މި އަހަރުގެ ސެޕްޓެމްބަރު މަހުގެ ނިޔަލަށް މުދަލު ޒަކާތުގެ ގޮތުގައި 109.2 މިލިއަނަށް ވުރެ ގިނަ ރުފިޔާ ބަލައިގަނެ، ވޭތުވެދިޔަ އަހަރު މުޅި އަހަރަށް ލިބުނު ޖުމްލަ އާމްދަނީއަށް ވުރެ މި އަހަރުގެ އާމްދަނީ އިތުރުވެއްޖެ ކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.
މޯލްޑިވްސް ޒަކާތު ހައުސްގެ ތަފާސްހިސާބުތައް ދައްކާ ގޮތުގައި، ވޭތުވެދިޔަ އަހަރު މުދަލު ޒަކާތުގެ ގޮތުގައި ލިބިފައިވަނީ 106.4 މިލިއަން ރުފިޔާއެވެ. އެހެންކަމުން މިއީ ވޭތުވެދިޔަ އަހަރާ އަޅާބަލާއިރު 2.8 މިލިއަން ރުފިޔާ ނުވަތަ %2.64 ގެ ކުރިއެރުމެކެވެ. މީގެ ތެރޭގައި ދިވެހި ފައިސާއިން ލިބުނު 108.7 މިލިއަން ރުފިޔާގެ އިތުރުން 34,021 ޔޫއެސް ޑޮލަރު ހިމެނެއެވެ.
އަހަރު ނިމެން އަދި ތިން މަސްދުވަސް ބާކީ އޮތުމުން، މި އަހަރު ނިމޭއިރު ޒަކާތުގެ ގޮތުގައި ލިބޭ ޖުމްލަ އަދަދު ރެކޯޑު މިންވަރަކަށް އިތުރުވެގެންދާނެ ކަމަށް ޒަކާތު ހައުސްއިން ލަފާކުރެއެވެ.
މުދަލުގެ ޒަކާތަކީ ނިޞާބު ހަމަވާތާ އަހަރެއް ފުރިފައިވާ ކޮންމެ މުސްލިމެއްގެ މައްޗަށް އޮތް ދީނީ ފަރުޟެކެވެ. އެގޮތުން މިދިޔަ މަހުގެ 20 ވަނަ ދުވަހުން ފެށިގެން މުދަލު ޒަކާތުގެ ނިޞާބަކީ 19،266.10 ރުފިޔާއެވެ. ރާއްޖޭގައި މުދަލު ޒަކާތް ބަލައިގަންނަނީ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) މެދުވެރިކޮށެވެ.
ކޮމެންޓް (0)
ލޯޑް ކުރަމުން...