް ދީފައިވަނީ ގޭސް އުނދުނެކެވެ.
އަދި މީގެ އިތުރުންވެސް އިތުރު 5 ފަރާތަކަށް ވަނީ އެ ރަސްމިއްޔާތުގައި އިނާމް ޙަވާލުކޮށްފައެވެ. އިނާމްތައް ޙަވާލުކޮށްދެއްވީ ޚާއްޞަ ރަސްމިއްޔާތުގެ ޝަރަފްވެރި މެހްމާން ނ.ކެނދިކުޅުދޫ ކުރީގެ ބޮޑުކަތީބު އަލްފާޟިލް ޢަބުދުﷲ މަހަމޫދު އާއި، ސްމާޓް 7 ގެ އޯނަރ އަލްފާޟިލް ޙަސަން ނަޞީރު އާއި، ރަސްމިއްޔާތުގައި ބައިވެރިވެ ވަޑައިގެންނެވި ޚާއްޞަ ޢިއްޒަތްތެރިންނެވެ.
މިކަމަށްޓަކައި ސްމާޓް 7 ގެފަރާތުން އިންތިޒާމްކުރި މި ޚާއްޞަ ރަސްމިއްޔާތުގައި ސްމާޓް 7 ގެ ގިނަ އަދަދެއްގެ ކަސްޓަމަރުންނާއި، ލަންދޫ ރައްޔިތުންގެ ތެރެއިން ގިނަ ބަޔަކު ބައިވެރިވިއެވެ.
ސްމާޓް 7 އަކީ ނ.ލަންދޫ އަމާޒު އަލްފާޟިލް ހަސަން ނަޞީރުގެ މަސްޢޫލް ވެރިކަމުގެ ދަށުން 16 ޖެނުއަރީ 2018 އިން ފެށިގެން މެދުނުކެނޑި ލަންދޫގައި ފުޅާދާއިރާއެއްގެ ރިޓެއިލްކޮށް ވިޔަފާރިކުރަމުން އަންނަ ލަންދޫ ރައްޔިތުންގެ ލޯބި ހޯދާފައިވާ ގިނަބަޔަކު އިތުބާރުކުރާ ފިހާރައެކެވެ.
